Toa Fitu Tausimai Pasi - Fa’apine i le sauniga fa’apitoa MPH ASCC

Pago Pago, AMERIKA SAMOA

O le sauniga sa fa’atautaia i le Maota MPH a le Kolisi Tuufa’atasi o Amerika Samoa (ASCC) sa fa’apine ai le to’a fitu o tamaitai ma Ali’i Tausima’i Pasi, o le toatolu ua maua fa’ailoga o le LPN ma le to’a 4 ua maua fa’ailoga RN.

O i latou nei, ua lava tapena mo le tausia lelei ma le va’aia patino o togafitiga mo e ua gasegase i le falema’i tele i Faga’alu, ma e mafai fo’i ona avea i latou ma nisi e galulue i falema’i fa’aitumalo o le matagaluega o le Soifua Maloloina.

I le umi sa latou taumafai ai ina ia umia latou fa’ailoga - Certificate of Proficiency in Nursing LPN ma le Associate of Science Degree in Registered Nursing RN - e le’i faigofie aua o le tele o le latou taimi e tau’ave ai ma kosi i totonu o le falema’i, o le fa’atinoga lea o aoaoga o lo ua mae’a a’otauina ai i a’oga i potu a’oga i le ASCC i le Polokalama o Aoaoaga Faa-Tausima’i.

I le sauniga sa faia i le po o le aso Lua, s tula’i ai le susuga le Fa’afeagaiga tofia mo le sauniga Pr Victor Terenuku Tofaeono mo le tatalo ma se upu fa’amalosi i le vasega fa’au’u.

“O la outou matata, o se faiva e le faia ma se augata pe matamoe. O le tauto ina ia faia ma le onosa’i o outou tiute ma ia mataala lava ina ne’i sasi se va’ai maumau le soifua. O la outou sailiga o atamai, o se sailiga e aoga mo le mamalu lautele o le atunuu i le fa’afailele mai o le soifua a’o pepe se’ia oo i le taimi ua matutua fo’i, e mana’omia lava outou.”

“O se auaunaga e faia mai le loto alofa ma le alofa fa’atino le tausiga lelei o so’o se tasi, e le na’o nisi ua tatou aiga ma so’ototo i ai, ae ua faia fa’asalafa i le mamalu lautele o le atunuu ua gasolo atu e saili togafitiga. O le alofa  mutimutivale o le Atua e afifi ai la outou galuega fai i aso uma.”

Saunoa le Peresetene o le Kolisi, Dr. Rosevonne Pato, e avatu ai lana fa’amalo i lea vaega fa’au’u, ma ia fa’ailoa,  “O le ala ua outou uia, e le o to’atele nisi o savalia, aua ua mautinoa e le o faigofie ona sailia atamai nei, fa’atasi ai ma lona fa’atinoga ina ia mautinoa ua outou agavaa mo nei tusi pasi ma pine ua fa’amauina i le aso.” 

“E tele taimi ua tuufesili ma fetu’unai e i matou le pulega o vaega eseese o le Kolisi, ma taumafai e fa’amautu ni ala, e mafai ai ona una’ia le fanau a’oga, ia tau’avea mataupu e agava’a ai mo lenei kosi aoga tele mo le atunuu, peita’i e toaititi lava i latou ua i ai le loto ma le agaga atoa e tau’avea ai ma tula’i mati’e e pei o le aso. Fa’afetai i lo outou loto i le faiva sili ona mana’omia e le mamalu lautele o le atunuu.”

“O outou e toe va’aia le fa’ato’a ola a’e o le tagata soifua, se’ia o’o lava ina toe ave’esea le manava ola i le tele o taimi, e tou te molimauina uma nei taimi i lo tatou ola ma’ale’ale. Tou te iloa lelei ona tausia ma le alagatatau so’o se tasi ua sulufa’i atu ona ua a’afia le soifua maloloina, e tou te tula’i mai ma fa’atino le faiva o le fautua ma le tausiga lelei. Fa’afetai.”

“E mana’omia pea le to’atele o nisi o tausima’i pasi e pei o outou, e galulue i le tatou falema’i tele fa’apea ma falemai fa’aitumalo i le atunuu. O tatou ta’ita’i e tima’i mai lava i taimi uma, ia fa’amalosia ona una’ia loto o le fanau a’oga ina ia tau’avea mataupu fa’atausima’i i le tatou kolisi, ina ia lava ma totoe tausima’i i le tatou teritori.”

