Tala I Vaifanua

Pago Pago, AMERIKA SAMOA - 

VAIASO FA’ATAUA TAUTUA A FALETALAVAI & LATOU AUFAIGALUEGA

Na fa’atasi atu le tatou Faipule i le Konekeresi, Aumua Amata i le aso fa’apitoa na faatulaga e le Fale Talavai i le tatou falema’i tele i Faga’alu, e asiasi atu nisi e latou te fa’ailoa atu i ai latou galuega taua o lo’o fa’atino i aso ta’itasi e tautuaina ai le atunuu lautele.

“Fa’afetai mo le galuega faifai pea i aso ta’itasi e tautua ai le atunuu. O i latou e va’ai toto’a i vaila’au olo’o togafitia ai le gasegase o e ua mama’i ma vai fo’i e puipuia ai le soifua tuputupu a’e maloloina o le fanauiti i le tatou atunuu. Fa’amalo le tautua, fa’amalo le galulue punouai ia mautinoa o tausia lelei o tatou tagata.”

I le pulega sa ia fa’ailoa atu fo’i lana fa’afetai,”O le tele o taimi e aluga lelei ai le soifuaga, e le o amana’ia lava le tele o le galuega o lo’o gapatia ai le aufaigaluega ae maise le pulega ina ia mataituina o lo’o sa’o ma lelei le tautuaina o tagata lautele. Ua galo atu ai ma le vaega tele a le aufaigaluega o faletalavai o loo mulimuli lava i ai le taumafaiga ia toe maua ni vaifofo i le soifua gagau o le atunuu.”

“E taua tele aua a sasi mai le toe la’asaga lenei, o lona uiga e misi atoa le taumafaiga a Foma’i o lo’o taumafai e togafitia gasegase o e na asiasi ane mo se vaifofo. O le taua lea o la outou galuega faifai pea, fa’afetai le galulue fa’amaoni ma le mata’alia.”

O le masina lenei o Oketopa i tausaga ta’itasi ua avea fo’i ma masina e fa’atulaga e fa’ataua ai Faletalavai ma i latou uma o loo faigaluega ai.

E ese mai ia i latou e asiasi ane e fia faia talavai, ua faapea fo’i ona latou va’aia atoa le aotelega o gasegase o lo’o fa’ataotolia i le falema’i ma o latou togafitiga, e tatau lava ona sa’o lelei vaila’au ua fa’atonuina e foma’I, ma le tele fo’i o nei vaila’au ua fa’atonuina e fa’aaoga mo gasegase eseese.

SOLOGA LELEI TOGAFITIGA ALII TINEIAFI –  AAFIA FAALAVELAVE I AFONO/AUA

O se tala fiafia o lo ua maua mai le sailiga togafiti a le alii tinei afi talavou Taitaifono Tinei Igafo, lea sa mua’i auina atu i Niu Sila, peita’i o lea ua i ai nei i Spokane i le setete o Uosigitone, ma ua tele lava lona suiga i le taimi nei.

O le fa’alavelave tau ta’avale lea sa tupu ia Aperila 30, 2020 ma amia ai le soifua o nisi o alii Kapeteni e to’alua. O le to’alua lea sa nonofo i le nofoa pito i tua o aveta’avale lea na sao mai i lenei fa’alavelave, o se tasi o Taitaifono Igafo.

I le mae’a ai o togafitiga sa faia mo Taitaifono i Christchurch i Niu Sila,ona toe taumafai lea e sailia isi togafitiga mo ia ma ua toe auina atu ai o ia i Spokane, ma ua maua ai ma le avanoa e fetaui ai o ia m se tasi o lona aiga.

O le avanoa ua fetaui ai o ia ma sui mai lona aiga, ua atili fa’afiafiaina ai o ia ma ua unaia malosi ai Tinei ia fa’amalosi atili i ona togafitiga.

Ua fa’ailoa mai fo’i, ona o le fa’alavelave na a’afia ai Taitaifono, ua pe atoa ai lona tino mai le fatafata e oo atu i ona vae.O le afuga lea na faatopetope atu ai o ia i Niu Sila i le vaalele togipau, ma togafitia o ia i Christchurch Burwood Spinal Unit. O Setema na fa’ato’a auina ane ai o ia i Aukilani e tapena ai lona si’itia atu i St. Lukes Rehabilitation i Spokane.

“Ua fa’afetaia lava le mamalu o aiga ma uo mamae a Taitaifono ona o tatalo si’itia mo ia, ua iloga ai lona naunau ina ia toe fa’afo’i mai lona malosi. Ae silisili ai o le fa’afetai i le vasega o aiga ma nisi o le mamalu lautele sa latou si’itia atu lona gasegase ma ona togafitiga i le Atua e ona le malosi, a’o amatalia mai ona togafitiga i Niu Sila,” o se fa’afetai lea mai le ali’i tinei afi.

