Molia se tagata faigaluega falema’i LBJ i lona faia o faamaumauga sese

Pago Pago, AMERIKA SAMOA - 

O le vaiaso nei na tula’i ai i luma o le Faamasinoga Faaitumalo se tagata faigaluega a le Falema’i o le LBJ i Faga’alu, ona o tu’uaiga i lona faia lea o ni faamaumauga sese, e ala i lona sainia o se pepa e faamaonia ai o ia o le Tina o se tamaitiiti sa faia sona taotoga i le masina o Iulai o le tausaga nei.

O le tagi ua faia faasaga ia Togiimoana Montgomery na alia’e mai ina ua faila e le Tina o le tamaitiiti o loo aafia sana tagi i le Ofisa o Leoleo faasaga ia Montgomery. O le Tina e ana le tagi, o le to’alua muamua lea o le ail’i o loo avea nei ma paaga a le tamaitai o Montgomery.

E 2 moliaga mamafa ua faila e le malo faasaga ia Montgomery ina ua tula’i i luma o le afioga i le ali’i Faamasino Sili lagolago ia Elvis P. Patea. O ia moliaga e aofia ai le faia o faamaumauga tau fa’asese faapea ai ma le moliaga o le tuuina atu o ni faamaumauga le moni, o le vaega C lea o solitulafono mamafa, lea e mafai ona faasala ai se tasi i le Toese mo le umi e oo atu i le 7 tausaga, pe faasala foi i le salatupe e le silia i le $5,000, pe faasala foi i faasalaga uma ia e lua.

E $5,000 le tupe lea ua faatulaga e le Faamasinoga e tatala ai i tua le ua molia. 

TAGI A LE MALO

E pei ona tu’uaia e le malo i le latou tagi e faapea, o le taeao o le aso 14 o Iulai 2020 na savali atu ai i totonu o le Ofisa o Leoleo Suesue se Tina ma ia talosaga mo se suesuega faasaga ia Montgomery ona o pepa sa ia sainia faasolitulafono e faataga ai lana tama ona taoto i le Falema’i o le LBJ i Faga’alu.

Na taua e le Tina e ana le tagi e faapea, o Montgomery, o ia lea o lo o mafuta nei ma le Tamaloa sa avea muamua ma ona to’alua, o ia fo’i o se Leoleo Suesue, o le Tama fo’i lea o lana fanau e to’atolu. O le tele o taimi e asiasi atu ai lana fanau i lo latou Tama e tusa ai o maliliega na laua sainia i se taimi ua tuana’i.

O le gaioiga sa faia e Montgomery, sa ia faia ni faamaumauga le sa’o i le Falema’i e ala i lona sainia o le pepa e faamaonia ai o ia o le Tina moni o lana tama. O ia pepa ma faamaumauga o loo maua i le Ofisa o Faamaumauga a le Falema’i.

O le aso 29 o Iuni o le tausaga nei e pei ona taua e le Tina e ana le tagi i Leoleo, na telefoni atu ai le Tama o lana fanau e faailoa atu ia te ia fuafuaga mo le faia lea o le taotoga i le la tama i le aso 4 o Iulai, 2020. E le i faailoa atu e le Tama o lana fanau ia te ia le taimi e faia ai le taotoga.

Talu ai e le i mautu atu le taimi o le taotoga a lana tama, na naunau ai lava le Tina e ana le tagi na te fia maua tonu lava le taimi e fa’atino ai le taotoga. O le taeao na sosoo ai, na toe telefoni ai loa le Tina i le Tama o lana fanau ma fesili i ai pe ua maua se taimi mautu o le taotoga a lana tama, ae na tali le Tama o lana fanau, e le i mautu mai lava se taimi o le taotoga. 

Toe 2 aso oo i le aso o le taotoga, o le taeao lea o le aso 2 o Iulai, na toe telefoni ai fo’i le Tina e ana le tagi i le Tama o lana fanau ma toe fesili i ai mo le taimi o le taotoga ae na tali ane i ai le Tama o lana fanau, a le o le itula e 7:00 i le taeao lona uiga o le itula e 8:00 i le taeao lava.

Talu ai e le i faamalieina le naunau atu o le Tina e ana le tagi i lona fia iloa o le taimi tonu o le taotoga a lana tama, na mafua ai loa ona ia telefoni i le Ofisa o le Surgical Clinic i le Falema’i ma la talanoa ai ma se Tausima’i e fa’atatau i lana mataupu ma ia fesiligia ai le auala e faagasolo ai taotoga mo fanau tama, atoa ai ma le taimi ua fuafua e faia ai le taotoga a lana tama.

Ae na faailoa e le tama’ita’i Tausima’i i le Tina, e le o i ai le igoa o lana tama i luga o le faila. Na telefoni le Tina i le Ofisa o Faamaumauga a le Falema’i (Medical Records) peita’i na motusia faafuase’i le telefoni ao ia faatali mo se tasi e tali atu ia te ia.

