TALA I VAIFANUA

Pago Pago, AMERIKA SAMOA

TUFATUFA MEATA’ALO FANAUITI I LE DHSS & PEDIATRIC WARD LBJ

O le taeao o le aso Lua na fa’amatuu atu ai e le Rotaract Club a le Rotary Club o Amerika Samoa le anoanoai o meaalofa ua mae’a afifia lelei mo le fanau o lo’o asiasi ane i le DHSS mo latou talavai ma o latou matua aua le fa’agasologa o latou penefiti, fa’apea fo’i fanau o lo’o tausia fa’apitoa i nofoaga o tina ma fanau ua sauaina i le li’o o mafutaga fa’aleaiga.

O nisI o totino o le Rotaract Club ma le Rotary Club sa aofia i le mamalu o i latou na matua masii atu e fa’ao’o lea foa’i mo le fanauiti i le Ofisa Autu o tautua a le DHSS i Utulei. O le itula e 10:00 i le taeao o le aso Lua na faia ai lea foa’i i le DHSS, peita’i o le itula e 2:00 i le aoauli, sa fa’atulaga ai e fa’ao’o atu meaalofa mo le fanau o lo’o taofia i le Pediatirc Ward ma e to’a valu i latou na i ai i lea aso.

O le susuga Paul Young ma nisi o le aufaigaluega a le Bluesky Amerika Samoa o sui totino fo’I o le Rotaract ma le Rotary Club sa avea ma e taua’aoina atu nei meaalofa mo le fanauiti. Sa taulamua pea lava le tamaitai faipisinisi talavou Tiara Drabble i lea poloketi taua mo le vaitau fiafia a le fanau, aua o ia fo’i o le Peresetene o le Rotaract Club i lenei tausaga.

I le alii talavou sa ma’i o Troy, sa ia fa’afetaia le Rotaract ma le Rotary ona o le meaalofa o le ta’avale, “Fa’afetai aua o latou fo’i ia sa faia le swimming pool i Tafuna. Fiafia lava e alu atu fo’i i le fale ae o lea ua maua la’u meaalofa.”

FA’ATAUNUU MAI MALAGA MULIMULI MV LADY NAOMI MO LE 2020

O le malaga a le MV Lady Naomi sa fa’atulaga mo le vaiaso ua te’a, lea ua mafai ona fa’ataunuu mai i le aso Lua na te’a nei ona ua toe lelei o le tau. Peita’i na fa’afuase’ia ai ona matua tumutumu luma o le falemeli ma le Uafu o va’a laiti i le taeao po o le aso Lua ma ua fa’aopoopo atu i ai, ua nanati tagata uma e asia pusa meli, ona o lo ua fa’alauiloa, o e uma e i ai pusa meli na tusia i latou talosaga i le Vaega o Faigafaiva, e maua mai pusa meli latou siaki.

Ua maofa fo’i le matagaluega o le Puipuiga o le Saogalemu Lautele ina ua fa’atulaga i latou e va’aia ma fa’afoea feoaiga a ta’avale fa’apea ma tagata i lumafale o le falemeli i le taulaga i Fagatogo ona o lea tumutumuga.

Ua faailoa mai e se tasi o le aufaigaluega a le Polynesia Shipping i Fagatogo, “O le malaga mulimuli lenei a le va’a lea mo lenei tausaga, ua le mautinoa lea vaiaso i sana malaga mai, ae o le malaga lenei sa fa’atulaga mo le vaiaso ua te’a, peita’i ua lutia le atu Samoa i le tetele o matagi ma le sousou o le vasa ona o le afa o Yasa lea sa tulata mai lona mali’oli’o i o tatou atumotu.”

O le to’atele na tumutumu i le uafu o va’a laiti, sa iloga o nisi e tatalia uta sa aumaia e le va’a, ae o nisi o lo ua fa’atulaga le la’uina atu o latou fa’amomoli e fia ave i aiga i le vaitau fiafia lenei o le lalolagi. O lenei vaitau o le malologa mai galuega a le Kamupani I’a i Atuu e masani ona fa’aaoga e tagata faigaluega uma mai Samoa e asiasi ai i o latou aiga ma faamanuia ai le Kerisimasi ma le Tausaga fou, peita’i, o lenei tausaga ua le mafafai ona malaga ona o le fa’asa o lo’o fa’amamaluina pea ma ua puupuu fo’i le taimi o malologa, ua na’o le lua vaiaso. O lea ua ave ai na’o fa’amomoli.

