Tala I Vaifanua: TALIA TALOSAGA TALOFA AIRWAYS MALGA I MANU’A

Pago Pago, AMERIKA SAMOA — O le vaiaso lenei sa fa’aalia ai e le Matagaluega a le fetarale, the Transportation Department (USDOT) lo latou talia o le talosaga a le Talofa Airways mai Samoa e fa’atautaia malaga i le va o Tutuila ma Manu’a.  O le umi o lea fa’atagaga e 30 aso ma o le a amatalia ia Oketopa 26, 2020.

Ua ofo e le Talofa Airways e mafai ona faia malaga e lua i aso ta’itasi mai  le aso Gafua se’ia oo i le aso Faraile i le malae va’alele i Fitiuta, peita’i e le’i faia mai se tala i se malaga mo Ofu.

Ua fa’ailoa mai i lea fo’i ofo mo malaga e mafai ona faia e fa’aaogaina ai le latou va’alele o le ituaiga Commander 690B.O taimi o malaga ua ofo mai e amata faiaiI itula ogatotonu o le taeao ma itula fo’i o le aoauli o nei aso ta’itasi o le vaiaso.

“Ua fa’atagaina e lenei vaega o le Malo tele la outou kamupani va’alele, le Talofa Air, ina ia fa’aaogaina le latou va’alele e faia malaga ua faatulaga I le va o Tutuila ma le Manu’atele e fa’aaogaina ai la outou va’alele ua mae’a pasia mo femalag’aiga e 9 atuganofoa Twin Commander 690B mo le 30 aso e afua mai ia Oketopa 26, 2020 ae fa’amuta le avanoa ia Novema 24, 2020 poo le atoaga o le lima aso talu ona gafatia e mafai ai e Amerika Samoa ona fa’atautaia se latou lava kamupani va’alele mo nei feoa’iga, poo le a lava e muamua mai,” o se tusitusiga lea a Joel Szabat o le USDOT. 

“O se mea mautinoa, ua fa’aumiumi lava ona a’afia feoa’iga i le ea i le va o atumotu o Amerika Samoa, ma ua fa’amaonia fo’I lea tulaga I tusi na taua’aoina mai e sui iloga o le malo e sapaia lenei talosaga a le Kamupani va’alele a le Talofa Air, ina ia talia le latou talosaga lenei. Ua fa’aumiumi fo’i ona leai se kamupani va’alele e fa’atautaia lava I totonu o Amerika Samoa ina ia soloia ai le talosaga mai pea o nei kampani va’alele mai isi malo e le o se teritori po’o se setete o Amerika.”

Ona o lea ua mae’a fa’ataga mai mo femalaga’iga nei va’alele a le Talofa Air, ua tatau ona I ai se fa’asalalauga fa’alaua’itele a i latou e fa’ailoa atu ai I le mamalu lautele o le atunuu, ua agava’a I latou mo faigamalaga I le va o Tafuna ma Malaeva’alele a le Manu’atele.

O le taimi nei o lo’o tautuaina malaga i Manu’a e le Samoa Airways.

TALANOA MA FAI’AIGA MA SE TASI E FAUTUA LELEI

O le tamaitai faia’oga o le Tausaga 2020 -2021 a le Matagaluega o Aoga, a’o le faia’oga o le Gagana peretania i le a’oga maualuga a Samoana, Mrs Sabrina Sulua’i Mahuka, ua ia toe fa’ata’ita’ia nei le fa’atautaiga o lana vasega e tusa o le faiga sa aoaoina ai o ia i lona taimi a’o avea ma teine a’oga tausailia le atamai i lana vasega fo’i  Samoana lava.

“O mea uma lava sa aoaoina ai a’u e o’u faia’oga i vaitaimi a’o avea au ma teine aoga i le a’oga maualuga a Samoana, lea fo’i ua ou toe aoaoina ai la’u vasega o fanau a’oga i le a’oga maualuga lava i Samoana.O le vasega fo’i lenei ma le fa’atinoga lea, sa ou manatua lelei ai, na fa’atalanoa ai e i ma’ua ma le sui sa ou vala’auina fa’aaloalo ma te tausasami ma talanoa tima’i mo a’u i le lumana’i o a’u taumafaiga.”

O lea la ua fa’asoa mai le tamaitai faia’oga, ma ua fa’atauanau i le fanau a’oga o lo’o ia a’oa’oina i le Igilisi i le Samoana High, “Ia outou fa’alogo ma usita’ia fautuaga o le a tuuina atu e a outou sui faufautua na vala’aulia fa’apitoa tou te faiaiga ma talanoa mo se latou fo’i fautuaga mo outou. O mea uma nei sa fautuaina ai a’u ua ou tausaili ma ua ou maua, e ui ina e le’i mae’a lelei, ae ua taunuu le tele o mea sa ma’ua fetufa’i ai i lena vaitau.”