“O le oo mai o Tinei i Amerika, ua atili ai ona vavalalata ma i matou uma o lona aiga. Ae sili ona fa’afetaia ai e i matou uma le agalelei ma le alolofa o i latou uma na asia ma tausia lona gasegase i Niu Sila, o nisi o matou aiga ae o nisi e matua fou lava ia i matou, ae ua aiga uma i le alofa ma le agalelei le fa’atuaoia.”

“Sa matou taumafai atili lava ina ia fa’ao’o mai Tinei i Amerika, lea ua taunuu lea fo’i fanoga, fa’afetai ia i latou uma na mafai ai ona fa’ataunuu lea fo’i fanoga, ae silisili lava le faafetai i le Atua ua mafai ona taunuu lea fa’amoemoe. Peita’i o le fanoga sili lava o totoe nei, o le toe fia va’ai atu ia te ia, ua toe savali mai,” o se tala lea a nai ona matua.

4 FOA’I A LE BLUESKY AMERICAN SAMOA FAIA MASINA OKETOPA

Mai le amataga o lenei masina o Oketopa 2020, ua faia ai ni foa’i taua e le Kamupani Telefoni a le Bluesky American Samoa I nisi o fa’alapotopotoga i totonu o le atunuu.

O le foa’i na fa’ato’a mae’a atu nei o le foa’i lea mo le “SDA Hope Choir Concert” lea sa faia i le Gov. Rex Lee Auditorium I Utulei I le afiafi o le aso Tofi na te’a nei, lea sa fa’aautu o se sailiga vaifofo i le fa’afitauli tau “Pule i le Soifua.” O lea foa’i sa tolaulauina lava e $1,000.

O le vaitau o le Lotu a Tamaiti sa manatua ai e le Pulega ma le Aufaigaluega a le Bluesky American Samoa le fanau e le’i uma le pule ma le tausiga a matua i o latou soifua ma’ale’ale, ae ua nofoia nei nofoaga o sala i le Juvenile i Tafuna. Sa fa’apa’aga i latou ma le Itu Tau Aoa’oga Fa’asamoa i le tatou Kolisi Tuufa’atasi i lea fa’amoemoe lelei ma latou asia fa’atasia ai lea vaega o le fanau. O i latou na ua le fa’aasi ma aiga i le taimi ua vagaia ai e matua se Upu tu’ualalo a le fanau, e fa’atatau i mataupu silisili o le Tusi Pa’ia.

O latou mea na tapena mo le asiga o lea vasega o le fanau, ua tapena ane ai se Televise 43 Inisi le tele ma ua mae’a fa’auia i ai ma le auaunaga fa’a-polokalama a le Moana Cable TV mo le tausaga atoa e maimoa ai lea vasega o fanau talavou i fa’asalalauga o mea tutupu i le atunuu ma polokalama aoga mo le latou silafia ma le maimoa i lea taimi umi.

O le foa’I na tula’i malosi le Bluesky e fa’atautaia fa’atasi ma nisi o pa’aga o le Ta’amilosaga Netball ale SCOPA Halloween lea na va’aia sa tiga timuga ae na fa’ataunuuina lava i le fa’aiuga o le vaiaso na te’a nei, Oketopa 24, 2020 i le Kanana Fou Gymnasium.

Sa fa’atautaia le ta’amilosaga Netball lea i ona vaega e lua: Alii ma Tamaitai, ae o le latou auau “I ona po lava ua Leva!”

O fa’ailoga sa fa’atauva i ai ‘au na fa’aulu mo lea ta’amilosaga, sa saunia lea e le Bluesky Amerika Samoa ma le Silva Construction. O fa’ailgoa na tapena e mo ‘au e tolu e lautogia i le manumalo tulaga lua ma le tolu, ma fa’ailoga o le tagata ta’alo lelei mo tama ma teine, ae silisili ai le tagata e sili ona matagofie ana teuga fa’a aso la ua leva.

Ma le foa’i na faia ia Oketopa 10, 2020 e le Bluesky Amerika Samoa i le Asosi a Tagatanuu o Fiti o lo’o alaala tumau i Amerika Samoa ma galulue ai. E $1,000.le tinoitupe ma nisi o mea ua manatu e aoga mo le latou fa’amanatuina o le sisi a’e o le latou tagavai o le Manumalo fa’amalo tuto’atasi ua atoa ai le latou 50 tausaga o le Malo o Fiti.

Ona o le Bluesky i le taimi nei ua fa’atautaia mai e se Kamupani Fiti na latou fa’atauina, e lea ua agaga ai fo’i i latou e fesoasoani malosi mo le Asosi a o latou tagatanuu o aumau ma galulue po’o malaga asiasi mai fo’i i le tatou nei malo.