TALA I VAIFANUA

Pago Pago, AMERIKA SAMOA

$16.7MILIONA E LE ASG MAI LE MATAGALUEGA O LE INITERIA

Ua mae’a maua mai fo’i le fa’atupega o nisi o galuega a le tatou malo mai le Initeria e ala mai lea i le Ofisa o Mataupu a le Inisula. Ua le gata ina aumaia lea tele o le fa’atupega, ae ua fa’avasega mai ma vaega o le malo i a latou poloketi e fa’atupe i lea vaega tupe.

O lo ua fa’ailoa mai o le vaega tupe lea ua fa’atulaga mai mo le Kolisi, aoga a le Malo, le vaega o fa’amasinoga ma le falema’i tele i Faga’alu.

“O lo’o galulue malosi lava le Ofisa o Mataupu a le Inisula o le Matagaluega o le Initeria ina ia mautinoa o lo’o maua e Amerika Samoa le vaega tupe fa’agaoioia ai ona vaega eseese, ae fa’atutu lava i tupulaga faia’e o le atunuu, le tele o galuega nei. O nei fa’atupega e fa’auia mai  ele Konekeresi, ma e vave lava ona fa’ao’o atu i le tatou malo,” o se tala lea a Nikolao Pula. “O tupe nei e mautinoa lava o lo’o mana’omia vave e fa’aleleia ai vaega na fa’atagisia ai aua le tautua lautele mo tagata o le atunuu.”

O le vaevaega o le tinoitupe ua fa’amatuu mai ua aofia ai:

• Malo o Amerika Samoa: $10,557,000

• LBJ Tropical Medical Center: $4,533,000

• Kolisi Tuufa’atasi o Amerika Samoa: $1,258,000

• Vaega o Fa;amasinoga Maualuga: $370,000

• Aofa’iga: $16,718,000

O le seleni ua fa’amautu atu nei o se toe fa’aopoopoga lea I nisi o tinoitupe ua mae’a fa’auia atu ma o lo’o fa’aauau lava mo nisi fo’i seleni i le lumana’i.

MALAGA TILALI  SCANLAN - E  AOGA A’AU I THAILAND:

O le tatou tamaitai sili ona lelei lana a’au, Tilali Scanlan, ua fa’ailoa mai o lo’o malaga atu nei i Thailand, ina ia faatasi atu i se aoa’oga a’au fa’apitoa o lo’o fa’atasi i lea a’ai tele. O Tilali sa i ai o ia i Fiti ona o lo’o auai o ia o se sui o le Kalapu a’au i Suva, le Dolphins Swim  Club ona o lo’o tau’avea fo’i ana kosi e a’oga ai i le University of the South Pacific i Suva, Fiti. O lo’o ta’avea e ia kosi tau Marine Science/Biology i lea Iunivesite.

O lenei tamaitai talavou o le tatou tama fanau o lo’o ua iloga lana taumafaiga i le a’au, ma e aoga ia te ia le malaga atu e fa’atauva i so’o se avanoa fa’apenei e mafai ona ia maua, ina ia fa’aleleia atili lona malosi ma le iloa i tu’uga a’au. 

I le tauvaga o ta’aloga a le Pasefika i le tausaga e 2019, na seti ai e Tilali matati’a e lua i fa’amaumauga o tu’uga a’au i le tatou nei malo ina ua manumalo o ia i le pine siliva ma pine apamemea i le tu’uga a’au mo le 50m backstroke ma le 100m backstroke.

TUMAU PEA TOFIGA SUI PERESETENE WORLD VOLLEYBALL FEDERATION IA BEN SAUVAO

Ua fa’ailoa e le Asosi Volleyball i Amerika Samoa [ASVA] o lo’o tumau pea le tofiga na fa’ae’e i le tatou Peresetene o le ASVA, Ben Sauvao. O le tofiga lea o le Sui Peresetene o le Oceania mo le World Volleyball Federation (WVF), o le iuga lea o se palotaga na toe faia, ma ua fa’aopoopo ai le isi fa tausaga e toe tula’i ai i lea tofiga.