O Oketopa 26, 2020 ua fa’atulaga e Sulua’i Mahuka e fa’atino ai le poloketi aoga tele e le fanau a’oga i le latou aoga lava i Utulei.

Mo i latou o le a vala’aulia e le fanau a’oga, ia alofagia ia e i ai ma sauni mo sau vaega e fa’atino ina ia mafai ona aoga mo le soifua taumafai o fanau I a’oa’oga, ae ia tima’ia fo’i i latou i ni fautuaga e aoga mo le latou lumana’i. O se fa’aeaga sili o le a e maua pe afai o le a vala’aulia fa’apitoa oe e se tasi o fanau a’oga a lea faia’oga sogasoga. O sui fautua nei, e le tatau ona toe aumaia ai lava ele tamaititi a’oga lona lava matua, e tatau ona ese mai le sui nai lo le lotoifale o lona aiga.

Ua fa’ailoa mai, e Sulua’i Mahuka, “Ina ua mua’i fa’asalalauina lenei aiga ma fa’atalanoa fautua le fanau a’oga e nisi, ua iloga ona to’atele i latou ua fa’ailoa mai ai o latou taofi fiafia ma le talisapaia o le fa’amoemoe.”

Ua i ai lona taofi, “Afai o le a toe fa’atautaia i le isi tausaga a’oga fou po’o se isi ana vasega mulimuli mai i lenei tausaga lea faiga, o le a si’itia fo’i le tulaga e fa’atautaia ai, ma fa’aaoga ai so’otaga o le ZOOM mo lea fa’amoemoe.”

SAILIA TOTINO KOMITI FA’AFOE -FAASAO O LE GATAIFALE [NMS]

O le pulega a le Fa’asao o le Gataifale o Amerika Samoa po’o le National Marine Sanctuary ua latou fa’ailoa mai i le atunu’u ua tausailia nei e I latou ni sui iloga ma le agava’a e avea ma totino o le latou Komiti Faufautua e Fa’afoea galuega ma tiute uma e fia fa’atulaga ma iloilo toto’a e I latou nei e tusa o aiaiga uma o le fa’asao i le atunuu.

Ua fa’ailoa ituaiga o sui o lo’o ua latou sailia ma iloiloina toto’a ina ia mautinoa o lo’o galulue I latou ma le agaga atoa e atili sapaia galuega ma mea uma o lo’o fa’agasolo mo le atina’e ma le fa’aleleia atili o lenei fa’asao I le gataifale o Amerika Samoa.

Ua mafai ona talia talosaga mai so’o se tasi ua manatu ane o ia, o lo ua ia fia tautua I nei tofiga: ui mai le atunuu: Itu I sisifo o Tutuila; Sui Talavou [18-25 tausaga le matua]; Sui mai le Matagaluega o Aoga; Sui mo Ta’aloga e faia i le Gataifale poo le Ecotourism; Sui mai le atunuu – motu o Swains.

O tusi talosaga uma e tatau ona fa’aulu mai a’o le’I mae’a itula faigaluega o Oketopa 31, 2020, ma afai ae le maua lea taimi e lau talosaga ua le fa’aaogaina lau talosaga. E tatau ona fa’amaonia i le fa’amau fa’ailoga a le falemeli le melia o lau talosaga i le aso 31 Oketopa ma luma mai o lenei lava masina.

 Mo nisi fa’amatalaga ma le fia maua o le kopi o le tusi talosaga o le a maua lea pe a e asiasi ane i le Uepesite a le Nationa Marine Sanctuary of American Samoa Advisory Council. https://americansamoa.noaa.gov/council/recruitment/ Poo le fa’afeso’ota’i mai Alaese Tauofe i lana [email protected]

O lo ua fiafia lava le Pulega a le National Marine Sanctuary e fa’ailoa atu, e latou te fiafia e fa’aulufale mai sui fou i totonu o le latou komiti fa’afoe I tausaga ta’itasi pe a sailia nisi e tutula’i mai e faufautua le latou fo’I matata e fa’atautaia mo le atunuu ma le fa’asao.

A mae’a ona taua’aoina lau talosaga e toe siakia lava fo’I le iuga o lenei talosaga I le uepesite ua fa’ailoa i luga ma lau emeli.