TALA I VAIFANUA

Pago Pago, AMERIKA SAMOA

MASAGA 4 - FA’AUAU FOA’I TAUA PACIFIC INDEPENDENT DISTRIBUTORS INC.

Sa mua’i manatu le Pulega a le Kamupani a le Pacific Independent Distributors Inc. i Tafuna, fa’atasi ai ma a latou Kamupani Fa’apa’aga e ala i Oloa fa’atau mai, o le a faia lenei foa’i mo le ulua’i tausaga atoa, o le soifuaga o le ulua’i masaga 4, ua soifua a’e ma tausia fa’afailele i Amerika Samoa nei.

Peitai, i le aso na mae’a ai le foa’i mulimuli ia Ianuari 2021, ua talatalanoa ma le tinao Filomena Sokimi ma iloa ai, le figata o lo’o feagai ma ia i le taumafiaga e tausia le fanau. Ua le toe faigaluega. E faigaluega fo’i le tama ae le umi ma toe fa’ate’a mai galuega, ua le mautu atili ai lona mafaufau i se to’omaga o le a ia maua e mafai ai ona soso’o le fau ma le fau, aua o le a motusia lea fesoasoani tele sa ia mauaina.

Ua va’ai ma molimauina e le sui o le nusipepa faapea ma sui sa o’o ane o le PID Inc. e fa’ao’o atu le toega o le foa’i, ua atoa i ai le tausaga atoa o faia lea foa’i. E moni o lo’o maua le WIC mo le fanau, ua toe aoga lava lea alamanuia ma ua faaaoga fa’atasi e le latou aiga.

Ina ua taliu nei sui, ua faigata lagona ootia, aua ua va’aia, le faigata ona tausia e le tina e to’atasi o le fanau. E matua mana’omia le tele o lima mo le tausiga, ae o le malosi fo’i latou, e le tatau ona fa’ama’ima’i le fa’alogo i aso uma. Ua fautuaina e sili ona fa’aaoga le Day Care Program, e avatu le fanau ma alu atu ai ma le tina ina ia faigaluega fa’atasi ai e tausia lelei ai le fanau. O se tau sailiga lava o se toomaga.

Peita’i, o se tala fiafia ua fa’alogoina nei, ina ua logo mai e le sui o le Pulega ma le Aufaigaluega a le PID Inc. i Fagaima, o lo ua malilie fa’atasi le PID Inc, ma latou pa’aga le Kamupani o lo’o sapalaia mai le ituaiga Diapers o le “Huggies” i Ausetalia, o le a toe fa’aauau le fesoasoani na ofoina mo le masaga fa a Filomena ma Sokimi Sokimi, mo le isi tausaga o le masaga, se’ia atoa le 2 tausaga.

O le agaga o le fa’afetai, e avea ai fo’i lenei nusipepa ma ala e momoli atu ai le fa’afetaii le Pulega ma le Aufaigaluega a le PID Inc. ma lana pa’aga fa’apisinisi, ona o le agalelei. Ua toe fa’atulaga le aso 4 Fepuari, 2021, o le a toe fa’ao’o atu ai le soso’oga o le foa’i, ma o le a fa’apea ona fai se’ia oo i le aso fanau o le masaga fa ia Ianuari 2022.

Peita’i i le aso soifua o lenei masaga ia Ianuari 2021, na oo atu ai ni Agelu agalelei ma latou fa’atino le aso soifua fa’atasi ma matua ma aiga o lenei masaga 4 i lo latou aiga. O le Faletua o le afioga le Senatoa Tuaolo Manaia Eddie Fruean, Fiapa’ipa’i Fruean ma lana Kamupani o le Nana’s Construction ma isi Kamupani uma a le Nana, sa latou oo ane ma faatino le alofa foa’i o mea uma na mo’omia mo le ‘aiga ma le anoanoa’i o meaalofa taua mo Maureen, Mariah, Melisha ma Miracle Sokimi.

Ua iloga ona faliu le faletua i fa’aaloaloga, o meaalofa tupe mo le vasega o fa’afeagaiga ma faletua, ae maise o latou aiga sa auai e talisapaia le alofa o le Atua ua aulia le tai tausaga o le masaga fa.

Peita’i ua saunoa le tausi a’o le faipisinisi Pa’i Fruean, “O le afuaga o le aso e le’i faigofie, ua fa’ate’ia foi i matou ma le fanau ona o le oo atu o le tina e fia maua se fesoasoani i se galuega e faigaluega ai le tama o le aiga, ua i ai le avanoa, ma e le toe faia lau amio o le tia’i galuega, ae o le siaki fo’i e sau sa’o lava i lima o le masaga ma le latou tina.”