“E le gata ina outou mataituina le soifua laulelei o le atunuu, ae o outou fo’i ola ia mautinoa o lo’o fa’asaoina ina ia fa’aauau le auaunaga lelei, ae maise o le soifua fo’i o tou aiga. Ia faia lava ma le mataala o outou faiva, ia le mata’uleagaina i se lape ona ua vaivai ma ua matamoe, e te le tulimoe lava, aua o lo’o tou gafataulima le soifua o e ua outou tausia lelei.”

O le tausaga lenei, ua fa’atulaga ai e le Komiti Fa’afoe o le Kolisi ina ia toe fa’atepa ai le atunuu i le tau amataga o le Kosi ma lea Kosi Tau’ave Mataupu i totonu o le Kolisi, ma ua fa’ailo ai, “O le Kosi Fa’atausi Ma’i na amata a’oa’oina ai tupulaga tamaitai o Amerika Samoa ma pasi mai ulua’i tausima’i i le tausaga e 1916. O se tasi o nei tamaitai Amerika Samoa sa aofia i lea vasega fa’au’u o Initia Tauanuu. O lo ua tapena fo’i le fa’ailoga fa’apitoa e taualoa ai le ulua’i taumafaiga a lenei alo tamaitai o le atunuu i lenei faiva o lo’o ua fa’aauau mai pea lava se’ia oo mai i le 2020.”

“O le nofoaga muamua sa i ai le falema’i i Malaloa Fagatogo sa i luga lea o le Annex, fa’afesaga’i ma le Tool Shop ma le Uafu o Va’a Fagota poo le Marina i le taimi nei. Sa aofia ai ma le tina o le tamaitai o lo’o avea nei ma Fa’atonu o A’aoaoga Tausima’i a le Kolisi,  Mrs. Foini Ah Mu, ae o lo’o 16 tausaga o lona tina. Talofa toe si’itia le galuega i Utulei le nofoaga o lo ua fa’atuina ai nei le EOB po’o le Maota mo Ofisa uma o le Malo o Amerika Samoa.”

“O le toe si’itaga mulimuli ma aumaia ai le a’oga fa’atausimai ina ia fa’aauau ona maua pea tausima’i galulue i le Maota Gasegase lea ua tula’i ai nei le tatou falema’i i Faga’alu. Peita’i o le ulua’i tamaitai na avea ma fa’atonu o le Nursing i le Kolisi Tuufaatasi o Fa’au’uga Suesue Lutu - Achica i le tausaga 1976. Ae o le tausaga 1972 na siitia mai ai loa a’oa’oga fa’atausima’i mai le Lumana’i Buildinga i Fagatogo ma fa’atautaia i le tatou Kolisi Tuufa’atasi.”

“O le tausaga e 1984 na faato’a avea ai le Nursing Department a le ASCC ma totino o le National Council of Nursing ina ua ausia e le kosi ona fa’apasia o nisi o tausima’i i a latou aoaoga maka e pasi 74% le maulalo e pasi ai le kosi; 76% e pasi ai le Theory ma le 78% e pasi ai le Practical /Clinical. Ana le fetu’una’ia nei la’asaga o a’oa’oga ma togi e pasi ai vasega nei, e le ausia fo’i le avea ai ma totino o le National Council. O nei suiga e ao ina ta’itolu tausaga ma fa’atino.”

I le taimi nei e fa la’asaga ua fa’atulaga i ai a’oa’oga Fa’atausima’i Kosi i le Kolisi Tu’ufa’atasi. O le Vasega Fa’amasani; Aoga Nurse Aid; LPN ma le RN. I lenei tausaga e to’atolu i latou ua fa’au’u mai ma LPN ma o le a talia latou fa’ailoga i le aso Faraile nei: Mark Sapiritu LPN; Minchul Shin, LPN ma Hanah Salcedo LPN.

O le to’afa ua fa’au’u mai ma latou fa’ailoga Associate Degree e aofia ai: Lina Fa’afetai RN; Toaono Pese RN; Matatumua Maulupe RN; Veronika Tagoa’i RN. E toalua sui na tofia mo so latou leo e fa’ailoa mai ai lo latou agaga fiafia ina ua mae’a fo’i lea vaega o le latou olaga tausaili i agava’a.

