TALA I VAIFANUA

Pago Pago, AMERIKA SAMOA

FA’AUMI ITULA TALAI AI PISINISI I PO TA’ITASI – SUIGA FOU O LE FA’ASA CORONAVIRUS:

Mai le ulua’i aso o le nofoaiga a Kovana Lemanu P. Mauga ma Lutene Kovana Talauega Eliasalo Ale, ae fa’asalalau fa’alauaitele mai ai loa ma tusi faalauaitele mo le silafia e le aufaigaluega a le Malo, ae maise o tagata lautele.

I le poloaiga fa’asa o le COVID-19 ua fa’atulaga ai e tatala ai faleoloa ma pisinisi mai le 5:00 i le teao se’ia oo i le 12:00 i le vaeluaga o le po. Ua le toe tapunia nei pisinisi i le itula e 9:00 e pei ona masani mai ai i le 2020. Peita’i sa ave le fa’atagaga i le Kamupani I’a a le Star Kist ina ia fa’afoea ai pea latou galuega e pei ona masani fa’atulaga ai i aso ta’iasi a’o le’i sofa’ia e le Coronavirus le lalolagi ma atunuu tuaoi o i tatou nei.

O e taofia sa i ai i feoa’iga a taavale la’u pasese o pasi ma ta’avale laiti la’u pasese ua toe soloia nei.

Ua toe fa’atulaga nei fa’alemasina le fa’asa e pei ona amatalia ai e Kovana Lolo Moliga, ma suiga nei ua lisia. O lona uiga o le isi suiga o le a toe fa’ailoa mai o le a’o le’I pasia Ianuari 31, 2021. O lo’o fa’amalosia pea lava fa’aulagaga ole fa’asa i le Code Blue e pei ona masani ai.

Ua taofia fo’i ni malaga a le Hawaiian Air mo le masina atoa se’ia oo ia Fepuari 01,2021. Ua taofia pea lava femalaga’iga ma Samoa i le taimi nei, ae o le a va’aia toto’a pea lava, se’ia oo ina maea le fa’aletonu o tau a’afia ai Samoa i le Covid-19.

O le a fa’aauau pea lava ona talosgaina mai avanoa e ulufale mai ai nisi i le Teritori, ma e fa’auia fo’i lea talosaga i le Ofisa o le Loia Sili. O le taimi nei, o le a fa’auia le Ofisa o le Loia sili mo le latou fa’amaoniga, ae o le fa’atagaga e ulufale mai ai so’o se tasi ua fitaitonu lea ma le fa’aiuga a le Kovana Sili.

O isi mea uma na fa’atulaga mo le fa’asa ua taoto ma fa’amalosia e pei lava ona i ai.

TAPENA TAUPOU MANAIA TALA’AGA O “LEAFATULAGI” POLOKETI A LE HUMANITIES

O le afiafi o le aso 29 o Tesema, 2020 na faaalia ai e le Taupou Manaia le latou sao mo le poloketi sa fa’atulaga ma taua’aoina atu e le Amerika Samoa Humanities ia i latou e fa’atino ma pu’ea ma ia fa’amaumau.

O lea faaaliga tele sa matua matagofie aua ua ofona e le Taupou Manaia latou e fa’atinoa e ala i siva fa’asamoa e agatonu ma le pese na fatuina e fa’amau fa’ailoga ai pea le soifua o lea tamaitai Taupou, o le augafa’apae a le aiga Sa Seumanutafa o Apia, e Laumua o Samoa.

Ua fa’ailoa mai o lea pese sa fatuina e le tausoga o Leafaitulaga, Iesivi Jessie Tuiletufuga.

O lea afiafi na tomua mai le fa’aaliga a le taupou Manaia i a latou siva matagofie na tapena e fa’amatafi ai le latou fa’aaliga. O le latou toniga na ulufale mai ai o le lanu pa’epa’e e amatalia ai le fa’amoemoe e foliga mai o se sauniga lotu mamalu. O latou pesega muamua fo’i sa vi’ia ai lava le Atua, ma sa matagofie i le maimoaga a le mamalu na matua fa’atumulia ai le Gov. Rex Lee Auditorium i lea afiafi.

Ua avea fo’i lea fa’amoemoe ma se fa’atasiga e fa’amanuia ai le tausaga fou e i latou uma sa auai, o le to’atele lava o le pa’ia o matua ma aiga uma o e na fa’afiafia, o tamaitai lalelei ma le talavou lava. O le laina pito aluma lava o le fanau e amata mai i le tolu tausaga, fa ma le lima tausaga le matutua. O i latou fo’i nei e matua malomaloa ai le aofia pe a oo ina mae’a fa’afiafiaga e tapena mo le ausiva laiti na.

O le tala’aga o le tamaitai o “Leafaitulagi” sa tula’i ai sui pito i matua o lona aiga o lo’o soifua ma alaalata’I I Amerika Samoa nei, le susuga Fa’au M. Seumanutafa ina ia fa’alauiloa. “Na soifua a’e Leafaitulagi ia Iulai 14, 1912 i Vaisigano i Apia. O lona tama o le afioga Tu’isila Faitala o Mutiatele, Aleipata  a’o lona tina o “Eleitino” Vaopunimatagi  Seumanutafa  o Apia, Samoa.”

“O le tua’a o lona tina o afioga Seumanutafa Moepogai o Apia, o lona tina matua o Fa’atulia I’ina Lau’ie o Lealatele i Savaii. O le to’alua na filifilia e “Leafaitulagi” e nanau i ai lona lofo ma lona alofa, o le ali’i mai Toga e pei ona ta’ua i le pese ma le vi’i na saunia e le tusi pese. O le atali’i ia o le nopele mai Tonga ma ia lona suafa o Nopele Havea Lahi Tu’i Ha’ateiho mai le gafa o le aiga Sa Ha’ateio i Tongatapu, 1933.”

