Filifilia Togiola T. A Tulafono fai ma Senatoa o le Itumalo o Sua #5

Pago Pago, AMERIKA SAMOA

O se tasi o tofiga mo le tofi Senatoa i le Maota Maualuga o le Senate mo le isi 4 tausaga o lo o lumana’i nei, o le filifilia lea o le sa avea ma Kovana Sili o le malo o Amerika Samoa mo le tele o tausaga ua mavae, le afioga i le Matua ia Togiola T. A Tulafono e fai ma Senatoa o le Itumalo o Sua #5.

O isi tofiga e aofia ai le toe filifilia o le afioga i le Alo o Salamasina ia Satele Galu Satele na te toe nofoia le nofoa o le Itumalo o Tualatai mo le isi 4 tausaga, atoa ai ma le toe filifilia o le afioga i le Sa’o ia Magalei Logovi’i ma le afioga i le Sa’o ia Fonoti Tafaifa Aufata la te toe nofoia nofoa o leItumalo o Tualauta.

I se faatalatalanoaga ma le Sui Failautusi o le Ofisa o Mataupu Tau Samoa, le tofa i le Tootoo ia Malemo Tausaga, na ia faamaonia mai ai tofiga fou e 4 ua taunu’u atu i le Ofisa i lenei vaiaso, e fa’aopoopo i isi tofiga e 9 ua mae’a ona taunu’u atu i le 2 vaiaso talu ai.

Na taua e le tofa Malemo le mae’a lea ona faamaonia e le Failautusi o le Ofisa o Mataupu Tau Samoa, le afioga i le Maoputasi ia Mauga Tasi Asuega tofiga o i latou nei, ma ua mae’a fo’i ona tuuina i pepa faamaumau ina ia tusa ai ma ala o le tulafono.

Sa ia taua atili le faafetaia e le Ofisa o Mataupu Tau Samoa o le tofa sasa’a a Itumalo ta’itasi i le loloto o le tofa ma le faautautaga mau, ma filifiliga ua latou faia e tofia ai sui mo le nofoaiga a le Fono Faitulafono sosoo nei.

“O i latou ia ua mae’a ona filifilia e fai ma sui o Itumalo i le Maota Maualuga o le Senate, o nisi o ta’ita’i ua lava le tofa ma le agava’a i le faia o faaiuga e manuia ai le atunu’u atoa,” o le saunoaga lea a Malemo.

“O nisi o i latou ua filifilia mo le nofoaiga a le Fono Faitulafono mo le 4 tausaga o lo o lumana’i nei, e le gata e aofia ai nisi sa umia tofi maualuluga o le malo i le tele o tausaga, ae o lea fo’i ua toe filifilia ai nisi o loo latou nofoia le nofoa o le Fono i le nofoaiga o loo i ai nei.”

O le itula e 12:00 i le aoauli o le aso 3 o Ianuari, 2021 e pei ona taua i le Faavae, o le a faia ai loa le sauniga e faatautu ai Senatoa ma Faipule mo le Fono Faitulafono, atoa ai ma le faatautoina o le Kovana ma le Lutena Kovana.

FONOTAGA A LE ITUMALO O SUA

I le foontaga a le Itumalo o Sua #5 na usuia i le 2 vaiaso talu ai, na tasi ai le faafitiga o aleaga e filifilia le afioga i le Matua ia Togiola T. A Tulafono e avea ma Senatoa e sui tulaga i le afioga i le Senatoa ia Faamausili Mau Jr o loo ia nofoia le nofoa i le taimi nei.

Ina ua usuia le fonotaga a le Itumalo, na talosaga le afioga a Faamausili e toe fia tautua mo le Itumalo mo le isi 4 tausaga. Sa ia faafetaia le Itumalo i le talitonuina o ia i le 4 tausaga lea laa mae’a, peita’i e i ai galuega e le i mae’a ona faatino mo le Itumalo e tatau ona faatinoina. Sa ia faaoloolomaau ma le agaga fa’aaloalo i le paia o le Itumalo ina ia to atu lo latou pule ma toe filifilia o ia na te tauaveina le tofi o le Itumalo i le Fono Faitulafono.

E ui i le talosaga a le afioga a Faamausili, ae na autasi le Itumalo e talia le fautuaga ma le talosaga e avea ai Togiola ma o latou sui i le Maota Maualuga.

Na taua e se tasi o tamali’i o le itumalo le faateia o ia ina ua talia e Togiola le tofi Senatoa a le itumalo, ae o lea sa ia umia le tofi pito sili ona maualuga i le atunu’u, o le avea lea ma Kovana o le malo. I lona talitonuga, sa le tatau ona talia e Togiola le nofoa o le itumalo. 

