TALA I VAIFANUA

Pago Pago, AMERIKA SAMOA
 

FOAI MO LE MANUMALO ALOFA RHD CLINIC I LE DOH

I le agaga o le fa’afetai, na tula’i ai le susuga le fa’atonu o le Matagaluega o le Soifua Maloloina, Motusa Tuileama Nua, ma ia fa’afetaia le agaga, loto ma lima foa’i o le Manumalo Baptist Academy ma ana pa’aga fa’apisinisi.

O le tinoitupe aofa’i ua foa’ia mo le Talavai o Fanau ma e uma ua maua i gasegase o le Fatu i le tatou atunuu .

“Mai le fatu lava ia, o le Alofa, le alofa lea ua fa’asalafa ma ua maua ai le agaga o le Manumalo! Ioe le taofi, o le ala fa’aigoaina fo’i lea o le tatou Potu Talavai o le RHD i Faga’alu “Manumalo-Alofa RHD Clinic,” ona o le a’ao foa’i, le gaga foa’i ma le loto foa’i o le Manumalo ma ana pa’aga uma ua lisia,” o se vaega lea o le tali fuaitau a Motusa  ina ua mae’a taua’aoina le siaki ua aotelega i ai le foa’i atoa e $16,000 mai le afioga Leota Wanda Alofa.

O le fa’asologa o foa’i na taua’aoina aloaia e le fanau a’oga na tomua lava i le foa’i a le Manumalo Academy National Honor Society e $4.000 na taulimaina lea e Janella Musini ma Donwen Hong. O le meaalofa lona lua na taua’aoina lea e le Snow Company e $1,000. sa taulimaina e Lana Snow. O le meaalofa lona tolu na tapena lea e Liana’s Island Flowers Shop e $1,000. sa taua’ao atu e Charlie Liang, ae o le foa’i lona fa, na tapena lea e le Kamupani Faufale & Aualatele a le Paramount Builders Inc. e $10,000 sa fa’alauiloa ma taua’ao atu e le tamaitai talavou o Georgina Alofa.

O e uma na oo atu e molimau fa’afetaia lea foa’i taua, e afua mai i le vasega o foma’i taiulu uma o vaega eseese o le Matagaluega, le sui fa’atonu sili Farah Malaepule Utu, o e uma na sasao i le talaluma o le fa’atasiga.

“E taua le soifua maloloina o a tatou fanau, aua o i latou nei o le lumana’i o le atunuu o lo’o tapena aua taeao. O le foa’i fo’i ua taulimaina, ia aga e fa’aleleia le fa’amoemoe,” o se toe upu lea a le susuga Papali’Itele Lauli’i Alofa ma mae’a ai le taeao fesilafa’i.

FA’ALAPOTOPOTOGA LESITALA MO LE POLOKALAMA O LE KERISIMASI 2020

Ua mae’a le lesitalaina o suafa uma o i latou ua manatu ina ia tofu sao mo po e tolu ua fa’atulaga o le a faia ai pesega mo le Kerisimasi Fiafia i Amerika Samoa 2020.

“O le vaiaso lenei ua fa’asolo atu ai le komiti mamalu o lea fa’amoemoe ina ia siakia mai sao o nei aufaipese e to’a 36 ua mae’a fa’amauina ma lesitala e fa’asolo mo lea polokalama fiafia e fa’amanatu ai vaitau fiafia o le tausaga, le kerisimasi ma le Tausaga Fou pe a aulia,” o se tala fiafia lea a le tamaitai fa’atonu, Lauagaia Mary Taufete’e.

O le fa’aiuga o le vaiaso Novema 06, na mae’a ai le lesitala, ae tuu loa sina taimi mo le tuufa’atasiga o sao o nei aufaipese e 36 ua ma’ea lisia. O i latou fo’i nei o le a ta’i 12 i le po, e ta’i 10 minute o latou taimi atofa, ma o le ailoga ai, o le polokalama e tauau e oo lava i le 3 itula i le po o fai aua e tau o i luga o le fata le aufaipese ma fa’atulaga fa’ato’a tau lo latou taimi mo pesega.

Ua fa’atulaga po e tolu e faia ai lenei polokalama Tesema 12, 13 ma le 14 ma e leai ni aufaipese ta’ito’a fa pe laiti mai latou sui totino ua lisia i le 36 lea ua fa’amauina.

Ona o le nofoaga ua fa’atonuina e le Kovana Sili Lolo Moliga o le Pavillion i le Malae o le Talu, Fagatogo, o lea ua fuafua ai, e tatau ona amatalia pe a mae’a ona ta le taga mo talosaga a le afio’aga. O le a faia fa’atasi lava le tatalo amata mo le polokalama i le itula e 6:00 ma ua o gatasi fo’i ma le Vavao o fa’amalosi e Fagatogo, ona amata loa lea ona fa’asolo mai i le fa’asologa muamua se’ia oo i le 12 o i latou uma ua atofa mo lea po ma lea po.