“Na maliu le aloali’i Tonga i le tausaga 1962, le tausaga fo’i o le Tuto’atasi o Samoa, ma e mautinoa e tele fo’i mea na fa’atino I le Laumua o Apia i Samoa i lea vaitau, ae ua fitoitonu ma le tausaga o le nofo fa’anoanoa o Leafaitulagi. Peita’i sa nofo lava Leafaitulagi mo le toe sauniga o lana manemea. Ua atoa le 68 tausaga o Havea i le taimi o lona maliu.”

“O le mafutaga lenei e leai se la’ua fanau. Ua fa’apea fo’i ona i ai le mafutaga a Matua a Leafaitulaga, e toatasi lava Leafaitulagi e leai sona uso po’o sona tuagane. I le tausaga e 1936 na maliu ai lona tina ma toe fo’i mai ai le tamaitai i le sauniga o le maliu o lona tina, ma sa avea ma se mea e fa’anoanoa tele ai o ia.”

“Sa nofo mamalu lava le tamaitai o Leafaitulagi i Ha’ateiho, Tongatapu ma maliu ai ina ua tu’ua le mafutaga e lona to’alua, le aloalii mai Tonga i le tausaga e 1962. Fa’ato’a maliu Leafaitulagi i le tausaga e 1980, ma lagomau lona tino i Ha’ateiho, Tongatapu, e leai fo’i ni o la’ua alo.”

I le tausaga e 1929 i le vaega o Fa’amasinoga a Samoa i Apia, ua fa’amauina ai le Pule o le suafa Seumanutafa ia Vaopunimatagi, lea fo’i sa avea ma Taupou a lona aiga, “Eleitino” Vaopunimatagi Seumanutafa Moepogai - Faitala. Na maliu le tina o Afaitulaga i Apia 1936 ma ua lagomau nei o ia i le fanuatanu i Maagiagi.

Matagofie teuga a le tamaitai siva uma o le Taupou Manaia, e agatonu fo’i la’ei toga ma le fa’amoemoe e fa’atino ai le tala mo le tamaitai Taupou, Eleitino Leafaitulagi.

FA’AILOGA  PESEGA & MUSIKA & FA’AILI I AMERIKA SAMOA

O le Asosi a le Samoa Musika Foundation Inc. (SMFI) sa fa’atautaia le latou tufatufaga o fa’ailoga fa’apitoa na latou saunia fa’apitoa mo lenei foi tausaga i le vaeluaga o le tausaga fou i le Sadies by the Sea. Utulei.

O nisi sa faamau fa’ailogaina lo latou sao i musika ma pesega na maua ai e Vaito’a hans Langkilde le faailoga “Olaga Atoa o Naunau i lona Sao Tau Musika.” O le fa’ailoga fa’apitoa mo le Fatupese ma Tusipese i le atunuu na taua’aoina lea mo Napoleone A. Tuiteleleapaga, lea sa ia tusia le pese, Let me hear You Whisper ma le vii o le Fu’a a le Malo o Amerika Samoa.

O le fa’aili a le “Samposium” lea sa latou suia Amerika Samoa i le Samoa Jazz & Blues Festival i Samoa, sa faalauiloa fo’i le latou sao i lena taumafaiga ma tolaulauina ai suafa o lea aufa’aili, e aofia ai Harry Miller, Pat Tervola, Harold Siufanua, Remene Galoia, Doug Smith, Francis Leleua ma Mal Lavata’i.

O le toe fa’ailoga na taua’aoina lea i fa’aili talavou, “Banned from the Sun” lea sa latou mauaina le fa’ailoga o le Fa’aili Talavou sili ona Lauiloa a latou Galuega Tau Musika. O le fa’aili lea sa ta’ita’ia maia e le ali’i faia’oga musika lauiloa o David Pouesi, ma ona tuafafine o Rexy ma Isu ma le ali’i o Shane Alvarex.

E le’i tuumamaina fo’i e le ali’i pese lauiloa o Atoa Ripleya lea faatasiga i lana tapenaga o ana pese malu ma le malie  e agatonu fo’i ma le fa’atasiga e fa’amanatu ai le Tausaga fou. Na pese loa lea Atoa, sisiva loa fo’i ma le fa’atasiga i lea afiafi fiafia.

Peita’i o le taimi sili ona fa’amomoiloto i lea afiafi ona o le ulua’i taimi lea ua tutula’I ai le fa’aili a le Banned from the Sun e usuina ma ta latou sao i lea afiafi iloga mo le SMFI. Na iloga lo latou fa’anoanoa, o le latou sao na matagofie, ae na tu’ulu fo’i loifofoga ma pepese i latou.

“Talu ona maliu David Pouesi i le fa’aiuga o le tausaga ua mavae, o le fa’ato’a matou toe tata lea o le matou fa’aili ma pepese. Misia le matou ta’ita’i, ae o lona loto e ao ina matou faia, ia fa’aauau le taleni, aua nei motusia le asoa, o se meaalofa ua malaga o ia ae tu’ua mo i matou le au talavou i le musika, sa ia galue a’ia’i lava i ai a’o soifua ma matou fa’atasi. Mo oe le uso ma le tuagaine pele, e peseina ai nei pese ma taina pea le kitara i ona manoa,” o se tala fa’asalalau lea a le sui sa tula’i mo le pese.