Foa’i Neil’s Ace Home center — Cancer Coalition $31,100

Pago Pago, AMERIKA SAMOA — O le foa’i ua mafai ona tuufaatasia mai e le Neil’s ACE Home Center ma a latou pa’aga o tagata fa’atau uma i lo latou faleoloa tele i Malaeimi na fia foa’i mo lea meaalofa na aoina, ua maua ai le aotelega e $31,100. O le foa’i sili lea ona maualuga talu mai ona faataunuu e le Pisinisi o lenei galuega tele ma le lelei mo i latou uma ua po’ia le soifua e le Kanesa. O Tesema 30, 2020 na fa’ataunuu ai lea foa’i aoga.

O le aotelega o foa’i sa amata mai ona tuuina le faiva i tamaitai kesia o lo’o tautuaina le mamalu o e fa’atau i le Ace Neil’s Home Center i Malaeimi, latou te fesiligia latou tagata fa’atau pe fia faia se foa’i mo le sao lenei ina ia fa’aluaina e le Ace Neil’s Home Center se aotelega o latou foa’i e maua mai, ona fa’ato’a taua’aoina lea i le American Samoa Community Cancer Coalition (ASCCC) latou te tufaina atu ia i latou ua po’ia i lenei gasegase fita, pe a talosagaina se fesoasoani.

O le foa’i talu ai i lenei lava fo’i vaitau, sa maua ai le $26,000. Peita’i na fa’ailoa e Nadine Solofa Taufa’asau, “O le tala na fai i le au galulue, o le a togi atu lava le $15,000 e sailia mai, afai ae maua, vi’ia le Atua i le agaalofa o tagata lautele.”

O lana tala fiafia sa ia fa’ailoa ane i sui mamalu o le ASCCC na auai ane mo lenei foa’I taua, “Fa’afetai i le loto alofa ma le a’ao foa’I o le atunuu sa latou tuuina mai meaalofa lea ua fa’aluaina e le Ace Neil’s Home Center ma ua maua ai lenei seleni mo i latou o i ai le mana’omia pe a oo ina gasegase i le Kanesa.”

O lenei foa’i sa taua’aoina lea i le Taitaifono o le ASCCC, Taotasi Archie Soliai ma le tasi sui mamalu fo’i o le Komiti Fa’afoe a le ASCCC, Dr. Robin Faumuina. O saunoaga o le agaga fa’afetai sa fa’alogoina, ma ua fa’afetaia ai pea lenei Kamupani i tausaga ta’itasi latou te foa’i ai ma le loto alofa, fa’atasi ai ma latou pa’aga mamae, o i latou e fa’atau i le latou faleoloa i vaitau fiafia o tausaga ta’itasi e afua mai le 2009, ma ua faailoa mai ua silia ma le $100,000.+ le aotelega o lenei foa’i pe a toe fa’aopoopo mai uma.

O le fa’asoaina atu i e gasegase o lenei tinoitupe, e ao lava ina e talosaga atu ae ua i ai fo’i le Facebook Page a le ASCCC e te fesiligia ala e maua ai le pepa talosaga, i le taimi lava e fa’ailoa ane ai e le foma’i ia te oe ua e gasegase i le Kanesa ma ua e iloa lelei, ua e mana’omia se tinotupe e fesoasoani i au talavai ma togafitiga o lou gasegase.

“O LE ALOFA E TATAU ONA TUFA ATU”, FOA’I PACIFIC INDEPENDENT DISTRIBUTORS & PA’AGA:

O le vaitau o le tausaga fou, e faia ai e le Pacific Independent Distributors Inc. ma ana Pa’aga o Kamupani e sapalaia mai latou oloa, le meaalofa sili ona taua ia latou iloa, e aoga mo pepe fou o le tausaga fou ua aulia ma le fiafia e tagata uma. Ua le ese la lenei fo’i tausaga, ua filifili le PID Inc ina ia latou foa’i mo le pepe muamua lava e soifua mai i le tausaga fou se meaalofa fa’apitoa, ae saunia ese fo’I meaalofa mo isi pepe uma o le a soifua mai i lea lava aso.

E lua pepe na soifua mai i Amerika Samoa ia Ianuari 01, 2021, peita’i ua muamua to’ai taunuu mai le va’a o le tamaitai lalelei o Mao Lili Baby. E le’i filifili matua i se suafa o le tamaitai lalelei ma ua fa’aigoaina pea o ia i le suafa o lona tina i le taimi nei.

Ona ua vevesi le malo e faia le sauniga fa’apitoa e fa’au’u ma fa’atauto ai tatou ta’ita’i, ua le maua atu ai Baby Mae Lili i le maota gasegase, ae ua le tu’ua ai le taua’aoina o le meaalofa fa’apitoa ma ua fa’aoo atu i lona aiga i Leone. O ona matua o Mao Lili ma Zhang Chao Jun mai Leone ma o faipisinisi i la’ua.

