Pu’e faapagota i le gaoi ae maua ai e Leoleo fualaau fa’asaina

Pago Pago, AMERIKA SAMOA
 

Ua taofia nei I le Toese I Tafuna ia Filise Mano, e 32 tausaga, lea sa tuuaia I lona osofaia o se fale I Iliili i le aso 11 o Me, 2020.  I le taimi na pu’e faapagota ai e leoleo ia Mano, sa o latou maua ai fo’I ni fualaau faasaina I totonu o lona laei.

I le faalavelave o lo’o tuua’ia ai Mano, sa faafesootai mai ai e se tina ia le Ofisa o Leoleo mo se fesoasoni, ona o lona fale na osofa’ia I le po ua tuana’i.

Sa faamatalaina e lenei Tina I leoleo, sa faateia o ia ma lana fanau ina ua o latou usu atu e asi le latou fale, sa o latou iloa molimauina ai le paepae solo o ni mea totino mai totonu o le fale, I luga o le mutia I fafo o le lotoa, pe a ma le 50 iata le mamao mai le fale.  Ma sa o latou siakiina totonu o le fale ma molimauina ai le tele o mea totino I totonu o le potu malolo ma le fale taavale, o paepae ai isi mea totino mai totonu o le fale.

Sa molimauina e leoleo na o’o atu I le maota o lenei tina, ni mea totino sa paepae solo I fafo I le lotoa ma totonu o le fale taavale, na aofia ai lavalava, atopa’u, pea seevae ma le laulau.  Sa molimauina foi e leoleo le tele o isi meafale sa fola solo I totonu o le potu malolo ma potu moe.

I su’esu’ega a leoleo na masalomia ai, e le to’atasi se tagata na aafia I le faatinoina o lenei solitulafono.

E 4 vaiaso talu ona tuana’i le faalavelave ae mafai loa ona talanoa Leoleo i nisi o molimau, ma sa faamatala e se tamaitai e faapea, o le 12:00 i le po o le aso 10 o Me, 2020 ao la talatalanoa ma lana uo tamai luma o le latou fale (e tuaoi ma le fale sa osofa’i) na la vaaia ai ni ali’i se to’alua o feoa’i solo i luma o le fale ma la moli uila. Sa ia fesiligia nei alii, ae na tali mai se alii sa ofu I se mitiafu lanu mumu ma se ofuvae pupuu lanu uliuli, o lo’o la tau saili se tagata na taumafai e ulufale faamalosi I totonu o le fale.

Sa ta’ua e lenei tamaitai, e Masani I le alii lea sa ofu I le mitiafu mumu, o lona igoa o “Fritz”,  e masani ona talanoa ma le isi ana uo teine.

Sa faailoa foi e se tasi o molimau e nofo latalata I le fale na osofa’I, lona vaaia o le ta’avale a le ali’I ua molia I lenei mataupu, o paka I autafa o le auala, e le mamao mai le fale na osofa’ia ma sa ia ofuina se mitiafu lanu mumu ma le ofuvae pupuu lanu uliuli.

E 2 masina talu ona tuana’i le faalavelave ae faafesoota’i loa e se tamaitai e 28 tausaga ia le Ofisa a Leoleo I Tafuna ma ia faailoa atu i Leoleo, sa la faauo ma Mano ae ua lua (2) masina talu ona faamuta le la mafutaga.  Na ta’ua e lenei tamaitai, na vili atu Mano e faamanuia atu lona aso fanau ia Iulai 15, 2020.  Na fa’ailoa atu e Mano I lenei tamaitai, o lo’o iai sana meaalofa mo lona aso fanau.  O le aso na soso’o ai, na o’o atu ai Mano I le fale o tamaitai ma lana meaalofa, na aofia ai se Laptop ma se Uati.

Na fa’ao’o atu e lenei tamaitai I leoleo, mea uma sa tu’uina atu e Mano ia te ia. Ma ina ua fa’aali e leoleo I le tina e ana le fale sa osofa’ia, na fa’amaoni ai e le tina, o isi ia o mea totino sa gaoia mai I lona fale I Iliili.  

O le masina o Setema na talosagaina ai loa e Leoleo ia le tamaitai lea sa faauo ma Mano, e faafeso’ota’ia Mano mo se la feiloaiga.  Sa fa’ate’ia Mano, a’o la talanoa ma lenei tamaitai, ae osofa’ia le nofoaga sa la iai, e Leoleo ma ave faapagota ai loa o ia.

Ao le ‘i auina atu Mano i le Ofisa o Leoleo i Tafuna mo suesuega, na saili e Leoleo lona tino mo ni aupega, ae na maua ai I totonu o le taga o lona ofuvae pu’upu’u ni pepa iila laity se lua (2), o iai ni pauta pa’epa’e.  Ma I su’esu’ega sa faia I nei pauta, na faamaonia ai, o ni fualaau faasaina o le Aisa.

Ina ua fesiligia Mano e tusa ai o le fale i Iliili lea na osofaia ma ave faagaoi ai le tele o meatotino, na ta’utino le ua molia, o laua ma lana uo na la osofaia le fale.   Na la talepeina le faamalama pito i tua o le umukuka ma maua ai le avanoa la te ulufale ai i totonu.

O lo o tau sailia pea e Leoleo i le taimi nei le ali’i na to’alua ma Mano i lenei solitulafono.  O le tele o meatotino na ave faagaoia, e le i mafai ona toe maua ona sa faatauina e Mano ma lana paga mo tupe mo a la fualaau faasaina.

O le masina na te’a nei na ulua’I tula’i ai Mano i luma o le Fa’amasinoga Faaitumalo. O le ali’i Loia Fautua ia Michael White na tula’i mo ia ae o le ali’i Loia Sili lagolago ia Robert Morrison na tula’i mo le malo.

E lua (2 tagi ua faila e le malo fa’asaga ia Mano.  I le tagi muamua, ua molia ai Mano i moliaga e lua (2) o le talepe fale i le tulaga lua, faapea ai moliaga e lua (2) o le gaoi, o le vaega C lea e mafai ona

fa’asala ai se tasi i le Toese mo le umi e le silia i le fitu (7) tausaga, po o le salatupe e le silia i le $5,000, poo le faasala fo’i i le isi faasalaga lea e mafai ona oo atu ai le salatupe i le $20,000.

I le tagi lona lua faasaga ia Mano, ua tu’uaia ai o ia i le moliaga e tasi o lona umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese I le va o le 5 ma le 10 tausaga, po o se sala tupe e o’o atu I le $20,000, po o le faasala I faasalaga uma e lua.

E $25,000 le vaega tupe lea ua fa’atulaga e totogi ona faatoa mafai lea ona tatala le ua molia i tua mai le Toese i Tafuna.

O le lua vaiaso talu ai na tofu atu ai le mataupu a Mano i le Faamasinoga Maualuga, ma ia teena ai tu’uaiga faasaga ia te ia.

O le masina o Tesema o le tausaga nei lea ua faatulaga e faia ai lana ulua’i iloilioga.