TALA I VAIFANUA

Pago Pago, AMERIKA SAMOA

AOFIA SUI O PISINISI & TAGATALAUTELE TOFIGA KOMITI FA’AFOE O LE COVID-19:

O sui mamalu ua tofia nei e le afioga Kovana Lemanu Mauga ina ia tautuai le Komiti Fa’afoe o le Coronavirus ua aofia fa’atasi sui ma fa’auluuluga o Matagaluega o le Malo o Amerika Samoa, ae maise nisi mai le mamalu lautele ma Pisinisi fo’i i le atunuu. O nei tofiga sa faia lava e le tatou Kovana ina ua amatalia lana pulega ia Ianuari 03, 2021.

Ua maea fa’asalalauina lea i lana tusi fa’alaua’itele mo le silafia e le mamalu lautele ma le malo ina ia faautagia:

• Lutena Kovana Talauega Eleasalo Ale tofia fa’apitoa e avea ma Taitaifono.

• CEO LBJ Hospital Faumuina John Faumuina

• Fa’atonu le tumau  Matagaluega o le Soifua Maloloina - Motusa Tuileama Nua

• Fa’atonu o le Ofisa o le Medicaid Agency Sandra King Young

• Fa’atonu le tumauPuipuiga o le Saogalemu Fa’alotoifale - Samana Semo Ve’ave’a

• Loia Sili le tumau- Fainu’ulelei Alailima Utu

• Failautusi Mataupu Tau Samoa -  Mauga Tasi Asuega

• Fa’atonu le tumau o le Pulega o Uafu ma Malaeva’alele - Chris King

• Fa’atonu le tumau o le Tupe Fa’asoa a le Malo - Catherine Saelua

• Teutupe le tumau - Malemo Tausaga

• Fa’atonu le tumau Tagata Faigaluega a le malo - Lynn Pulou Alaimalo

• Fa’atonu le tumau Matagaluega o A’oga - Talauega Samasoni Asaeli

• Fa’atonu le tumau Human and Social Services Muavaefa’atasi John Suisala

• Fa’atonu o le Veterans Affairs Clinic Dr. Fred Uhrle

• Peresetene o le GHC Reid Olivia Reid sui o le mamalu lautele o le atunuu.

• Taitaifono o le Asosi a le Aufaipisinisi - Chamber of Commerce Ella Gurr – sui o le mamalu lautele.

• Pule fa’alotoifale o le Hawaiian Air Tuli Fruean

• Fa’atonu o le Ofisa o le Malo I Hawaii - Tuiafono Vaiuli Sua

• Ginger Porter o le University of Hawaii sui o le Mamalu Lautele

• Pule o Tagata Faigaluega Ofisa o le Kovana - Tuimavave Laupola.

O le latou ulua’i fonotaga na faia lea i le aso Gafua na malolo ai, Ianuari 4, 2021, ma sa leai se tasi o le au fa’asalalau sa auai i lea fonotaga, ae na mafai ona maua mai fa’amaumauga o mataupu na talanoaina, mai le Pule o le aufaigaluega a le Kovana ua tofia, Tuimavave Tauapai Laupola.

Sa le taliaina e Koavana Lolo Moliga se sui o le Mamalu lautele o le atunuu i lana tofiga o le Komiti Fa’afoe o le Coronavirus talu ona fa’atuina lea Komiti, peita’i e fa’afetaia le suiga ua va’aia i lenei nofoaiga. O i latou ua tofia, o le a mafai ona maua ai se leo o le mamalu lautele i lea komiti ma aiaiga fo’i e soalaupule mo le aga’i i luma o aiaiga tamau o le fa’asa, ona o le fa’ama’i faigata ina nei ulufale mai ma a’afia ai le soifua o le atunuu.

Ua le mautinoa foi pe toe maua ni siaki a sui totino o lea Komiti Fa’afoe aua sa totogia ta’i $1,000. i le masina e Kovana Lolo Moliga lana lea komiti faafoe o le Coronavirus. Fa’ailoa mai e Tuimavave Laupola, “Ua leai se tala e totogia lea Komiti pe leai fo’I mai le afioga Kovana Lemanu Mauga.

FOAI ATOA & MOKIHANA RIPLEY - AMERICAN SAMOA RED CROSS & HOPE HOUSE FATUOAIGA:

O le taeao ananafi, Ianuari 11, 2021, na oo ane ai le susuga le ali’i pese lauiloa o Atoa Ripley ma lona faletua o Mokihana Ripley i le Ofisa Fa’asalalau o le KHJ 93 ina ia mafai ona fa’alauiloa ma taua’ao aloa’ia ai le la’ua foa’i na fa’atulaga mo le Koluse Mumu.