O le keke na tapena o se meaalofa sa saunia e le tina o La Malauulu, o ia o lo’o avea ma Tina Tausi o le masaga, ma sa ia fa’asuafaina le uii o le masaga 4 le tamaitai o Miracle Sokimi, peita’i na faliu fo’i le Nana’s ma tapena mai ma le keke o le aso soifua, ua fa’afaina ai manuia o lea aso. Fa’afetai le alofa ma le agalelei, tuu atu mea uma i le Atua na te foa’i ma fa’atumu mea ua fa’agaogaoina ona o le alofa foa’i.

TO’ALUA ISI SUI - TOE O I TUA MAI LE NOFOVA’AVA’AIA I HONOLULU

O lo ua fa’ailoa mai, e to’alua isi sui ua toe o i tua mai le nofoaga o lo’o nofo va’ava’aia ai i Honolulu ae le malaga mai i Amerika Samoa. Ua pa’u mai ai nei le faitauga o le aumalaga i le to’a 159 o i latou. Fa’ailoa e le Matagaluega o le Soifua Maloloina, “O nei sui e to’alua ua toe o i la’ua i tua ona ua manatu e tatau ona nonofo e faia la’ua talavai i Hawaii, aua o lo’o i ai talavai o lo’o fuafua e fa’aauau pea.”

“Pe ana mafai ona faia le fa’aiuga tonu a le to’alua lea ua fa’ato’a tula’i ese mai i le taimi ae le’i amata ona nofova’ava’aia, e le maumauina lea lua nofoa mo i la’ua, ae aoga mo nisi o lo’o fia malaga mai, ma e le o nisi fo’i e fia fa’aauau talavai.”

O le to’alua lea e fa’aopoopo atu i le to’alima sa muamua ave’esea ina ia maua i suesuega o lo’o ua fa’amaonia o maua i le Coronavirus ma le tasi sa ave;esea ina ia faia pea suega ia te ia, aua o lo’o tele taimi e feso’ota’i ma le isi to’afa lea ua fa’amaonia suega o le Covid-19. 

O i latou uma fo’i o le a galulue feso’ota’i ma lea aumalaga i le fa’ato’ai mai i fanua, e faia fo’i o latou tui suesue o le Covid-19 fa’atasi ma le aumalaga, ina ia mautinoa e le o misia lava se tasi e ono ulufale ma nofo ai le Covid -19 i le atunuu.

O le taimi lava e tulaueleele ai le va’a, gasolo sa’o mai lava le pasese i ta’avale ma la’u sa’o loa i latou i le nofoaga i le fatalimalo o le Tradewinds i Tafuna, e nofova’ava’aia ai mo le 14 aso.

TUSA MA LE 600 TAGATA E TUIA LE TUIPUIPUIA O LE COVID-19 I LE ASO E TASI

O le aofai o i latou e mafai ona tuia le tui puipui o le Coronavirus i aso ta’itasi e tusa lea ma le 600 o i latou. Peita’i, ua tula’i mai le aotelega o i latou ua mae’a tuia e 7,146, a’o i latou ua mae’a le tuiga fa’alua e 954 i latou ma ua aofia ai ma le to’atele o le aumalaga lea e tu’ua le atunuu ia Fepuari 01, 2021.

“I le taimi nei, ua mana’omia lava ona mae’a tuia le aotelega e 10,000 o le atunuu lautele i lenei tui puipuia o le Covid-19 a’o le’i tulaueleele mai le aumalaga lenei ua tatala ai le femalaga’i mai Honolulu,” o se tala lea a le susuga le Fa’atonu Motusa Tuileama Nua.

“Ua mae’a to’ai mai i fanua le isi 1,000 o tui ituaiga o le Moderna, lea na sau ma le va’alele o le aso To’onai ua tuana’i nei, ae ua tatalia fo’i le isi va’alele o lenei vaiaso ma le isi sapalai fou e aumaia ai.”

O le vaiso ua te’a ua amatalia ai le tuiga o le vaega pito i to’atele o le atunuu, o i latou nei o talavou o le atunuu e afua mai le 16 tausaga le matutua ma aga’i i luga.” Ua fa’asolo pea lea vaega lea e 16+ mo le isi lua vaiaso o lumana’i, mai le itula e 8 i le taeao se’ia oo i le aoauli, ma e ao lava ina o atu talavou nei i le falema’i i Tafuna mo tuiga nei.

Ua fa’ailoa mai fo’i e Motusa, “Ua taumafai fo’i ina ia faia le isi tuiga fa’apitoa i le vaega a le TAOA, ona e mafai ona maua fa’atasi ai i latou e to’atele i lena matagaluega.”