TALA I VAIFANUA

Pago Pago, AMERIKA SAMOA

PUIPUI MALU TRADEWINDS I LE TAIMI OLE NOFOVA’AVA’AIA

O le tatou masani I le fa’afeiloa’iga o tatou aiga e malaga mai i le uluai malaga ua fa’atulaga e toe fo’i mai ai o tatou tagatanuu o opea i fafo, le a le mafaii ona faia lea e pei ona masani ai aiga, pe a tulaueleele mai va’alele nei ma latou pelega. O le a oo atu fo’i i le avatua o i latou uma e nofoia le faletalimalo o le Tradewinds mo le nofova’ava’aia, o le a fa’apea lava ona fa’aauau i ai le malu puipuia mai o i latou o lenei pasese mai i o latou aiga o malaga mai I le ulua’i va’alele ua toe fa’afo’i mai ai nisi o le atunuu, ia Ianuari 29, 2021.

O i latou ua mae’a fa’amautu e malaga mai e to’a 160 i latou, ma e to’ai taunuu loa le latou malaga ma aumaia sa’o lava mai le malaeva’alele i le faletalimalo o le Tradewinds nonofo va’ava’aia ai mo le isi 14 aso mo suesuega ma tuiga suesue o le Covid-19 fa’ato’a fa’ataga ai i latou e asia ma mafuta i o latou aiga.

Talu mai Ianuari 18, 2021 ua nofova’ava’aia muamua ai i latou uma nei o le a malaga mai i Hawaii i le White Sands Hotel ona fa’ato’a tu’ua lea e i latou le setete ia Ianuari 29, mo Amerika Samoa lea fo’I o le a toe nofova’ava’aia ai mo le isi 14 aso.

O se tala lea a le tamaitai Fomai Dr Anaise Uso, o le Matagaluega o le Soifua Maloloina a le tatou Malo.

O lona uiga o i latou uma o lo ua foufou mai ua nofoia nei e i latou uma na le faletalimalo o le White Sands i Hawaii.

AOFIA TULAFONO FOU VETERENI - PENEFITI MO AOGA MO NI TOMAI I GALUEGA

Ua fa’ailoa le agaga fiafia o le tatou Faipule i le Konekeresi Uifa’atali Aumua Amata  ina ua sainia e fa’atulafonoina se tasi o pili sa ia auai i le taumafaiga e una’i ma pasia, le taliaina o le Matagaluega o le Veterans Affairs e fa’ataga ai latou latou fanau o galulue ma a’o’oga, ina ia galulue i Ofisa o Sui o le Konekeresi o le Malo Tele,

O le aiaiga tamau o lea pili ua aofia i le pili ua pasia nei ma ua mae’a sainia e fa’amaonia le fa’atulafonoina ia Ianuari 05, 2021.

O e na galulue fa’atasi ina ia taumafai e pasia lenei pili e aofia ai Senatoa Ron Wyden o le District of Oregon, John Boozman Region Alaska, Rep Peter DeFazio o le District of Oregon, Collin Alfred  District of Texas ma Aumua Amata Coleman Radewagen  o Amerika Samoa.

“O lo’o tele na’ua le sao o tatou Fitafita Tuai i tofiga tau ta’ita’i o Malo, o se tasi lea o auala ua pasia nei e le pili lea, e mafai ai ona fa’aaogaina aiai lo latou tomai saili i tofiga uaagava’a ai ma e mafai ai ona fa’aaogaina fo’i i latou e sui totino o le Konekeresi o lo’o tula’i mai i o latou itumalo, setete ma teritori, i galuega i o latou ofisa,” o se fa’amatalaga lea a Uifa’atali.

O le tausaga 2009 na manatu ai le vaega faufautua fa’aletulafono a le VA, o le mafai ona fa’afaigalouegaina o Vetereni i ofisa o Sui o le Konekeresi, o se mea ua sasi i le fa’auigaina o le tulafono, ma sa latou taofia ai loa lea fo’i avanoa mo Vetereni fia galulue i Ofisa o Sui i le Konekeresi.

Sa fa’atagaina lava e le VA le fa’afaigaluegaina o Vetereni i Ofisa o Sui i le Konekeresi a’o le’i taofia lea avanoa i le tausaga 2009, ma sa to’atele lava sui vetereni na fa’aaogaina i Ofisa o Sui i le konekeresi i lena vaitau.

“O le taumafaiga lenei ua leva lava na tatau ona toe fa’asa’o mai, ma fa’atulafonoina e pei ona i ai nei. O lo ua matou galulue atili ina ia mautinoa ua tautuaina Fitafita Tuai poo Vetereni ma ia maua uma fo’i e i latou penefiti e tatau ona latou mauaina, ina ua mae’a mai a latou tautua sa fitaituga ai. O le a toe talia lelei lava e a’u nisi o la’u aufaigaluega o le a filifili, sa ou faia muamua fo’i a’o le’i taofia, ma o le a ou toe faliu fo’i e fa’aaoga mai sui vetereni aua o lea fo’i ua toe fa’ataga mai,” o se tala lea a ,e Senatoa o Oregon, Ron Wyden.

