TALA I VAIFANUA

Pago Pago, AMERIKA SAMOA

SILIA MA LE 800 PALOTA UA MAE’A FAIA I LE ‘ABSENTEE”

Ua fa’ailoa mai nei le aotelega o palota “absentee” ua mae’a faia mai e i latou o lo’o malaga i fafo a’o loma le palotaga, i latou o galulue I le vaega au, le fanau a’oga o lo’o opea i a’oa’oga i le taimi nei i fafo, ma i latou fo’i o lo ua le mafai ona toe taliu mai i fanua ona o le fa’asa o le Covid-19, ua maua ai le silia ma le 800 o palota ua mae’a faia. 

O le faitauga lea ua fa’amauina e le Ofisa Palota talu mai le aso 26 o Oketopa. O lea la ua mae’a faitauina nei le 834 o nei palota uma ua mae’a faia o le “absentee”. 

Mo le 507 palota ua faia mai fafo o le absentee, 373 palota a i latou i lalo o le COVID-19 (o tagata Amerika Samoa o lo’o le mafai ona malaga mai i le teritori ona o lo’o tapunia alava’a talu ai le COVID-19); 118 i latou i le militeri; 11 o fanau o lo’o a’o’oga i kolisi ma le to’a 5 o lo’o galuluega mo le malo o Amerika Samoa, ae o lo’o nonofo i Amerika. 

Mo le palota absentee lotoifale (local absentee), e 327 i latou ua ma’ea faia palota e aofia ai le to’a 203 o palota a i latou e fa’aletonu le tino ma e le mafai ona alu i fale palota i le aso o le palota; 115 i latou malaga i fafo ma le to’a 9 o i latou e faigaluega i le fa’atautaiga o le Palota.

“O le faiga masani lava ua fa’ailoa mai e fa’atautaia ai le faitauga o le palota i le po o lea fa’amoemoe, ma e amata ona fa’asalalau sa’o mai le Ofisa Palota lea faitauga i le itula e 7:00 I le afiafi, ua tasi le itula talu ona tapunia le faiga o palota mai nofoaga e 41 ua mae’a fa’atulaga e faia ai lau palota,” o se tala mai lea a le Fa’atonu o le Ofisa o Palota, Uiagalelei Lealofi.

FOAI E LE PROM $5,000 - AMERICAN SAMOA COMMUNITY CANCER COALITION:

Mai le vaega tupe na mafai ona aoina e le “Pacific Roots Open Mic” lea sa faia o se fa’aaliga o manatu o le tupulaga talavou o le atunu’u i afuaga o le “Pule i le Soifua” ma sa fa’atauva lea fo’i taumafaiga. Ua mafai nei ona latou taua’aoina atu se meaalofa tupe i le Amerika Samoa Community Cancer Coalition, ina ia latou tuuina atu ia i latou ua po’ia i le Kanesa, ae ua talosaga atu mo se fesoasoani tupe mo i latou i na taimi pagatia.

O le PROM na lalamua ai nisi o talavou e to’alua, Traci Porotesano ma Tamiano Gurr i lona fa’atulagaga ma o se taumafaiga na va’aia le matagofie ma le lelei ona fa’atulaga ma fa’ataunuu. O fua o lea galuega lelei ona afuafua ma fa’ataunuu na matua iloga ai ona fa’atumulia le Fale Laumei atoa i le anoanoa’i o e na fia maimoaina taumafaiga a sui tauva i pese, o solo fa’atino ma tauloto, e fa’atatau i afuaga eseese e ono manatu ai le talavou pe o so’o se tasi lava e fa’ao’o ia te ia le oti.

O le foa’i lenei e $5,000. sa taua’aoina ina sa’o i le tamaitai o Va’atausili Tofaeono ma Luana Scanlan o le American Samoa Community Cancer Coalition (ASCCC), lea latou te taua’aoina atu meaalofa tupe ta’i $500. Mo so’o se tasi ua fa’amaonia mai lipoti fa’amau a foma’i, ua maua i le kanesa. O lea vaega tupe e mafai ona avea ma se fesoasoani e totogia ai lona pasese po’o talavai fo’i o latou  moomia E tele foi ina fa’asalalauina atu lava i latou uma ua taua’aoina i ai nei foa’i.

