Falepuipui se ali’i i lona umia faanana o fualaau fa’asaina i le atunu’u

Pago Pago, AMERIKA SAMOA-

E 20 masina lea ua faasala ai e le Faamasinoga le susuga a Thomas Agasiva, o se tasi lea o tuutuuga o lana nofovaavaaiae 5 tausaga, ina ua faamaonia e le Fa’amasinoga le solitulafono o lona taumafai lea e faaulufale faanana mai i le atunuu vaega o le laau faasaina o le mariuana.

O le 2 vaiaso talu ai na tulai ai Agasiva i luma o le Faamasinoga mo le tuuina atu o lana faasalaga. Na uluai molia o ia i le solitulafono mamafa o le umia faasolitulafono o vaega o le laau faasaina o le mariuana; faapea ai ma le moliaga o le umia faasolitulafono ma le faamoemoe e tulei ma faatau atu i isi tagata.

Ae i lalo o se maliliega na sainia e le ua molia ma le malo, lea fo’i na talia e le Faamasinoga i le masina o Aokuso na te’a nei, na malie ai Agasiva e tali ioe i le moliaga muamua lea na toe teuteu e le malo lona mamafa, ina ia faailoa ai le moliaga o lona taumafai e faaulufale faanana mai i le teritori vaega o le fualaau faasaina o le mariuana, o le vaega D lea o solitulafono mamafa, lea e mafai ona faasala ai o ia mo le umi e le silia i le 5 tausaga, pe faasala i le salatupe e le silia i le $5,000, pe faasala fo’i i faasalaga uma ia e lua.

I le tali ioe ai o le ua molia i le moliaga e pei ona ta’usala ai o ia, sa ia tautino ai e faapea, i le aso 20 o Setema i le tausaga e 2019, na ia taumafai ai e faaulufale faasolitulafono mai i Amerika Samoa vaega o le fualaau faasaina o le mariuana, e ala i le aumai faanana i totonu o le sipika na aumai i le uta a le vaalele o le Hawaiian Airlines, ma faatuatusi mai i lona igoa.

Ina ua fesiligia e sui o le Ofisa o Tiute le ua molia i le ulua’i taimi na faatoa alia’e mai ai lenei mataupu, sa ia faailoa i ai e fa’apea, o le afifi lea na aumai i lona igoa, o le afifi a lona uncle, lea sa ia talosaga atu ia te ia, pe mafai ona faaauala mai ia te ia lana afifi mai lona aiga i fafo, o lo o aumai ai lana meaalofa, o le sipika.

Ina ua toe fesiligia faalua le ua molia e uiga i lenei mataupu, sa ia faailoa ai i Leoleo e fa’apea, e leai sona manatu o ni fualaau faasaina o lo o i totonu o le afifi na faatuatusi mai i lalo o lona igoa, ae na faatoa ia iloaina lava ina ua fesiligia o ia e sui o le Ofisa o Tiute i le malae vaalele i Tafuna.

A o lei tuu atu le avanoa i le alii ua molia mo sana faamatalaga faaiu ao lei tuu atu lana faasalaga, na valaau e lana loia lona Tina ma lana Faifeau i luga o le nofoa molimau mo ni a laua faamatalaga e faatatau i le latou mafutaga ma le ua molia.

Na taua e le Tina a le ua molia i lana molimau, o le ua molia o se alii usita’i ma faamaoni i totonu o le aiga, e fiafia fo’i o ia e faatasi atu i soo se faagaioiga a le Ekalesia. E ui e le inupia pe ulaula o ia, ae o faafitauli e pei ona aafia ai o ia, na mafua mai lea ina ua amata ona pipii atu i nisi o ana uo i totonu lava o le nu’u.

Na faauilavea le Faamasinoga ma fesili i le Tina pe na te iloa poo ai igoa o uo a lana tama lea e masani ona latou mafuta ma faatasi i le tele o taimi e toesea ai o ia mai le latou aiga. Na lulu le ao o le Tina ma tali atu i le Faamasinoga, “Ou te le iloa igoa o uo a la’u tama, sei vagana ai o latou foliga ou te masani ai, aua e masani ona o atu i le matou fale e tafafao ai”.

Na faaiu le molimau a le Tina i lona talosaga lea i le Faamasinoga mo se faasalaga mama mo lana tama, ina ia faaauau ai pea ona latou mafuta ma toe fuatai se isi moemoe fou i lona olaga.

