Afalava: O tagata faigaluega lava le mafuaaga o le tele o isumu totonu EOB

Pago Pago, AMERIKA SAMOA

O tagata faigaluega lava a le malo le mafua’aga autu e ala ai ona tele isumu e nonofo ma faasoesa solo i totonu o le Ofisa Autu a le malo i Utulei, le maota o le EOB, i lo latou la’u atu lea o taumafa i le tele o aso.

O se vaega lea o le saunoaga a le afioga i le Faatonusili filifilia ia Afalava Eliki Afalava ina ua molimau i luma o le Komiti o le Faagaioiga o le malo a le Maota o Sui i le aso Gafua na te’a nei mo le faamaonia o tofiga a le afioga i le ail’i Kovana ia Lemanu Peleti Mauga e avea ai o ia ma Faatonusili mo le isi 4 tausaga.

E silia i le itula le umi o le iloiloga  na fesiligia ai agavaa o le susuga Afalava, lea na taitaia e le afioga i le ali’i Faipule ia Faimealelei Anthony Fu’e Allen o le Ta’ita’i Komiti.

Na faailoa e le Sui Fofoga Fetalai ia Fetu Fetui Jr ia Afalava e faapea, e le i leva atu nei i le tausaga na te’a nei na faamaoia ai fo’i e le Maota o Sui o ia e avea ma Faatonusili o le Ofisa lava lea a le malo, i lalo o le faigamalo a Lolo ma Lemanu. Lona uiga, e le suia lava le finagalo o le maota e lagolagoina ai o ia e avea ma Ta’ita’i o lea Ofisa taua a le malo.

Na fautua Fetu i le susuga a Afalava e alofa i tagata faigaluega ma taumafai e sii o latou totogi e tusa ai ma le umi o le latou auaunaga. Sa fautuaina foi le molimau ina ia silasila toto’a i le tulaga o lana galuega, atoa ai ma le faigamalo fou lea ua filifilia o ia e tautua ai.

Saunoa atili Fetu e faapea, sa ia maua se ripoti mai le Kamupani Fau Fale o le Pentagon e faatatau i le faafitauli o iniseti faalafua e aofia ai mogamoga, isumu, namu o loo aafia ai le saogalemu o tagata faigaluega i totonu o le fale. I lona talitonuga, afai o le tulaga faaletonu lea o loo i ai le fale, lona uiga e le tatau ona toe fa’aaoga e tagata faigaluega a le malo ma ona ta’ita’i, ae tatua ona fai se auala e foia ai lea faafitauli.

Saunoa le susuga a Afalava e faapea, o le faafitauli i iniseti faalafua o loo fesiligia e afioga i Faipule, e le o se faafitauli faatoa tula’i mai i le taimi nei, ae o le faafitauli ua tele tausaga o tula’i mai, e mafua mai lava i tagata faigaluega a le malo o loo galulue i totonu o le EOB, i le o atu ma la’u atu taumafa i totonu o le Fale.

Sa ia taua atili e faapea, ua tele taimi o taumafai lona Ofisa e ave i ai fautauga i tagata faigaluega,  peita’i e le mafai lava ona latou faautagia le fautuaga. 

“E leai se malosi ia tei matou e taofia ai tagata faigaluega mai le faataunuuina o faaiugae fiafia ai, ae o iina tonu lava lea e mafua ai ona tula’i mai lenei faafitauli i totonu o le maota o le malo,” o le saunoaga lea a Afalava.

Na faailoa e le afioga i le ali’i Faipule ia Vailoata E. Amituana’i i le molimau manaoga mo le maota o le malo i Utulei, i le i ai lea o ni moli e faamalamalama ai le lotoa atoa, ina ia mautinoa e malu puipuia meatotino a le malo atoa ai ma tagata faigaluega o lo o galulue ai i le po e aofia ai Leoleo po o loo galulue mo le leoleoina o le saogalemu o le fale.

Sa fautuaina foi e Vailoata le molimau e silasila toto’a i le isi faafitauli sa ia maitauina i le fale, i mea faigaluega o loo taatitia solo ai i luga o apa ao lea ua mae’a galuega toe faafou sa faatinoina. O lona popolega, atonu o le isi lea mafua’aga e ala ai ona vave na tutulu apa o le fale.

Na fautuaina e le afioga i le alii faipule ia Lavea le molimau ina ia silasila toto’a i le tulaga o vaega e paka ai ta’avale. Ua tele naua taavale ae ua laiti vaega e paka ai, o isi fo’i taimi ua le talafeagai le paka o ta’avale ma ua poloka uma ai le avanoa sa tatau ona fa’aaoga mo isi ta’avale.