O le ali’i o Minchul Shin sa tula’i mo le vasega o tausima’i ua fa’apine latou LPN, ma sa pu’upu’u lava lana fa’afetai. O le fa’afetai i le vasega o latou faia’oga mo le galuega tima’i sa faia mo i latou, ua fa’asoa mai ia i latou le sosia o le tomai aua tiute faia fa’atausima’i. E le gata i o latou faia’oga i le Kolisi ae o latou faia’oga fo’i i kosi sa tau’avea i le Falema’i. Fa’afetaia e ia o latou matua ma aiga, ona o le sapaia o latou taumafaiga i so’o se mea lava. Ae maise latou sa tiute fa’atasi i le falema’i, sa latou tula’i mai e fesoasoani ia i latou e fa’amae’a latou sifi, ae faia latou suesuega ia mautu o latou mo latou suega. O lana fa’afetai mulimuli o i latou ua aofia i le latou kosi, fa’afetai mo taimi uma sa latou fa’atasi ai ma taumafai fa’atasi ia a’e manumalo latou faiva. E le galo taimi faigata.

O se lauga sili lea ona pu’upu’u i le tala fa’asolopito o le polokalama a fa’apinega o Tausima’i. Peita’i o le tamaitai ua tofia mo le fe’au fa’ala’eiau i le vasega o Registered Nursing o le tamaitai o To’aono Pese. O ia lea sa tula’i ma sii fo’i lana fa’afetai i le vasega o faia’oga uma ma le pulega i le Kolisi Tuufa’atasi, fa’apea ma i latou uma sa maua o latou taimi e a’oa’o ai i latou i tumau ma galuega fa’atino i le Falema’i Tele i Fagaalu.

Peita’i i le fa’afetai i aiga ma e pele ia i latou, sa ia fa’ailoa ai, “A i ai nisi e sili atu ona tigaina ia i latou sa taumafai, o matou aiga ma e pele ia i matou uma. Aua o i latou sa latou onosa’i i lo matou fa’afiufiu ona o le vaivai, lo matou le onosa’i ona ua ova le popole, lo matou le aoga i se fe’au i aiga ona ua tele meaa’oga e fai. Lo matou momoe ae ua leai se malosi o totoe, ae fa’amalosi mai pea ia i matou ina ia tauivi ma ai le loto i le taumafiga ia au.”

“Fa’afetai tele le alofa, fa’afetai le onosa’i, fa’afetai le fa’apalepale mai, fa’afetai le fa’amalosi’au, fa’afetai le faitama ma le fa’apelepele o matou i taimi o le vaivai. Alofa le Atua ma toe fa’afo’i atu manuia mo outou nai o matou matua ma pelega i aiga. Sa outou tu’i le mulipapaga ma tatalo leleoa ina ia manuia matou faiva, lea ua tatou patipatia i lenei afiafi. Fa’afetai i le Atua o mea uma aua ua ia alofagia i matou sa taumafai, ma outou sa tapua’ia o matou faiva i aoaoga.”

O le fa’apinega sa vala’auina taito’atasi i latou ma tutula’i e faapine e se tasi ua tofia mai o latou aiga. Ona maea lea ua faia le fa’atautoga o i latou uma ma sa tolaulauina fo’i lea e le latou fa’atonu o a’oga Tausima’i a le Kolisi Lele Ah Mu. Sa tutuina latou moliga’o e fa’ailo ai le latou tautua e ao ina mumu pea e o’o i taimi fa’aletonu ma le pouliuli o le soifuaga o le tagata ua mana’omia le fesoasoani.

Ona soso’o lea ma le taimi ua taua’aoina ai fa’ailoga fa’apitoa: O le faailoga faapitoa mo le Tausima’i togisilia i le LPN ua mauaina lea e le susuga Minchul Shin. O le isi fa’ailoga o le Theory sa mauaina lea e le tamaitai tausimai o Hanah  Salcedo LPN. Peita’i, o fa’ailoga uma e tolu mo le RN sa mauaina lea e Tina Fa’afetai, e aofia ai ma le fa’ailoga fa’apitoa sa taua’aoina e le susuga le Foma’i Dr Naseri Aitaoto, e taualoa ai le ulua’i tamaitai Amerika Samoa na avea ma tausima’i pasi, Initia Tauanuu Nemaia.