Falepuipui se alii na sasaina lona (nephew) I se nofoa u’amea

Pago Pago, AMERIKA SAMOA

O le vaiaso na te’a nei na tula’i ai le alii o Teofano Tupa i luma o le Fa’amasinoga Maualuga, ma lana loia o Michael White, mo le lauina o lona faasalaga I le moliaga mamafa, o le sauaina o fanau iti, ina ua ia faaoo ni manu’a I se tama a lona tuafafine,  e 14 tusaga le matua, e ala I lona sasaina o lenei alualutoto I se nofoa u’amea a’o a’apa mai mo se lavea’I, ona o lo’o malemo, e pei ona ta’ua e le faamasinoga.

O lenei solitulafono e mafai ona faasala ai se tasi I le toese mo le umi e 5 tausaga, pe sala tupe e $5,000 po o faasalaga uma e lua.

O le tamaitai loia o Kristie Soule na fai ma sui o le malo. 

Na ta’utino Tupa I luma o le Faamasinoga, lona faao’o o ni manu’a tuga I lona (nephew), I le masina o Iulai o le tausaga nei, e ala I lona fa’aaoga o se nofoa u’amea e sasa ai lona tino.

Na tau’utino atili le ua molia e fa’apea, o lana gaioiga sa faia i lea aso, sa le tusa ma ala o le tulafono. 

Na faatoese Tupa e tusa ai o lana soltulafono, ma ia talosagaina se isi avanoa mo ia se’i toe fo’i atu ai i tua e tausi ona matua ma lona aiga ua tele masina o latou valavala. Na taua e Tupa e faapea, o le silia i le 5 masina lea na taofia ai o ia i le Toese, ua ia a’oa’oina ai se lesona taua mo lona olaga, ma ua ia iloa ai, e le o se mea lelei le soli o le tulafono a le malo.

Sa ia taua “Ina ua ou vaaia le toatele o tupulaga talavou atoa ai ma Tama matutua i le nofoaga, sa ou faapea ane i lo’u loto, ta’i to’atele tagata ua tele tausaga ma aso o latou olaga ua ma’imau ona o faaiuga sese sa latou faia,”, ma ia ta’utino ai lona le toe fia faia o se isi lava solitulafono i le lumana’i.

Na talosaga lana Loia ia Michael White mo se faasalaga faanofovaavaaia e aunoa ma le toe tuuina atu o se isi faasalaga faa falepuipui e tuli e lenei ali’i.

Na taua e White e faapea, e ui i le matuia o le soltulafono a Tupa, ae ua talitonu lona loto e agavaa o ia mo se isi avanoa mai le Fa’amasinoga. Sa ia taua foi e faapea, o Tupa o se alii talavou ua sese lana faaiuga sa faia, ae tele se lumana’i lelei mo ia pe afai e toe tuu i ai e le Faamasinoga se isi avanoa mo ia.

Na taua e White le matuia o le gaioiga sa faia e le ua molia, peita’i o le itu e tau fesoasoani mo sona faasalaga mama, ua mae’a ona toe teuteu le mataupu i le lotoifale o le aiga. Na talosaga White mo se faasalaga nofovaavaaia e aunoa ma le toe tuuina atu i ai o se faasalaga faa falepuipui.

Na tetee malosi le loia a le malo i le talosaga a le itu tete’e mo se faasalaga nofovaavaaia. Na taua e le tamaitai loia ia Soule e faapea, e matuia tele le gaioiga sa faia e le ua molia, i lona faaaoga lea o se nofoa ua’ea malo e faaoo ai manu’a i le tino o le tamaitiiti laititi na aafia e aunoa ma se mafua’aga tatau. 

O Tupa, e pei ona taua e le loia a le malo, faatoa 2 tausaga talu ona ulufale mai i Amerika Samoa, a o lea ua fa’alua ona aafia o ia i solitulafono. O le tausaga na te’a nei na ta’usala ai o ia e le Faamasinoga Faaitumalo i le solitulafono mama o le faaoolima i le tulaga tolu, na nofovaavaaia ai o ia mo le 12 masina, a o lenei ua aafia o ia i le isi foi solitulafono e tai foliga tutusa lava.