Na fesiligia e le afioga i le alii Faipule ia Lua’itaua Gene Pan le susuga a Afalava i le tulaga o le ‘fire system’ i totonu o le EOB e fesoasoani ai i le taimi e tula’i mai ai se mu i totonu o le Fale. Saunoa le ali’i Faipule e faapea, sa faia lana asiasiga ma iloa ai, e leai se ‘fire system’ i totonu o le EOB. O lana fautuaga i le susuga a Afalava, e tatau ona i ai se ‘fire system’.

Na faamanino e Afalava i le Komiti nisi o fuafuaga mo le faaleleia o vaega e pei ona saunoa i ai afioga i alii Faipule. 

I le tulaga o le ‘fire system’, na saunoa Afalava e faapea, e le o i ai se ‘fire system’ i totonu o le EOB, lona uiga a tula’i mai se faalavelave e pei o se mu, e matua aafia lava le saogalemu o tagata faigaluega, peita’i, o lo o latou galulue ai ma ta’ita’i o le malo ina ia mautinoa e foia lea faafitauli i se taimi lata mai.

Na taua e le Faipule mai le motu o Swains Island ia Su’a Alexander Eli Jennings le taua tele o le galuega o loo faatinoina e le Ofisa a le susuga a Afalava, i le tuu faatasia lea o faamaumauga i mea taua sa tutupu i totonu o Amerika Samoa i le tele o tausaga ua mavae, e aofia ai ma le taimi i tua atu o le tausaga e 1900 a o le i sainia le feagaiga i le va o Tutuila ma Manu’a ma le Iunaite Setete o Amerika.

Na lagolagoina e Afalava le saunoaga a le susuga i le ali’i Faipule ia Su’a. Saunoa Afalava e faapea, o le galuega i le faaleleia o le nofoaga e teu malu ai faamaumauga i tala’aga o Amerika Samoa mai tausaga ua mavae, o lo o galulue faatasi ai le ofisa ma sui o le Ekalesia Mamona i Amerika Samoa. 

O se taimi o lenei vaiaso ua faamoemoe e faia ai se feiloaiga ma le afioga i le Kovana sili, atoa ai ma sui o le Ekalesia Mamona, mo le faalauiloaina o le galuega lelei o lo o faatino e nei auauna mo le manuia o le atunu’u.

Na fesiligia e le afioga i le alii Faipule ia Avagafono Vaimaga Maiava le susuga a Afalava, poo i ai sana fuafuaga mo le faaleleia o maota uma a le malo i totonu o le atunu’u, e aofia ai le maota o le EOB. Saunoa le alii Faipule mai Sua e faapea, e taua tele le i ai o se fuafuaga faataoto a le Ofisa, ona ua tele fale o le malo ua tuai ma ua mana’omia le toe faafou.

Na fesiligia e le Faipule mai le Itumalo o Ituau ia Manumaua Wayne Wilson le tulaga saogalemu o le EOB i le taimi nei. Na fia iloa e le afioga a Manumaua, poo talafeagai pea le nofoia e tagata faigaluega faapea ai ta’ita’i o le malo totonu o le fale, a o lea o loo i ai tulaga faaletonu i le soifua maloloina, faapea ai le leai o se saogalemu ona o le leai o se ‘fire system’.

Saunoa Afalava e faapea, o le tulaga lava ia o le EOB e tatau ona toe faaleleia le fale. E le gata ua matua ae ua tele foi faaletonu o loo i ai. O loo i ai konekarate tua o loo galulue mo le toe faaleleia o nisi o vaega o le fale.

Na fia malamalama le afioga i le alii faipule ia Faimealelei i le tulaga o fanua ma meatotino a le malo i Tafuna, poo i ai ni faamaumauga a le Ofisa, i le aofa’i o fale a le malo o loo i ai, aofa’i o fanua o loo lisi atu i kamupani tua, faapea ai ma se vaega tupe e maua mai ai i fale ma fanua o loo lisi atu.

O le faafitauli e pei ona saunoa Faimealelei, o fanua ma fale a le malo o loo lisi atu i tua, ae ua toe lisi atu fo’i e pisinisi nei i isi fo’i pisinisi, ma ua le iloa tonu ai poo fea e alu i ai le tupe o le isi lona lua ua faia.

Na faafetaia e le afioga i le alii Faipule ia Ape Meki Asifoa le afioga a Afalava i lana faaeaea i le itumalo, nu’u, aiga ma le Ekalesia. O lana tautua lea ua mafua ai ona tofia o ia e ta’ita’i o le malo e fai ma ta’ita’i o lea fo’i Ofisa taua a le malo.

Na faafetaia e le afioga a Afalava afioga i faipule e tusa ai o le faatuatuaina o lona tagata faatauva’a mo le galuega. Sa ia taua e faapea, o lona malosi o totoe o le a tautua ai mo le atunu’u ma le malo.