Ae ina ua maua le sui o le Ofisa o le Medical Records, na faailoa i ai e le sui lea i le Tina e ana le tagi, o lo o faatali le Ofisa o Faamaumauga i se faatanaga mai le Ofisa e gafa ma le taotoga (Surgical Clinic). Talu ai o le tulaga lea, e le gata e le o i ai le igoa o lana tama i le lisi o tamaiti e taooto i le aso 4 o Iulai, ae le mafai fo’i ona auina atu i ai le faila a lana tama i le potu e faatino ai taotoga a fanau.

Na toe telefoni le Tina e ana le tagi i le Ofisa e gafa ma le taotoga ma faailoa ane ai loa e le Tama’ita’i Tausima’i sa la talanoa, ua mae’a ona sainia le pepa e faataga ai ona taoto lana tama, o le pepa na sainia e le tagata e suafa ia Togiimoana Montgomery, le tama’ita’i o loo nonofo nei ma le Tama o lana fanau, o ia fo’i lea o lo o molia i lenei mataupu.

Na taua e le Tama’ita’i Tausima’i i le Tina e ana le tagi e faapea, a o le i sainia e Montgomery le pepa e faataga ai le taotoga mo le tamaitiiti, sa ia fesiligia Montgomery poo ia o le Tina moni o le tamaitiiti. Na tali Montgomery, o ia o le Tina moni o le tamaitiiti.

Na maua le avanoa e fesiligia ai e Leoleo Suesue le Tamaitai Tausima’i e uiga i lenei mataupu. 

Na taua e le Tama’ita’i Tausima’i i lana faamatalaga i Leoleo Suesue e faapea, na alu atu Montgomery ma talanoa ia Dr. Kumar mo se avanoa e taoto ai lana tama ma talia ai loa e le ali’i Foma’i le talosaga ma faatulaga ai loa le taotoga i le aso 4 o Iulai. Na aga’i atu fo’i Montgomery i le Ofisa o Tausima’i mo le faatumuina o pepa e taoto ai lana tama, faapea ai ma le tama a le Tina e ana le tagi, o le atali’i fo’i lea a le Tamaloa o loo la mafuta nei.

Na fesili le Tama’ita’i Tausima’i ia Montgomery e uiga i tamaiti ae na tali le ua molia, o lana fanau uma alii e to’alua, ae ua mafua ona eseese ma lona faaiu ona o lea ua toe faai’u o ia i lona fa’ai’u a’o le’i faaipoipo. Na tu’u atu ai loa e le Tamaitai Tausima’i pepa ia Montgomery na te sainia ma faatulaga ai loa le taotoga i le aso e pei ona taua.

Na taua e le Tamaitai Tausima’i e faapea, la te masani lelei ma Montgomery, o ia fo’i o se tasi o tagata faigaluega a le LBJ, o le mafua’aga fo’i lena na ia talitonuina ai lana faamatalaga. Ina ua mae’a ona sainia e Montgomery pepa e pei ona moomia mo le taotoga, sa ia aga’i atu loa ma faila pepa ma tuuina atu loa i totonu o faamaumauga.

Na maua le avanoa e fesiligia ai e Leoleo Suesue ia Montgomery e tusa ai o lenei mataupu. 

I lana faamatalaga sa ia taua ai e faapea, o le ali’i lea o loo la nonofo nei, o le to’alua lea o le Tina e ana le tagi, o le tama fo’i lea o le tamaitiiti ua mafua ai lenei mataupu, o ia lea na tuuina atu le faatanaga ia te ia na te sainia ai le pepa e faamaonia ai o ia o se tasi o matua o le tamaititi

I le aso o le taotoga, na faia ai le tonu e alu atu lana paaga e saini le pepa i le Falema’i, peita’i o le fa’afitauli na tula’i mai i le aso lea, e le gata i le poloka o le alatele na mafua ai ona tuai na oo atu lana paaga e saini le pepa e faamaonia ai o ia o le Tama o le tamaitiiti ua sauni e taoto, ae sa tatau fo’i ona nofo o ia i le fale i le isi vaega o le fanau o loo i ai.

Na taua e Montgomery na telefoni faatele i lana paaga i le aso tonu lava o le taotoga, ina ia vave atu e saini le pepa mo le tama, peita’i sa tali atu o ia, o loo poloka le auala, ae tago na ia e saini, se’i uma ona alu atu lea o ia e tu’u atu ai lana saini ina ia iloa ai le saini a le Tama moni o le tamaitiiti.

Na fesiligia e Leoleo Suesue le tama o le tamaitiiti, o ia fo’i o se Leoleo Suesue, susuga Det. Filemoni Amituana’i e uiga i lenei mataupu, ma ia faailoa ai i Leoleo Suesue lona tuuina atu o le faatanaga i le tama’ita’i o lo o avea ma ana paaga na te sainia ai le pepa.