TALA I VAIFANUA

Pago Pago, AMERIKA SAMOA

FA’AU’U LE 72 LEOLEO FOU – NOVEMA 24

O le fa’au’uga lona fa a lenei nofoa’iga a Kovana Lolo Moliga ma Lemanu P. Mauga, ua fa’au’u mai ai le to’a 72 o ali’i ma tamaitai leoleo fou. O i latou nei sa fa’afaigaluega mai ina ia fesoasoani i le fa’amalosiga o le puipuiga o tulafono o le fa’asa o le Covid-19. Mai le saunoaga a le Komesina o Leoleo, Le’i Sonny Thompson, sa ia fa’ailoa ai, ”O lo’o fa’aauau nei ona totogia i latou nei mai le fa’atupega o lea polokalama a le Covid-19, se’ia pa’ia le Aperila o le tausaga fou, lea e maua ai le totogi $8. i le itula. A mae’a lea ona fa’atoa se’e mai lea o le latou totogi I le $16,000. i le tausaga e pei ona siitia nei i ai totogi amata o Leoleo e le nofoaiga lenei a Lolo ma Lemanu.”

Ma o le fa’auuga lona 28 lenei - a le Police Academy in le teritori mo le matagaluega o le Puipuiga o le Saogalemu Lautele.

I le saunoaga lava a le ali’i Komesina sa ia fa’ailoa ai, “Na amatalia mai lenei nofoaiga ma tofia atu i le matagaluega, e na’o le 98 le aotelega o Leoleo o lo’o ua aofia i le aufaigaluega ina ia faia tiute fa’aleoleo i le atunuu. Peita’i, ou te le’i talosaga mo lenei tofiga, ae ua tofia mai ma le tiute, alu e fa’aleleia ma toe fa’afoi le malosi’aga i le vaega o Leoleo.”

“Leai se isi mea e fa’aleleia vave ai le matagaluega nai lo le lava o le aufaigaluega ma ia a’oa’o patino i o latou tiute, ia agavaa e fa’atino le pulega o le tulafono ua malamalama a’ia’i ai, ma ia sofa’i le solitulafono i le taimi e fa’atino ai e so’o se tasi, ia iloa e le lautele, ua i ai se fa’amalosi tulafono i so’o se mea.”

I le sauniga lea sa fa’atino mo le fa’au’uga o lenei vaega tele o Leoleo fou, sa masi’i fa’aaloalo mai ai le afioga le Fa’amasino Lagolago Mamea Sala e faatautoina i latou.

O le susuga le Faife’au o lo’o galue mo le tima’iga o i latou o tuli fa’asalaga i le To’ese Rev. Fa’afetai Fuimaono, sa avea ma fofoga o le sauniga si’itia i le Atua ona o le fa’amoemoe ua vagaia e le Malo, ua mae’a a’otauina lenei to’atele o le fanau talavou, ia tautuaina ma malutia le Malo o Amerika Samoa e ala i le tausia o lona saogalemu lautele.

Ina ua mae’a fa’atauto le fanau, ua fa’alauiloa ai i latou na patino i ai fa’ailoga fa’apitoa o lenei vasega fa’au’u lona 28 o vasega oleoleo ua mae’a a’otauina, ma ua maua ai le fa’ailoga o le togisilia e le ali’i talavou Scotland Elisara mai Vailoatai. O lona togi na ausia o le GPA 98.4 peita’i o le fa’ailoga mo le tulaga lua o le tamaitai o Margaret Su’a. Ua fa’amauina lona togi na ausia e 98.0

O le sui ua fa’amauina le saoasaoa ma le vave o lona malosi koleniga ma tamo’ega sa maua lea e se tasi o ali’I o le vasega ma le sui loa sa fa’amauina e sili ona tele ona pauna ua lusi talu mai ona koleni fa’aleoleo.

O se sauniga la sa matua iloga ona fa’atumulia ai le tatou Fale Laumei i Utulei i le vasega o matua ma aiga, o nisi ua le maua se nofoa ma ua laulaututu i latou i fafo. E le gata ina fa’aeaina lenei vasega o le fanau ua avea ma Malu o le Malo e 72 i latou, ae sa fa’aleoina fo’i faamanuiaga ua maua uma ele vasega o leoleo ua loa le latou tautua i le Matagaluega o le Puipuiga o le Saogalemu Lautele ma le malo o Amerika Samoa.

AUTASI AMERIKA ATOA I LE – AGAGA FAAFETAI

E afua mai mauga manuia o le Nuu, ma ia le galo ia i matou taito’atasi ona si’i a’e le fa’afetai i le Atua i le ola ma le malosi i aso uma e le aunoa. Le agaga o le fa’afetai ua va’aia ma uma olaina e tagata uma o le lalolagi ae maise o Samoa na lua, ua feso’ota’i fo’i i tatou i magasoifua ona o le agagalelei e le mavae o le Atua. Ua va’aia le alausu o le to’atele i sauniga fa’afetai ua faia i so’o se fata faitaulaga, a’o totonu fo’i o Aiga ta’itasi o le Iunaite Setete ua malolo mai galuega uma, ae osiosi le taulaga fa’afetai i aiga ua aufa’aasi mai ona o le agaga e si’I fa’atasi le fa’afetai.

