Molia le ali’i na ia fa’aoolima i le to’alua a lona tuafafine

Pago Pago, AMERIKA SAMOA - 

E 43 tausaga le matua o se ali’i na pu’e faapagota e Leoleo i le masina na te’a nei i lalo o se poloaiga mai le Fa’amasinoga, e mafua mai i le fa’alavelave lea o lo o tu’uaia ai o ia i lona fa’aaoga lea o se tama’i naifi e faaoo ai manu’a tuga i le tino o le to’alua a lona taufafine.

O le masina lava fo’i na te’a nei na tula’i ai Filemoni Jr. Mafi i luma o le Fa’amasinoga Faaitumalo mo lana ulua’i tula’i. 

O le ali’i Loia Fautua lagolago ia Ryan Anderson o lo o tula’i mo Mafi ae o le tama’ita’i Loia Sili lagolago ia Laura Garvey o lo o tula’i mo le itu a le malo.

O loo molia e le malo ia Mafi i le moliaga e tasi o le faaoolima i le tulaga lua, o le vaega D lea o solitulafono mamafa, lea e mafai ona fa’asala ai se tasi i le Toese mo le umi e oo atu i le 5 tausaga, pe fa’asala i le salatupe e oo atu i le $5,000, poo le fa’asala fo’i i fa’asalaga uma ia e lua; atoa ai ma le moliaga e tasi o le faaoolima i le tulaga tolu, o le vaega A lea o solitulafono mamafa, lea e mafai ona fa’asala ai se tasi i le toeses mo le umi e oo atu i le tasi le tausaga, pe faasala foi i le salatupe e le silia i le $1,000, poo le fa’asala fo’i i fa’asalaga uma ia e lua.

E $10,000 lea ua fa’atulaga e le Fa’amasinoga e tatala ai i tua le ua molia. 

Afai ae tatala Mafi i tua, e le mafai ona ia toe taumafai i soo se sauala e faafesotai le  ua molia i soo se auala, poo lona taumafai foi e fesiligia ma faatalanoa molimau a le malo e aofia ai ma lona tuafafine, a ia avea o ia ma tagatanu’u lelei e taunu’u i tulafono a le malo i taimi uma.

Ua poloaina fo’i e le Fa’amasinoga ia Mafi e le mafai ona ia toe umia ni aupega mata’utia e pei o fana ma naifi, e le mafai fo’i ona ia tuua le atunu’u sei vagana o se poloaiga mai le Fa’amasinoga.

TAGI A LE MALO

Na taua e Mafi i Leoleo e fa’apea, na mafua ona ia faaoo manu’a tuga i le ali’i na a’afia, ina ua ia tatala atu le potu ma ia vaaia ai lona fa’aoolima i lona tuafafine i totonu o le potu, e ala i lona titina o le ua o lona tuafafine ma ta tu’i ona foliga. O ia tu’uaiga uma na teena e le ali’i na a’afia.

O le afiafi o le aso 9 o Setema na te’a nei na maua ai e le Ofisa o Leoleo se telefoni mai se tama’ita’i, e uiga i lona tuagane na faaoolima ai se isi ali’i e ala i lona fa’aaoga o se tama’i naifi e tui ai lona itu ma lona tau’au.

Na taua atili e le tama’ita’i na vili i Leoleo, e manu’a lona to’agane ae o lo o i ai o ia ma lana uo tama’ita’i, poo lona to’alua fo’i i totonu o le potu o lo o talanoa ai.

Na taunu’u Leoleo ma latou feiloa’i ai ma le tama’ita’i na faafesootaia le Ofisa o Leoleo i Tafuna, ma faamatala ai loa e le tamaitai lea i Leoleo ituaiga manu’a o loo aafia ai lona tuagane, lea ua auina atu i le taimi lea i le Falema’i i Faga’alu mo togafitiga. E tusa ai o le fa’amatalaga a le tama’ita’i lea, o le ali’i na faatinoina le fa’alavelave, e sau i Ottoville.

Na aga’i atu Leoleo i le fale a le ua molia peita’i latou te le i maua atu i ai o ia. Na faailoa ane e se tasi o lona aiga, faatoa o ese atu lava uo a Mafi na o atu e piki o ia, ma ua ag’ai atu nei sa latou ti’eti’ega i le taulaga.

A o galulue ai Leoleo Suesue e tau saili ni molimau sa i ai i le taimi o le fa’alavelave, na taua ai e le tamaitai na vilia Leoleo e faapea, e tusa ai ma le fa’amatalaga a lona tuagane, sa la i ai faatasi ma lona to’alua (le Tina o lana fanau e to’alua) i totonu o le potu i le taimi na tula’i mai ai le fa’aalalave.