O le a fa’aalia fo’i lenei polokalama i le KVZKTV. O le a maua atu fo’i le so’otaga fa’ainiteneti ina ia mafai ona maimoa mai a tatou pelega ma aiga o lo’o alaala ma opea i atunuu i fafo ona o le Covid 19.

TAOFIA ASIASIGA I LE TOESE – MATI SE’IA OO MAI NEI

Talu mai le masina o Mati 2020 na taofia ai ona toe asiasi nisi o aiga o e o nofosala i le Toese i Tafuna ia i latou. Ua oo mai lava i le taimi nei, e le’i i ai se covid -19 i o tatou laufanua, ma ua tuumamaina foi nisi o aiaiga o le fa’asa sa feagai mai ma le atunuu, ae ua le mafai lava ona toe asia e aiga latou pelega o lo ua fa’anofo sala i le Toese.

I le fa’atulagaga o lo ua I ai le falepuipui e ao lava ina tapunia, peita’I e I ai nisi aiaiga e mafai ona suia e le afioga le Komesina, pe a talafeagai le mafuaaga ma le finagalo o lea ta’ita’i.

I le nofoaga o lo’o taofia ai le fanau e le’i mae’a pulega fa’alematua ae ona ua solitulafono, ua tamau i le tulafono e ao lava ina maua le so’otaga ma asia le fanau lea e matua ma nisi ua lisia o latou matua tausi. O lona uiga o lo’o mafai ona fa’atulaga asiga a matua ma matua tausi sa va’aia fanau nei e nofosala ona ua solitulafono ae le’i mae’a pule a matua ia i latou.

O le to’alua o se tasi o ali’i o nofosala, ua fa’ailoa mai sona fanoga. ”Ona o lea ua atoa le 8 masina o lo’o taofia pea asiga mo latou aiga o nofosala, ae o lea ua tuumamaina uma le tele o tamau o le fa’asa mo le Coronavirus i le taimi nei, aua o lo ua mautinoa lava ua tele fiafia ua fa’ataunuuina, o sauniga lotu ma fa’atasiga a aiga e faamanatu aso fanau, o le faiga o maliu, ua le toe va’aia lava o tau nonofo valavala nisi. Ona ua tulata mai Aso Fa’afetai ma le Kerisimasi, ua talosagaina e i matou nai o matou aiga, pe mafai ona matou asia i lenei vaitau fiafia o le tausaga.”

Fa’ailoa e le komiti Fa’afoe o le Coronavirus a le tatou Malo o le fa’atagaga e faia asiasiga i le toese  o lo’o tu’u tasi lava lea i le susuga le Komesina o leoleo e na te fa’atulagaina.

O le tala a lea tina, “E fia oo atu a’u e fai sa’o la’u talosaga i le Komesina o Leoleo, peita’I e le taitai lava ona ou pasia le failautusi a le Komesina. O le alu atu lava e tasi lava le tali mai e le o i le Ofisa lana susuga. Pe o lo’o alu i le fonotaga a le Covid-19, e le o i le Ofisa. E tele le fia maua mai o le fa’atagaga a le Komesina, ae foliga mai o lo’o gata lava le tagata e mafai ona matou va’aia I lana failautusi, ma ua leai ai lava ma se fa’atagaga o si matou aiga e asia le tama o le aiga.”

“O le isi mea, a telefoni atu fo’i mo le fia talanoa sa’o i le Komesina, e fetu’una’i lava le telefoni ae i’u lava ina fa’ailoa mai e le o i le ofisa ma e toe valaau atu p a oo i se taimi. O le leai atu ai lava lena e le toe maua ai se sootaga.” O se augani lea a sia tina, ua fia va’aia ma asia lona to’alua i le falepuipui.

Ua uia fo’I e lenei lava tina le vaega o Loia e tula’i mo i latou e solitulafono ma ua nofoia le falepuipui, ua fa’atalosaga ai se feiloa’iga i nei vaitau fiafia o le tausaga, talofa e leai tele se agaga fia fesoasoani mai o nei ali’i loia mo latou pelega o nofosala.

I le suaina o le eleele mo le fa’atuina o le falepuipui fou e 15 potu i totonu o le Toese, sa fa’aalia ai e le afioga Kovana Lolo Moliga, “Ua fa’atulaga fo’I le aso lenei e talisua fa’atasi ai le ta’ita’iga o le tatou malo ma le Matagaluega o le Puipuiga o le Saogalemu Lautele, ma le mamalu o le atunuu o lo’o tuli fa’asalaga i lenei nofoaga. O le a saunia le latou mea tausami ma tufatufa atu i o latou potu, ma ia fa’amanuia atu ai lenei vaitau fiafia o le tausaga mo outou uma.”