O le agaga o le fa’afetai sa mafai ona tuuina mai e nei tamaitai i le fanau talavou sa taua’aoina atu lea foa’i ma le agaga fiafia. O le afuaga fo’i lea o le la’ua naunau ina ia fa’atino lea fa’amoemoe na fa’ataunuuina, le PROM. Ina ia mafai ona fesoasoani i fa’aiuga a le fanau talavou ia taofia le pule i le soifua, ae o le taumafaiga foi e fesoasoani ia i latou uma ua a’afia i le Kanesa.

O lo ua iloga nei, ua mafaia e le fanau talavou ona fa’aaoga lea faiga e fa’ailoa atu ai o latou lagona o’otia ma o latou mafaufauga e fa’atatau i lea mataupu ma lea mataupu o lo’o a’afia ai o latou soifua talavou. Ua fa’afetaia e i latou lea avanoa ma ua manatu fo’i, e le muta ai i lea PROM lea fo’i faiga, o le a toe soso’o mai nisi PROM i le lumana’i, ia mautinoa o fa’afofogaina leo o le fia lagona ma o latou manatu e fia fa’aalia, ina ia amana’ia i fa’aiuga faia a le tatou malo ma ana tautua eseese.

“O fua fa’aaliali nei o le taumafaiga a le tupulaga talavou e lagona o latou leo, ma fa’aalia mai o latou noanoataga o lagona fa’aletagata, lea na fa’atino ia Oketopa 03, 2020 ua maua ai lenei foa’i tele mo i latou ua po’ia e le Kanesa,”o se tala lea a le tamaitai o Scanlan ina ua taua’aoina atu lea siaki mo le ASCCC.

MAUA LE OFISA DPS FAGATOGO – SIPILI O LE VAITAU O LE HALLOWEEN

Mai le taeao o le aso Gafua na alausu ai le vasega o sui totoa lava o le Ofisa o Leoleo i Fagatogo ina ia latou taumafai e fa’afiafiaina ma tautua ma le agaga o lenei vaitau le latou Ofisa atoa.

O i latou ua oso i luga o le fua ua aofia ai, le to’aona o i latou, ma ua fa’atauva fo’i i latou i ni vaega ua fa’atulaga e latou te saunia ai ni latou teuga fa’apitoa, mo lenei tausaga ma le vaitau o le Halloween.

O i latou nei ua va’aia le fa’asalalauina atu o latou ata i lomiga ta’itasi o lenei vaiaso ina ia taga’I toto’a i ai le mamalu lautele, ua le fo’i i latou mai le auau o le fa’amoemoe, ia faia galuega uma ma le fiafia, ma ia “Seu le manu ae taga’i i le galu.” O le aso Gafua sa tauva ai i latou i toniga matagofie a Mickey Mouse ma Minnie Mouse, poo ai lava e filifili le sui tauva e fa’aaoga.

“Ua va’aia e i ai Miki ua la’ei mai fa’atulafale Samoa ma ua faia lelei lana pe’a fa’apipi’i, o lana ulafala ma teuga fa’atulafono o le to’oto’o ma le fue. O se ema mata’ina fo’i lea i lea tauvaga. E lelei tele agaga o I latou o tauva, e taumafai e gaosia se Mickey Mouse Samoa,” o se tala lea a se tasi na maimoaina lea tauvaga.

Aso Lua ua fa’atulaga e i latou e tauva ai i pulou eseese. Ua i ai pulou ua matua masi’i mai ma laupapa fa’ase’e. O isi ua fa’aaoga pulou ovaova le tetele. Ae ua latou iloa lelei lava sui o lo’o fa’aatagia e i latou ma ua fa’ailoa mai e i latou na sui i a latou fa’amatalaga ina ia togia aga’i i ai le latou taumafaiga lenei.

Aso Lulu ua fa’atulaga ai le latou tauvaga o matapulepule o so’o se ituaiga. O le a maimoaina lava le fa’agasologa o lea tauvaga se’ia oo I lona toe aso.  Ua fa’atulaga e i latou le aso Tofi mo le toe aso o faigamea, ma o le a tauva ai i le Tauvaga Purinisese. Kalofa e, e muliga nei ofu o le lotu a tamaiti a le fanau i le mea o le a tupu i lenei tauvaga. Ia manuia la’asaga o totoe o le fa’amoemoe, e maimoaina lava mea uma ele atunuu, ma o i latou fo’i o le a fesoasoani ina ia maua le i’uga lelei mo lenei tauvaga.