Na taua e le tuafafine a le ua molia i Leoleo e fa’apea, sa la i ai ma le ua aafia i totonu o le potu o le fale i Ottoville i le aso na tula’i mai ai le fa’alavelave, sa la talanoa ma fefutaa’i, peita’i, na faafuase’i ona kiki e Mafi le faitoto’a o le potu ma oso atu ua ta tu’i le na aafia e aunoa ma se mafua’aga.

Na ia tula’i i luga ma tamo’e i fafo e tau saili se fesoasoani, peita’i na faateia o ia ina ua ia vaaia lona to’alua ua tamo’e atu i ona tua o loo mau’a ma uu atu lona itu ma valaau atu, “Vili se ta’avale o a’u lea e lavea.’’

Na teena e le tuafafine a le ua molia ripoti sa ia vaai i le taimi na faatino ai e lona tuagane o Mafi (le ua molia) le solitulafono o le fa’aaoga lea o se naifi e tui ai lona to’alua. Sa ia taua, e tupu le faalavelave lea i le taimi na tamo’e ai i fafo ma le fale.

Na fesiligia e Leoleo le alii na aafia i lenei mataupu, ma ia taua ai e fa’apea, ua silia i le 7 tausaga o le la mafutaga ma lana uo tamaitai (Tina o lana fanau e to’alua), peita’i o le mafua’aga la te le nonofo faatasi ai, e le fiafia le tuagane a lona to’alua (le ua molia) ia te ia.

O le aso na tula’i mai ai le faalavelave, na alu ai e asi lana uo tamaitai ma lana fanau ma ave i ai le tupe ma le fa’atau mo latou. E taunuu atu e le o i ai Mafi i le fale, ona la o lea ma lana uo tamaitai ua la talatalanoa i totonu o le potu. Atonu na taunuu Mafi i le latou fale ma ia maua se fa’amatalaga, o ia o loo i totonu o le potu, o le mafua’aga lea na talu atu ai ma kiki le faitoto’a o le potu ma matala ai, ma oso atu loa ua tu’i o ia.

Na umi se taimi o la tau ivi ma Mafi, ae na faateia o ia ina ua tui e Mafi o ia i se tamai naifi ma aafia ai lona itu faapea ai ma lona tau’au. Sa ia taumafai e se’i ese le naifi mai le lima a Mafi peita’i sa tu i luga o ia ma tamo’e i fafo, ae o le taimi fo’i lea na ia tamo’e ai i fafo ma valaau i lana uo tamaitai e vili se ta’avale e ave ai o ia i le falema’i ona ua manu’a.

O le 2 o aso talu ona tuana’i le faalavelave, na aga’i atu ai loa Mafi ma lona Tina e momoli atu o ia i le Ofisa o Leoleo. Na teena e Mafi tu’uaiga fai mai na ia tuia le na aafia i le tama’i naifi. O lana fa’amatalaga i Leoleo, na ia una’i le alii na aafia ma palasi ai i luga o se itu ti tioata sa i totonu o le potu ma manu’a ai lona itu ma lona tau’au.

Na toe fesiligia faalua e Leoleo le uo tamaitai a le alii na aafia e tusa ai o lona silafia i le faalavelave sa tula’i mai. Na faailoa e Leoleo ia te ia, e i ai le avanoa e mafai ai ona aafia o ia i le tulafono pe afai e musu e talanoa e uiga i mataupu. O iina na faatoa ta’utino ai loa le tama’ita’i lea, sa ia vaai o tui e lona tuagane le na aafia i se tamai naifi ma manu’a ai lona itu ma lona tau’au.

Sa ia taua fo’i e faapea, ina ua mae’a ona faatino e lona tuagane le fa’alavelave, na tagi o ia ma faatoese atu ia te ia ma faapea atu, e aua nei ona vilia Leoleo e tusa ai o le faalavelave na tula’i mai, ina ne’i loka o ia i lona fa’aaoga o le tamai naifi e tui ai le na aafia.

E le i maua e Leoleo le tamai naifi na faatino ai le faalavelave ina ua latou asia le fale a le ua molia i Ottoville.

Na taua e nisi o molimau sa latou molimauina lenei faalavelave e aofia ai aiga tuaoi, e le o se taimi muamua lenei ua latou molimauina ai ni faalavelave matuia faapenei e tula’i mai i le nofoaga lea na tula’i mai ai lenei faalavelave.