Na tutusa le molimau a le Tina ma le molimau a le ali’i Faifeau na folasia i le Faamasingoa e faatatau i le olaga tuputupu a’e o Agasiva. Na taua e le alii Faifeau i lana molimau, o Ifopo o se alii e tu malosi i soo se faagaioiga a le Autalavou, e fiafia fo’i e auai i soo se faagaioiga a le Ekalesia. E le gata o se alii talavou e malosi le ola Faaleagaga, ae o se alii talavou fo’i e faatuatuaina i soo se mea fai a le Ekalesia.

Na faatoese le ua molia e tusa ai o lana solitulafono , ma ia talosagaina ai se isi avanoa mo ia se’i toe fo’i atu ai i tua e tausi lona aiga aemaise le sailia o se galuega e tausi ai lona to’alua ma lana fanau.

Na taua e le alii ua molia lona aoaoina o se lesona taua mo lona olaga i le lumana’i, talu mai le taimi na taofia ai o ia i le Toese mo le silia i le 12 masina. Sa ia ta’utino i le Fa’amasinoga, na te le toe solia se tulafono pe afai e tuu atu e le Faamasinoga se isi avanoa mo ia e fo’i atu ai i tua i lona aiga.

“Lau afioga i le Faamasino, ua ou iloa e le o se mea lelei sa ou faia, o lo’u soli lea o le tulafono ma ma’imau ai aso e tele o lo’u olaga i le Toese. Ua ou vaaia le to’atele o isi tagata e pei o a’u o loo nofosala i le Toese, ma ma’imau ai aso e tele o latou olaga, e le gata i Tama matutua ma tagata e fai ta’ito’alua ma fanau, ae oo lava fo’i i tupulaga talavou, ma ua ou manatu ai loa, e le tatau ona ou toe oo i lea tulaga,” o le molimau lea a Agasiva i le Fa’amasinoga.

Na talosaga lana loia fautua i le Faamasinoga mo se faasalaga faanofovaavaaia, e aofia ai le avanoa e tatala ai le ua molia i tua e faigaluega e saili ai se tupe e tausi ai lona aiga. Na taua e le loia a le ua molia e fa’apea, e leai se lesona aoga e maua e le ua molia pe afai ae taofia o ia i le Falepuipui, sei vagana ai le atili lea ona aafia lona olaga i le faafitauli o le umia o fualaau faasaina.

Na lagolago e le loia a le malo le talosaga a le itu tete’e mo se faasalaga faanofovaavaaia, a ia aofia ai ma se taimi faa falepuipui e tuli e le ua molia i le Toese i Tafuna. Na taua e le itu a le malo e faapea, e matuia le gaioiga sa faia e le ua molia, o lona taumafai lea e aumai faasolitulafono i le teritori se vaega tele o fualaau fa’asaina.

Na faatepa e le Faamasinoga loia a itu e lua ina ia toe silasila toto’a i le Ripoti a le Ofisa Faanofovaavaaia, lea o lo o taua ai e le ua molia igoa o i latou e ana fualaau faasaina na aumai faanana i lalo o lona igoa.

O le finagalo o le Faamasinoga, e tatau i le malo ona vaai toto’a i lenei faafitauli, ona o lea o lo o atagia mai ai le aafia ai o nisi e aiga i lenei alii talavou, a ua latou faaaoga lenei alii talavou e faaauala mai ai fualaau faasaina mo a latou pisinisi.

Na taua e le Faamasinoga le matuia tele o le gaioiga na faia e le ua molia, i lona taumafai lea e aumai faanana i le atunuu fualaau faasaina, ma lona manatu e le maua o ia i le malae vaalele.

E 5 tausaga na manatu le Faamasinoga e faasala ai Agasiva i le Toese, peita’i o le a faamalumalu lona tulia o lea faasalaga, ae nofovaavaaia ai o ia mo el 5 tausaga i lalo o tuutuuga e ao ona usita’i i ai.

O ni isi o ia tuutuuga e aofia ai lona tulia o masina e 20 i le Toese e aunoa ma le tatala o ia i tua. E mafai e le Faamasinoga ona talia se talosaga mai lana Loia Fautua e tatala ai o ia i tua e faigaluega ao tuli ai pea lana faasalaga, pe afai e faamaonia le i ai o se galuega tumau e galue ai le ua molia ma maua mai ai sona totogi.

E $1,000 le sala tupe e totogi e le ua molia, atoa ai ma le faia o ni suega i lona tino i soo se taimi ina ia faamaonia ai, na te le tagofia fualaau faasaina poo le ‘ava malosi.