Sa ia taua atili fo’i e faapea, o le talia ai e Togiola o le tofi Senatoa, ua foliga mai ai ua toe aga’i i lalo mai le tulaga maualuga o loo i ai o ia i le taimi nei, o le sa avea ma Kovana o le malo, peita’i na taua e ni isi o tamali’i latou te lagolagoina le faaiuga ia Togiola e faapea, e tutusa lava le maualuga o le tofi Kovana ma tofi i le Fono Faitulafono.

I lo latou talitonuga, o le malo o Amerika Samoa, e 3 ona vaega mavaevae o lona faigamalo, o vaega ta’itasi fo’i o lana faigamalo, e tu maoti, e eseese fo’i a latou matafaioi tausi i lalo o le Faavae o Amerika Samoa.

FONOTAGA A LE ITUMALO O TUALATAI

O le aso Toona’i na te’a nei na fonoa ai le Maota i Asotau mo le sailia o se tofi o le Itumalo i le Maota Maualuga i le Fono Faitulafono mo le isi 4 tausaga. Na taua e le Tofa i le Matua ia Fauaa Elisara Fauaa le aofia uma o Tapaau ma Ponaoo o le Itumalo i lea fonotaga, ina ua filitagaga le faautaga ma saili le moe mo se faaiuga autasi.

Na faamanino i le fonotaga a le Itumalo le finagalo lenei, e leai lava se isi e nofoia le nofoa o le Itumalo i le Maota Maualuga a le Fono Faitulafono i le taimi nei, ua na o le afioga lava i le Alo o Salamasina.

“Sa faigofie lava le sailiga tofa a le Itumalo, ma tasi ai loa le faafitiga o aleaga e lagolagoina le toe filifilia o le afioga i le Alo o Salamasina e fai ma sui o le Itumalo i le tofi Senatoa,” o le fetalaiga lea a le Tofa i le Matua ia Fauaa i se faatalatalanoaga ma le Samoa News i le vaiaso nei.

Fetalai atili fo’i Fauaa e faapea, o aso uma lava e nofoia ai e le afioga i le Alo o Salamasina le suafa ma maua fo’i lona malosi mai le Atua, o le a fa’aauau pea ona avea o ia ma sui o le Itumalo i le Maota Maualuga.

FONOTAGA A LE ITUMALO O TUALAUTA

O le vaiaso fo’i na te’a nei na fono ai le Itumalo o Tualauta mo le sailia o ona sui e to’alua i le Maota Maualuga a le Senate i le Fono Faitulafono. I le mae’a ai ona saili le tofa ma le faautautaga mau i Tapaau ma Ponaoo o le itumalo, na tasi ai le finagalo e toe filifilia le afioga i le Sa’o ia Magalei Logovi’i ma le afioga i le Sa’o ia Fonoti Tafaifa Aufata la te toe fa’aauauina tofi o le Itumalo mo nofoa e 2 i le Senate mo le isi 4 tausaga o loo lumana’i.

Na taua e se sui o le Itumalo i le Samoa News le faigofie o le sailiga tofa a le Itumalo e aunoa ma se tasi na faalavelave.

TOFI O KOVANA O FALELIMA

Ua mae’a fo’i ona filifilia tofi o Kovana o Falelima e 3 i le atunu’u, e pei ona faamaonia mai e le Ofisa o Mataupu Tau Samoa.

Mo le Falelima i Sasa’e, ua filifilia ai le afioga a Matautia Lui Tuiafono na te tauaveina le nofoa o le itumalo mo le isi 4 tausaga o loo lumana’i nei, e sui tulaga i le afioga i le To’afia ia Alo Dr. Paul Stevenson o loo ia nofoia le nofoa i le taimi nei.

O le afioga i le To’afia ia Alo lea ua filifilia e to’alua i ai nofoa o le Itumalo o Ituau i le Maota Maualuga a le Senate mo le isi 4 tausaga o loo lumana’i nei.

Mo le Falelima i Sisifo, ua toe filifilia ai le afioga ia Fuamatu J.V Fuamatu na te toe fa’aauau le nofoa o le Itumalo i le tofiga o le Kovana o le Falelima. Na taua e se sui o le Falelima i Sisifo le faigofie o le faaiuga sa faia, ma vaaia ai fo’i le lagolagoina e Tapaau ma Ponaoo o le Itumalo.

Mo le Falelima o Manu’a, ua filifilia ai le afioga i le Faatui ia Misaalefua J. Hudson e avea ma Kovana Itumalo mo le isi 4 tausaga, e sui tulaga i le afioga i le Faatui ia Laolagi Fonoti Savali Vaeao o loo ia nofoia le nofoa i le taimi nei.

E to’a laiti lava itumalo e le i filifilia o latou sui mo le Senate. O loo i ai le faamoemoe e tatau ona mae’a le vaiaso nei ua mae’a ona faia filifiliga a itumalo nei ma faaoo atu loa a latou tofiga i le Ofisa o Mataupu Tau Samoa mo le faamaoniaina.