Tu’uaia e Faimealelei le au Tusitala i le faasalalau o tala le moni

Pago PAgo, AMERIKA SAMOA

Na matua avaavau le afioga i le ali’i Faipule mai Aua ia Faimealelei Anthony Fu’e Allen ao faasoa ona lagona le fiafia faasaga i le Vaega Faasalalau, ma ia tu’ua’ia le sese o ripoti sa latou faasalalau I sana faamatalaga I totonu o le Maota o Sui I le 2 vaiaso talu ai.

O lea mataupu e fa’atatau i se talosaga na faaleo e Faimealelei i luma o le Maota mo se avanoa e mafai ai ona aga’i faatasi atu ai Faipule mo a latou tui puipui o le faama’I o le Covid-19.

A o le i faaleo e le ali’i Faipule lona finagalo faasaga i le au Faasalalau I le Aso Faraile ua tuana’I atu, sa ia talosaga i le Fofoga Fetalai mo se avanoa se’i talanoa tu’u sa’o ai i sui o le au Faasalalau, lea sa i totonu o le Maota o Sui i le taimi o le tauaofiaga a le Maota.

Saunoa Faimealelei e faapea, “O saunoaga a afioga i Faipule, e tatau ona outou faailoa i le atunu’u i le upu aga’i i le upu e aunoa ma lo outou faaopoopo i ai o se isi upu, aua o le taimi tou te faaopoopo ai se isi upu i mataupu sa laga e afioga i faipule, ona sese atoa ai loa lea o le agaga o le na fa’aalia ai e le faipule le mataupu, ma tele mai ai faamatalaga a le atunu’u faasaga i afioga i faipule.”

Na faaalu e le ali’i Faipule se taimi e faamatala ai i le Fofoga Fetalai ia Savali Talavou Ale le mataupu na tula’i mai. 

“O le mataupu lea na ou lagaina mo tui a afioga i Faipule, o lea na faatino e afioga i Senatoa i le vaiaso na te’a nei, ina ua talosagaina e le Peresetene o le Senate ia Tuaolo M. Fruean lea avanoa, ma faatino ai loa tui puipui mo Senatoa ma o latou faletua, o se fuafuaga atamai ma talafagai mo sui o le Fono,” o le saunoaga lea a Failelei.

Na teena malosi e Faimealelei ripoti e faapea sa ia talosaga mo se avanoa e faia faapitoa ai tui puipui mo Faipule i se taimi faapitoa, ina ia ese ai lava le taimi ma le nofoaga e faatino ai tui a Faipule, ona o i latou o Ta’ita’i ma Sui o le Fono Faitulafono.

Ae o le faafitauli ua tulai mai e pei ona saunoa Faimealelei, ua avea le le sa’o o le ripoti na faasalalauina e le au Faasalalau ma itu ua tele ai faamatalaga a le atunu’u faasaga ia te ia, ma ta’uleagaina ai lona igoa.

Sa ia faailoa i le Maota e faapea, o lo o i ai mau faamaonia e lagolagoina ai lana faatuiese, na te le i faia ni faamatalaga e pei ona ta’ua e le au Faasalalau. E le gata na ia taua le molimau uma o Faipule, ae o lo o i ai foi le masini pu’e ata a le Maota e o loo maua ai taualumaga a le Maota i le aso sa ia tula’i ma faaleo ai lenei mataupu.

Na faliu Faimealelei i tua i le nofoaga o loo i ai sui o le au Faasalalau ma ia saunoa e faapea, “Afai tou te vaavaai i totonu o le lisi sa faatulaga mai e le Vaega e Puipuia Faama’i Pipisi (CDC), o lo o manino mai ai le lisi o tagata e tatau ona muamua tui i tui puipui o le CODID-19, o i latou nei e aofia ai foma’i, o tagata e muamua tali atu i faalavelave tutupu faafuase’i, atoa ai ma sui o le Fono Faitulafono.”

“Tu’u i lalo i a outou ripoti a’u faamatalaga ia e fai atu,” o le avaavau atu lea a Faimealelei i sui o le au Faasalalau.