O Sauvao o lo’o avea o ia ma totino tumau o le aoga tele lea ia i tatou i Amerika Samoa nei, e mafai ai ona vave oo mai suiga o tulafono ma nisi metotia fou e fa’aaoga i lea fa’agatama e fia fa’ailoa mai i Asosi Volleyball eseese o lo’o avea ma totino o le WVF.

O le avea fo’i ma sui o le Laulaufono a le WVF e aoga mo le atunuu e mafai ai ona fa’ailoa atu lagona o le Asosi Volleyball i fonotaga ma talanoaina fo’i na mataupu i fonotaga usuia a le WVF. Ua fa’ailoa mai e i ai alamanuia e mafai ona maua mai i le avea ai ma sui o lea Laulauafono ma le WVF, e fesoasoani i nisi taimi e fa’aleleia ai mea ta’alo ma malae ta’alo mo ta’amilosaga o le fa’agatama i atunuu ta’itasi o auai o totino o le WVF.

O le taimi nei ua fa’ailoa mai ua mafai nei ona agava’a le tatou ASVA e fa’atulaga le nofoaga e fa’aleleia lona foloa ia gatusa ma tulafono o malae e fa’atautaia ai ta’aloga Volleyball i so’o se taimi, ae maise i ta’amilosaga fa’avaomalo. O lo ua fa’ailoa mai foi e ao ina faia i totonu o faleta’alo ae le folaina ai se malae i fafo.

O lo ua fa’ailoa mai e Ben Sauvao, “Ona o le a’afia o le atunuu i le Coronavirus mai le tausaga ua te’a, ua le to’ai taunuu mai ai le uta o nei ituaiga o malae peita’i ua mautinoa e to’ai taunuu mai i se vaitau o le tausaga nei.”

“I le taimi nei fo’i, ua amata tapena atu le Asosi Volleyball a le tatou Malo ina ia fa’atautaia ta’amilosaga e milo ma fili ai ‘au ta’a’alo e masi’i atu mo le Pacific Games i Saipan, lea e faia i le tausaga a sau, 2012, i Saipan.

FA’AFETAIA ASOSI TAMA MA TEINE TUAI - TUMAU IGOA O MATAFAO ELEMENTARY

Ina ua fa’amaonia atu le tala fiafia ua tumau pea le igoa o le a’oga tulaga muamua i Faga’alu o Matafao Elementary, ua fa’ailoa le fiafia o latou tama ma teine tuai o lea aoga, i sa latou tutula’i ma fa’ailo, ua fa’ailoa mai ai lo latou agaga fa’afetai tele.

O nisi o sui sa iloga ona tutula’i e fa’amalosia le latou mau, ia tumau pea le igoa o le A’oga, ae le suia e pei ona manatu i ai le faigamalo ua tuana’i, o i la’ua foi na sa latou muamua mai e fa’afetaia le fa’aiuga ua tuuina aloa’ia mai.

O le tamaitai o Liz Croker Toafa o le vasega fa’aiuaso mai Matafao o le tausaga 1994 ma le tina o Carol Alailefaleula Schuster, sa muamua fo’i tula’i mai e fa’afetaia le fa’aiuga.

“E fa’ailoa atu le fa’afetai tele ona o le amanaia o se mau sa tuualalo ma taumafai i ai i matou uma ma le fanau a’oga. O le tautai lava ia e fa’alogo i lagona o lana auva’a, e na te maua fo’i agaga. O le fa’afetai fo’i e fo’i a i le Atua aua na te faia mea e malilie ai loto. Ua lagona fo’i le fa’atauva’a o lenei vasega, ina ua talia le mau e taiulu o le matagaluega o A’oga, fa’afetai lava mo le amanaia sili ona maualuga. Tausaga 94 Matafao patipatia le fa’aiuga, ma ia silafia, e i ai lo tatou sao i malo.”

Ua fa’afetaia fo’i e i latou uma nisi sa auai e sapaia lenei fa’amoemoe, ua a’e malo le taumafaiga, o le fa’afetai e fo’i i le Atua, ae tula’i mai ma fai sou sao i le fa’aleleiga o le laumua i so’o se ala e mafai ai.

O nisi ua fa’afetaia o i latou sa saini a’ao i le latou pepa mo le fa’amoemoe lenei ua mae’a, fa’atasi ai ma nisi sa latou tapua’ia faiva ma le tatalo.