O le Koneseti a le alii pese lauiloa sa fa’atautaia i le Gov Rex Lee ia Tesema 26, 2020 lea sa aoina ai lea seleni ma ua agatonu ai ona ia foa’i mo le fa’amoemoe e fesoasoani tele lea i galuega fesoasoani a le Koluse Mumu o Amerika Samoa.

O lea foa’i sa oo ane ai le susuga le Taitaifono Vaito’a Hans Langkilde, ina ia talia faapitoa lea foa’i e $1,000. ma le agaga fa’afetai.

O le tina o Mokihana Ripley sa ia taua’aoina le foa’i lea. Na talia fa’afetaia e Vaito’a ma ua saunoa fo’i o ia e tusa o galuega a le Koluse Mumu o Amerika Samoa, “E pau lava lea o le fa’alapotopotoga e ta’imua mai lava ana fesoasoani i so’o se taimi e pagatia ai se aiga ae maise fo’i o le atunuu atoa i taimi e lutia ai i ni faalavealave fa’anatura. E 24 itula lava le latou mataituina so’o se aiga e lutia i se fa’alavelave, e latou te foa’i lava mo i latou.” 

“Pe afai o i ai a latou seleni, e maua fo’i fesoasoani tupe e faaopoopo atu i nisi o oloa mo le fatuaiga o lo’o latou fa’asoaina atu i e ua pagatia. O ituaiga foa’i na o lo’o maua mo so’o se aiga e fa’atoga atu mo se fesoasoani pe afai o lo’o ua a’afia i sologa, lologa ma mafui’e ae maise o le mu o latou falenofo ma ua alu atu uma ai ma latou mea totino e fa’aaoga e momoe ma nonofo ai i aso ta’itasi.” O se toe talanoa mai lea a le taitaifono o le Koluse Mumu i Amerika Samoa, Vaito’a Hans Langkilde.

O le foa’i mo le Hope House i Fatuoaiga sa faia fo’i lea i le taeao ananafi. Sa oo ane fo’i le Taitaifono o le Komiti Fa’afoe o le Hope House, Rep Larry Sanitoa, ma sa ia taliaina fo’i le meaalofa mai le ali’i pese lauiloa ma le faletua, Atoa Ripley ma Mokihana Ripley.

O le aotelega o lea meaalofa mo le Hope House e $2,000. ma sa fa’aalia e Mokihana, “Ona o le va’ai i le galuega i Fatuoaiga, o iina o lo’o tausia lelei ai matua matutua  ma nisi e mana’omia ona tausia lelei lava ona o gasegase tumau o maua ai. O se auaunaga e agaga tele i matua ma o le afuaga lea e fia faia fo’i se fesoasoani taua mo i latou o e tausia fa’apitoa ai, ia oo atu se aoga o i ma’ua nei ma le tama, e fa’aaoga tatau mo le tausiga lelei o Matua Matutua.”

Na matua talia ma le fiafia e Rep Larry Sanitoa lea foa’i, ma ua fa’afetaia i la’ua ona o le agaga lava lea o so’o se Samoa, e va’aia loa matua matutua e nutimomoia lava lagona, ma ua foa’i ai ma le loto alofa ina ia tausia lelei i latou ma le fiafia e le aufaigaluega.

Ua ia saunoa fa’afetai e avea ai ma sui o Epikopo Brown ma le aufaigaluega uma lava a le Ekalesia Katoliko ae maise le nofoaga o fa’amoemoega. Ua fesiligia nei le ali’i pese ma le faletua, pe ua sauni e malaga ese atu, ae tali mai le ali’i pese, “Leai o lea ua ou manatu, o le a faia se isi sailiga tupe, e ala lava i a’u koneseti, ae o le a fa’atutu le meaalofa e foa’i mo le American Samoa community Cancer Coalition, ina ia tufatufaina atu ia i latou uma e faapoia i le Kanesa. O le ma’i lea ua maliliu ai le uso o si matou aiga, le tina o Starr Schuster ma lona to’alua, Su’a Carl Schuster ma o lo’o ma’ua fa’anoanoa ai lava i lena tulaga. Ua faia ai le ma’ua filifiliga, o le a toe faia se isi sailiga e le o toe mamao, ae se’i foa’i mo le ASCCC ina ia fesoasoani i nisi o lo’o ua lutia i le Kanesa i Amerika Samoa nei.”