O le pepe lona lua o le ali’i o “Lome Sefo” lea ua fa’ailoa mai e na’o se igoa e tuuina mai i le taimi nei, ona e le’I filifili fo’I le tina ma le aiga, Salome Sefo mo se igoa o le tama. Na soifua a’e Baby Lome Sefo i le itula e 10:55 i le po Ianuari 01, 2021. O lona mamafa na fuaina ina ua soifua mai e 7lb 15oz

O lo’o i ai pea i la’ua i le maota gasegase i le taimi na foa’ia atu ai le la’ua meaalofa mai le PID Inc ma le Pacific Elegance fa’apea fo’i ma latou pa’aga o Pisinisi e Sapalaia oloa tau pepe mo lea kamupani. E le gata i meaalofa mo le pepe, ae ua i ai fo’i ma le ato mo le Tina o pepe, ina ia tausia lelei o latou tino i oloa ua fefaataua’ia mai e le PID Inc.

E ese mai lea foa’i, ae o le aso Lua Ianuari 5, 2021, na toe aga’i atu ai fo’i le aufaigaluega mamalu, o sui o le Pulega ma le Aufaigaluega a le PID Inc ma latou pa’aga ina ia fa’ao’o atu se meaalofa ua saunia lelei mo Ali’i Foma’i ma Tamaitai Tausima’i, uma lava ua atofa mo le tausiga o gasegase i le Potu o pepe fou, OBGyn Unit, Labor Unit ma le Potu o Tina Failele o le atunuu. Ua aofia ai i lea foa’i ma foma’i o lo’o va’aia tamaiti laiti i le Potu Talavai ma le Potu Taofia o le Piliati, fa’apea ma le Tamaitai Tausima’i Taiulu o Tausimai o Simamao Tuatoo.

I le aotelega o nei meaalofa e 35 i latou uma, ua mafai ona taua’aoina atu latou Pepa e Taumamafa ai ma latou aiga e $100. lona aoga i le fale’aiga o le Sadies by the Sea. Lona lua ua tapena fo’i ma latou afifi tetele o sapalai o faleta’ele, o oloa o lo’o fefa’ataua’i atu e le PID Inc. ma le Pacific Elegance fa’apea ma latou pa’aga fa’apisinisi o lo’o sapalaia mai oloa gaosia lelei ma le mau fa’atuatuaina e aoga i le soifua laulelei o tagata e fa’aaogaina.

Talu mai le tausaga e 2016 ua tapena ai pea e le PID Inc, ma ana pa’aga le kamupani tele a le Kimberly-Clark® lenei faigamaeaalofa mo pepe o le tausaga fou e fesoasoani ai i matua ma aiga mo le tausiga o le oloa a le Atua ua foa’ia mai mo i latou i lea aso, o se amataga fou. O meaalofa taua mo pepe o le ituaiga Diaper po’o napekini gaosia fa’apitoa o le ituaiga lelei tele o le “Love.” Ua igoa sa’o lava lea ituaiga napekini i le agaga na gaosia ai.

O le avatua o la o nei meaalofa ua fa’aauau pea lava, ma ua fa’asolo atu ina latou sapalaia fo’i ma le ulua’i masaga fa i Amerika Samoa, o tamaitai uma, o alo e fa’asino ia Sokimi ma Filomena Sokimi o Iliili ma Fagaima.

O lea fo’ai mo le masaga 4 sa faia mo le tausaga atoa, peita’i, ua talanoa mai le tina o Filomena, e le faigofie ona soso’o le fau ma le fau i le soifuaga o le fanau, ona o lea ua mae’a lea tautua matagofie ma le alofa sa ia maua mo le tausiga o si ana fanau. I le taimi nei, ua nofo Filomena mai le galuega, ina ia mautinoa ua tausia lelei le fanau. Peita’i o loo saili fo’i se galuega a le tama o le aiga.

Fa’afetaia fo’i e ia le agagalelei ma le magafagafa o le Malo ona o le fesoasoani mo le fanau e ala i le WIC, lea ua maua ai pea le tausiga o le fanau i masina ta’itasi. “E le o mana’omia se tele o ni mea, ae mautinoa, o le Huggies Love latou o le napekini sili ona lelei, e le vevela mo fanau, e matua anagata ma e le liki foi pe a si’isi’i pepe, peitai, e le taugofie. Fa’afetai tele mo le agalelei ma le alofa ua iloga e lenei fanau, talosia ma tuu atu pea i le Atua, ia ola ma ia aoga nei fanau i nisi, e pei ona alofaina lo latou ola mai se’ia oo lava i le atoaga o le latou tausaga, e ala i la outou foa’i alofa PID Inc.” O se tala lea ma loimata o Filomena Sokimi.

O le foa’i lea sa fa’ataunuuina i le aso Lua, Ianuari 05, 2021 a’o loma le atoaga o le ta’itasi tausaga o le masaga tamaitai e to’afa Ianuari 07, 2021.