Ua fa’ailoa mai fo’i e le Polynesia Shipping, “I le taimi nei ua fa’atulaga mai na’o le malaga e foufou mo le ulua’i vaiaso o le tausaga fou, Ianuari 2021.”

O le fa’avave fo’i o galuega fela’ua’iga o uta mai le va’a ma toe avatu i totonu uta ma fa’amomoli a tagata mo latou aiga pele i Samoa, o le taumafaiga lea ia vave ona tete’e ese atu le va’a i lona itula fa’atulaga, 4:00 i le afiafi.

TUSI FA’AMAVAE FA’ATONU & SUI FA’AFAIGALUEGA KONEKARATE 

O se tusi fa’alauaitele a le faigamalo na fa’aauala atu e le tofa Fiu Johnny Saelua o le pule o le aufaigaluega a le Kovana Sili, ua toe fa’amanatu atu ai i le vasega o fa’atonu ma taiulu uma o matagaluega, Ofisa ma isi tautua a le Malo, i latou sa faigaluega fa’akonekarate e muta pe a mae’a lenei faigamalo, ina ia taua’aoina latou tusi fa’amavae aloa’ia a’o le’i maea itula faigaluega o Tesema 28, 2020. O le aso fa’atulaga e fa’amalosia ai lea fa’amavaega, o Ianuari 03, 2021.

O aso patino nei ua fa’ailoa mai e le tofa Fiu, ua alagatatau ai ona fa’ao’o atu nei tusi ina ia talafeagai ma le saunia fo’I o latou totogi mulimuli fa’apea ma le totogia mai o latou livi ma’i ma aso livi ua mae’a fa’atulaga i a latou konekarate sa galulue ai mo le faigamalo ua mae’a i lenei vaitau.

E ese mai le vasega o taiulu o matagaluega ma ofisa eseese o le malo, ae o ua i ai ma nisi fo’i o tagata faigaluega sa fa’atulaga e le faigamalo e ao ina mae’a lelei latou tautua i le taimi e mae’a ai le faigamalo, ma o ia tofiga ua mae’a silafia e fa’atonu ma ta’ita’i o ofisa eseese o le malo, ua tatau fo’i ia i latou na ona fa’ao’o atu latou  tusi fa’amavae aloaia mai na tofi sa latou tauavea.

Afai ae faiaga se tasi o i latou uma nei e fa’ao’o atu latou tusi fa’amavae, o le a fa’apea fo’i ona tuai maua lana siaki mulimuli ma ua le aofia ai fo’i ma latou livi ma’i ma livi na maua mai le vaitaimi atoa o lana tautua i le Malo.

TO’AI TAUNUU LE MV MANUATELE ASO TOONA’I NEI

Ua fa’ailoa e le faatonusili o  le Matagaluega o Uafu ma Malaeva’alele, Taimalelagi Dr. Claire Poumele, o le aso toana’i nei, Tesema 26, ua fa’amoemoe e taunu’u ai le MV Manuatele ina ua ma’ea ona faia lipea o le va’a i Hawaii.

“Ua mae’a lelei ona pasia e le Coast Guard le MV Manu’atele mai ona lipea ma o le aso Tofi o le vaiaso ua te’a, Tesema 17 na tuua ai e le va’a ia Honolulu mo Amerika Samoa,” o se tala lea a Taimalelagi. 

Ma ua ma’ea ona faia suega o le COVID-19 mo le auva’a e toaiva ae le’i tuua Hawaii ma ua sefe lelei i latou. Ua tuuina atu i le Matagaluega o le Soifua Maloloina lea lipoti. 

O le toe lipea ai o le va’a la’u pasese ma uta o le MV Manu’atele ona o le vaitau na lutia ai le atu Samoa i matagi malolosi ia Ianuari 2020, ae taia ai le va’a i le Uafu i Ofu, o lea sa tatau ai ona toe faia lipea o le va’a, ma sa i ai i Hawaii mo nei galuega toe fa’aleleia talu mai Iuni 2020 ina ua mautu mai le vaega tupe mo lea galuega mai le Matagaluega o le Initeria.

Ua fa’ailoa e Taimalelagi o le aso Lua, Tesema 19 ua fa’atulaga ai le malaga a le MV Manuatele mo Manu’a.

O lo’o fa’aauau pea le malaga mulimuli a le MV Pago Pago mo isi fa’amomoli a aiga mo latou Kerisimasi fiafia i le Manu’atele, ae tatalia le tausaga fou mo le Sa lea ua tulata mai i fanua.