Ua fa’aalia fo’i le agaga fa’afetai o ta’ita’i o ekalesia ta’itasi i le atunuu, ona o le sapaia ma le agalelei o le Talalelei ma galuega uma o le Agaga e aiga ta’tasi. Ua fa’ailoa fo’i le agaga fa’afetai o ta’ita’i o Malo, i le mamalu lautele o le atunuu, ua aotelega i ai Ekalesia uma, o Pisinisi uma, ae maise o fa’alapotopotoga eseese.

O i ai nisi ua le mafuta ma nisi e pele i le agaga, ona o le malaga a le Maliu ma le oti ua lofia ai le lotoifale o aiga i lenei vaitau, ia i ai pea le saogalemu ma le filemu o le Atua i o outou loto. Ia fa’amafanafana fo’I le Atua i faigata o le motusia o mafutaga pele ma le mamae, ua motusia e le oti. E i ai manuia o le malaga ese ai o pelega, aua o lo tatou oti, o lo tatou manuia lea. Talitonu i ai, ma fa’afoi le fa’afetai i le Atua o manuia, e le vale so tatou taui. A tatou oo i tiga, ona tatou iloa lea ua tupu atili ai lo tatou onosa’i, a’o lo atou onosa’i fo’i, ia maua ai lo tatou ola.

Fa’afetai mo i latou sa fa’asoa mai lo latou tamaoaiga i nisi o i ai le mana’omia, fa’afetai sa outou faia le poloaiga a Iesu, tufatufa atu lo outou tamaoaiga i nisi o i ai le mana’omia. E sili manuia o le foa’i. O le agaga o le fa’afetai ona o le agaga o le fefa’asoa’i, ia le galo lea ia i latou na talia.

Silisili i nei mea uma, o le fa’afetai a matua i le fanau, mo le tausiga ma le talia filemu ma le faia o le mana’o ma le fa’atonuga a matua i le agaga fiafia. Le fanau e aua nei galo ia te outou, ia fa’afetaia le tausiga a matua, I aso uma o lo outou ola, o se sui vavalalata lea ma oe, o lou Atua, i la le tino nei.

FEFA’ATAUAIGA MAFUTAGA FOFO-ALATAUA – OLOA GAOSI & FA’ATAU ATU

Ua si’itia le fua a le mafutaga o tina uma ua aofia i le vasega Suisui a le Fofo-Alataua i Leone, ina ua latou loto o le a faia le fa’aaliga o latou oloa na su’i, ma isi oloa na gaosia e o latou lava lima, ma fa’atau atu i le mamalu o le atunuu o le a maua le avanoa e oo atu ai e fia maua nei oloa ma maimoaina le latou fa’amoemoe.

O Novema 21, sa fa’atino ai le fa’amoemoe o Tina Fofo-Alataua, i le fale lava o lo’o fa’atino ai le latou vasega suesue, Fale Talimalo o Salave’a, Auma Leone. Lea o le a toe fa’aluaina lea fa’amoemoe lelei ia Tesema 19, 2020, nofoaga lava e tasi, ma ua fa’aopoopo fo’i ma oloa o le a fa’atauina atu.

I le latou ulua’i fa’aaliga, ua fa’aopoopo atu oloa fa’atau ina ia aofia ai taleni uma a tina, e ese ai ma le suisui, ua i ai ma isi oloa ua latou gaosia e ala i le elei ma le togala’au o fugala’au fua manogi, oloa gaosia i ituaiga o teuga eseese e amata mai i ula ma tautaliga gaosia i mea ua maua i le atunuu ma ua fiafia ai fanau o alaala i fafo. O la’ei ua maea su’ia lelei ma ie lavalava ua mae’a eleia ae o isi fo’i ua fa’auumi ina ia lava ai puletasi ma fa’atau atu. Ua I ai taga solovae, ua gaosia mai I tipitipiga o ie mo suisuiga a tina, ma o isi ia oloa ua matauina le fiafia tele o tagata e fa’atau.

Ina ia mafai ona maua lou avanoa e te maimoaina ai nei oloa uma ua ofo mai e le mafutaga a Tina suisui o Fofo-Alataua, aua lava ne’i e misia le isi a latou aso mo fefa’atauaiga ia Tesema 19, 2020 e tapena ai lou maota mo le Kerisimasi o lenei vaitausaga.

Ua fa’afetai mai le mafutaga i le mamalu na asia i latou ma faia fa’atauga mai lo latou fale o Oloa Gaosi eseese ma taleni ua agava’a ai nei tina, ua saili ai e i latou le tamaoaiga tausi mo latou aiga. Pe afai e te fia mautinoa se isi mea tau lenei fa’amoemoe e mafai ona e fa’afeso’ota’ia le tamaitai Faipule Andra Samoa mo se isi fa’amatalaga.