O Tupa na fanau i Amerika Samoa, ae na soifua a’e o ia i Tonga. O le 2 tausaga talu ai na faatoa toe malaga mai ai o ia i le teritori, e le o iloa lava po o i ai ni faamaumauga e faatatau i ni solitulafono na aafia ai o ia i Tonga i le taimi atoa na nofo ai o ia. Pau le itu lea ua molimauina i le taimi nei e pei ona taua e le Loia a le malo, o solitulafono e pei ona aafia ai Tupa, ua atagia mai ai le ituaiga tagata e i ai o ia, o se tagata e ita leaga tele.

O le taimi na mae’a ai le faalavelave, na auina atu ai loa le tamaititi na aafia i lalo o le vaavaaiga a le Ofisa e Puipuia fanau laiti e aafia i sauaga (Child Protection Services) ma o loo tausia lelei i le Fale o Sulufaiga (Shelter) ona e le i lelei le auala na tausia ai e lo latou Tina i latou.

Na faaiu le faafinauga a le Loia a le malo i lona talosagaina o le Faamasinoga mo se faasalaga faa falepuipui mo Tupa, ina ia a’oa’oina ai lona mafaufau ma taofia ai lona toe faia o lenei gaioiga.

I le maea ai ona iloilo e le Faamasinoga o mau faamaonia uma e faatatau i lenei mataupu, na saunoa ai le afioga i le ali’i Fa’amasino Sili lagolago ia Fiti Sunia e faapea, e le o nofo lelei i finagalo o alii Faamasino le gaioiga sa faia e le ua molia, o lona sasa faamo’amo’a o lona (nephew) i se nofoa u’amea.

“Na ta’usala muamua oe e le Faamasinoga Faaitumalo i le solitulafono o lou faaoolima i se isi tagata, a o lea ua toe aumai oe i le solitulafono lava lea e tasi…” o le saunoaga lea a le Fa’amasinoga. Ma e atagia mai ai o ia o se tagata saua ma le le alofa. O ia fo’i o se tagata e aafia i le ita vave, ae a ita fo’i, e matua ita leaga lava, e pei ona taua e le Fa’amasinoga.

O se tasi o itu na taua e le Faamasinoga, o le tamaitiiti na aafia na malemo i le vai taele i le aso na tula’i mai ai le faalavelave, o lo o mana’omia fo’i e ia se fesoasoani, peita’i, e lei ofoina atu e le ua molia se fesoasoani i le tamaitiiti na manu’a, ae na ia tago i le nofoa uamea ma sasa ai o ia.

E 5 tausaga lea ua faasala ai e le Faamasinoga ia Tupa i le Toese i Tafuna. O le a faamalumalu lea faasalaga, ae ua nofovaavaaia o ia mo le 5 tausaga i lalo o tuutuuga e ao ona usita’i i ai. 

E 20 masina lea ua poloaina o ia e tuli i le Toese i Tafuna, o le a aofia ai ma masina e 5 lea ua mae’a ona ia tuliina i le taimi nei. Afai ae tatala o ia i tua, ua poloaina le ua molia ina ia saili sana galuega e totogi ai lana salatupe e $2,000.

Ua faasa o ia ona toe taumafai e faafesoota’i lona (nephew) na aafia i lenei mataupu i soo se auala, e le mafai fo’i ona ia taumafai e alu i le nofoaga o lo o i ai le Fale o Sulufaiga o loo iai lona (nephew)

Na faamamafa e le Faamasinoga ia Tupa, o le taimi lava na te soli ai se tuutuuga se tasi o lana nofovaavaaia, o le a le toe i ai loa se isi avanoa mo ia, ae o le a poloaina loa o ia e tuli atoa le umi o lo o totoe o lana faasalaga faa falepuipui e 5 tausaga.

Na faamanino fo’i e Sunia ia Tupa e faapea, ana o ia o se tagata na fanau i Tonga, e poloaina e le Faamasinoga o ia na te tuua le atunuu ae toe fo’i atu i Tonga, peita’i, e le mafai ona faia lea tulaga ona o ia o se tagatanu’u o Amerika Samoa.

O le afioga i le ali’i Faamasino Sili lagolago ia Mamea Sala Jr ma le afioga i le ali’i Faamasino Lagolago ia Tunupopo A. Tunupopo na lagolago i le afioga a Sunia i le iloiloina o se faaiuga mo lenei mataupu.