“O le fa’ateleina o i latou ua masani ona galulue ma fa’atino tiute e tusa ai o le tulafono, o se tasi lea o mea lelei tele pe a o fa’atasi fo’i ma lo latou toe maua o avanoa e a’o’oga ai mo le fa’aleleia atili o latou tomai ma maua tusi pasi maualuluga. O le fiafiaga ina ua mafai ona sainia e fa’atulafonoina lea avanoa mo vetereni o nisi o latou penefiti tumau.” O se tala aloaia lea a Boozman mai Alaska.

“Ou te le mailoa se isi avanoa lelei e mafai ai ona tatou fa’ataua ma taualoa o tatou fitafita tuai, o nisi sa matua iloga ona tigaina i le tautuaina o le tatou Malo Tele i taimi o vevesi ma fevaevaeaiga. Ou te mautinoa fo’i e aotelega i tatou uma o sui o le Konekeresi ma le Senate a le Malo tele i le fiafia aua ua tutusa lelei o tatou fa’anaunauga ia taualoa le auaunaga a tatou vetereni ma toe avatu ia i latou nisi o nei penefiti taua,” o le fa’asoa lea a DeFazio mai Oregon.

I le Ofisa o Uifa’atali e to’afa lelei Vetereni Samoa o lo’o tautua ai. O le Pule o le aufaigaluega i le Ofisa autu i le laumua Fa’avaina Tavai - Yahn, o le pule o le Ofisa fa’alotoifale le afioga le matua Pulu Ae ae Jr ma le susuga le Ofisa o le VA e gasolo atu i ai i latou e fia maua le fesoasoani i a altou penefiti VA - le afioga Tago Seva’aetasi . 

O le sui fo’i ua feagai nei ma fesoasoani malosi e talosagaina penefiti a le VA mo i altou e mana’omia le fesoasoani Peter Anaya, o se talavou VA foi. O lona uiga o le auai ai o le tatou Faipule i le talosagaina o nei penefiti mo le vasega o Vetereni, o se mea ua talitonu a’ia’i i ai lona finagalo, o lo’o tautuaina ma taualoa le auaunaga a tatou fitafita tuai uma lava.

FAATUATUAINA KOVANA FUAFUAGA MALAGA MAI A I LATOU NA OPEA I FAFO

I le taimi nei ua toe fa’ailoa mai e le afioga Kovana Lemanu Mauga, “Aua le toe popole, le mamalu o le atunuu, ua alva tapena le matagaluega o le Soifua Maloloina, le vaega a le Malaeva’alele ma i latou e tautuaina le ulua’i malaga e fa’ato’ai mai o e uma ua loa ona toe fia fo’i mai ae sa fa’atuai ona o le tepnaga o nofoaga ma le tautua eseese e nafa ma i latou pe a tulaueleele mai. Ua ou mautinoa, o le a sefe lava le atunuu mai ni fa’aletonu pe afai o le a tausisia e tagata uma lava le fa’asa ua faia nei, ia le feiloa’i muamua ma aiga, se’i vagana lava ua mae’a tuuina mai i latou e o atu i aiga.”

“Ou te iloa ua mafai ona gafatia e le malo ona aumaia o tatou tagata e aunoa ma se a’afia o se tasi i le gasegase faigata o le Coronavirus ona o lea ua lava tapena mea uma, ia leai lava nisi e feso’ota’i tele ma o tatou tagata malaga mai.”

O le fonotaga ma le Komiti Fa’afoe o le Coronavirus sa matua faailoa ai e le Senate lo latou popolega ina nei ulufale mai lava le Covid-19 ona o le tatala mai o malaga a nai o tatou aiga nei ua leva na fia toe fo’i mai i fanua.

“Tau ina tatou tatalo ma onosa’ia lo tatou atuatuvale i le taimi nei, ae se’i fa’amalie fo’i finagalo o nai o tatou tagata ua leva ona fia taliu mai. Ua tatau fo’i ona faia se fa’aiuga lelei mo i latou aua ua mautinoa lava ua mae’a tapena le aufaigaluega fa’atulaga mo le tautuaina o i latou i lo latou taunuu mai ma nofo va’ava’aia ia mautinoa e le o a’afia se tasi o i latou i le fa’ama’i.”

“O le mautinoa uma o fa’amaumauga o mea sa i ai i latou, ma le aumaia o fa’amaumauga uma o le a fesoasoani malosi lea ina ia le maua lava se tasi o le atunuu i lenei fa’ama’i oti.” O se toe tali lea a Kovana Lemanu i atugaluga uma sa fa’aalia e sui mamalu.

“E tatau ia i tatou uma ona usita’ia fa’atonuga uma i le tautuaina o lea aumalaga. Ua lava tapena fo’i i tatou i tulaga o foma’i ua fa’afaigaluega ina ia mataituina lava le aumalaga lenei i aso ta’itasi, e le gata iinei ae o Hawaii fo’i. Ua ou mau fa’atuatuaina fo’i le tatou tapenaga  ua mae’a fa’amautu nei mo lea aumalaga, ma e tatau lava fo’i ona tatou faia se’i iloa patino ai le tatou fuafuaga ua agava’a mo nisi malaga mulimuli mai.”