“O le mafua’aga lena na ala ai ona ou lagaina lenei mataupu, ona o lea ou te malamalama, e tatau ona aafia afioga i Faipule i tagata e muamua fai a latou tui, ae le faapea o so’u faamaualuga i le atunu’u na mafua ai ona ou talosaga,” o le saunoaga lea a Faimealelei.

Saunoa le ali’i Faipule e faapea, ua mafua ona sii sii lona si’ufofoga e uiga i lenei mataupu, leaga e le mama ia te ia le aafia fua o lona sui faipule i finagalo fa’aalia o le atunu’u, e mafua mai i tala sa faasalalau a le au Tusitala. 

Sa ia taua e faapea, e i ai le aia tatau a le au Faasalalau i lalo o le saolotoga o faasalalauga, peita’i, e i ai fo’i lona aia tatau i lalo o tulaga o saunoaga tu’u sa’oloto i tulaga o faigamalo faatemokarasi.

“Ia outou faaeteete i le faaaogaina o le aia tatau i tulaga o saolotoga o faasalalauga, leaga e i ai le taimi e tula’i mai ai mataupu e faatatau i le faia o tu’uaiga ma faaleaga ai le igoa ta’uleleia o le isi tagata, na ona ou faamanatu atu i le paia o le Ekalesia,” o le saunoaga lea a Faimealelei.

Sa ia toe taua ai fo’i lana saunoaga na lafo muamua i se taimi ua sola e faapea, “o le upu a le palagi, e le o se a’u o se tagata faatauva’a, o le tagata tele.”

Sa ia taua atili fo’i e faapea, e i ai taimi e leoleoa ai i totonu o le maota ona o nisi o mataupu e fia faamalamalama, ae i ai lava fo’i taimi e iloa ai faatoese i afioga i Faipule, “ae o le ave sese e outou o se tala, e le fou le mea lea, tele o taimi e tele mea lelei e saunoa i afioga i faipule, o loo fia faafofoga mai fo’i o matou itumalo i galuega lelei o loo faia iinei, ae o nisi taimi, e na o mea faaletonu lava e tu’u e outou i luga o a outou ripoti.”

Na taua e Faimealelei e faapea, o le tele o taimi e saunoa ai le Sui Fofoga Fetalai i nisi o mataupu taua, peita’i e emo ane lava le ata ua na o mea le lelei ua ripoti i le atunu’u.

Ae pei ona taua e le Samoa News i lana ripoti, o le afioga lava i le ali’i Faipule ia Faimealelei na tula’i ma talosaga i le Maota mo se avanoa e faapitoa ai se nofoaga ma se taimi e faataunuu ai tui mo afioga i Faipule.

Na taua e Faimealelei e faapea, ua mae’a ona ia molimauina nofoaga ma faleie o loo faagasolo ai tui mo le mamalu o le atunu’u, e le fia vaavaai atu i faalala mai afioga i Faipule  i le muga la i lalo o Faleie e faatalitali ai taimi o a latou tiute. O le mafua’aga lena na ia talosagaina ai loa le Sui Fofoga Fetalai e faatulaga se galuega e faatino faatasi ai galuega mo le manuia o le galuega.

E toatele le atunu’u na fa’aalia finagalo le fiafia ma inoino ina ua latou faitau i le ripoti e faatatau i le finagalo o le ali’i faipule sa fa’aalia e faatatau i lenei mataupu. Na taua e nisi e faapea, e le i filifilia afioga i Faipule i le nofoa ina ia faamuamua i latou i soo se mea faatino lava i totonu o le malo. E le gata o i latou o Faipule na filifilia ae o i latou fo’i o auauna

Na taua e le isi sui o le atunuu i faamatalaga i luga o upega o taifalagi e faapea, “e sili atu le matutua o Tama ma Tina o loo faalala i lalo o le fale ie. A o ai la oe e te manatu ai e faapitoa le nofoaga e faia ai lou tui ao lea e faalala Tama ma Tina matutua i le ova i le ta’i 2 itula mo le tau faatalitaliina o a latou tui.”