Fesiligia le faaiuga Ofisa Femalagaaiga aveese faamalosi ai le “sponsorship”

Pago Pago, AMERIKA SAMOA - 

Ua fesiligia e se Tina Faipisinisi i le atunu’u le faamaoni o le faaiuga a le Ofisa o Femalagaaiga, e aveese faamalosi o le malosi na vaavaai ma sponsor ai e lana pisinisi se tagata faigaluega ae sui le sponsor e aunoa ma lana faamaoniga.

O le Tina faipisinisi ia Leilani Laban, lea o lo o poloka i Hawaii ona o le tapunia ai o malaga a va’alele, e mafua mai i le faama’i o le COVID-19, o ia lea o le pule o le kamupani o le G.R.A.C.E.S (Grandville Refrigeration Air Condition Electrical Services). O le pisinisi lenei e gafa ma le faaleleia o ea malulu, pusa aisa, faapea ai isi auaunaga tau eletise.

O le tula’i mai ai o se faaletonu i se tagata faigaluega na aumai e le pisinisi a lenei Tina i le 3 tausaga talu ai, na ia talosagaina ai loa se fesoasoani a le afioga i le ali’i Kovana ma lana Task Force mo le COVID-19, ina ia mafai ona fofo lenei faafitauli.

Na taua e le Tina ia Laban e faapea, o se alii mai Fiti na aumai e lana pisinisi i le 3 tausaga talu ai ma faa faigaluega i lalo o lana pisinisi, i le vaega faapitoa o le “Special Provision”. O le pepa faigaluega mai le Ofisa o Femalagaaiga mo le alii mai Fiti lenei, o loo ia umia ai le ituaiga ID o le “SP status”, lona uiga, e na o le kamupani lava a le G.R.A.C.E.S e faataga e le tulafono ona faigaluega ai lenei tagata. O le ID a le alii lenei faatoa mae’a lona aoga i le masina o Mati o le tausaga fou 2021.

O le faafitauli ua tulai mai e pei ona taua e Laban i le Samoa News, ua mana’o le ali’i Fiti lenei e sui lana galuega, ma alu ai loa ua apalai i le isi pisinisi i totonu lava o le atunu’u, ma mana’o ai loa le pisinisi lenei e faa faigaluega le ali’i Fiti lenei, ae o le faafitauli, e le mafai ona faigaluega le alii Fiti lenei i se isi lava galuega sei vagana ai lava le kamupani a le G.R.A.C.E.S na aumaia o ia i Amerika Samoa. 

Na pau le auala e mafai ai ona faigaluega le ali’i Fiti lenei i se isi galuega e ese mai i le kamupani a le G.R.A.C.E. S, o le sui lea o lana ID mai le “SP status” i le “P5 status”.

Na taua e le Tina o Laban i le Samoa News, talu ai lona poloka ai i Hawaii ona o le faama’i o le COVID-19, na avea ai loa lea tulaga ma alofaga i le Ofisa o Femalagaaiga, ina ia mafai ai ona saili se auala e aveese mai ai le sponsor a le ali’i Fiti lenei mai ia te ia ma lana pisinisi, ae sui aga’i i le “P5 status” ina ia mafai ai ona faigaluega i le galuega fou lea ua talosaga i ai.

Na alu le sui o le kamupani fou lea ua manana’o e faa faigaluega le alii Fiti i le Ofisa o Femalagaaiga ma le Loia Sili, ma suia ai loa le sponsor a le ali’i Fiti lenei, e aunoa ma se silafia e Laban. 

O le taimi nei, e 2 ID a le ali’i Fiti lenei o loo umia i le taimi nei, o le ID o le “SP status” faatoa mae’a le aoga i le masina o Mati o le 2021, ma le ID fou o le “P5 status” faatoa mae’a le aoga i le aso 10 o Setema, 2021.

Na taua e Laban i le Samoa News e faapea, na ia taumafai e faafesoota’i le Ofisa o Femalagaaiga ina ua ia maua le faamatalaga e faatatau i le suia o le sponsor a lana tagata faigaluega e aunoa ma lona malie i ai, ae o le tali na tuuina atu, ua mafua ona sui le sponsor ona e le gata e le o ia i o ia i le atunuu i le taimi nei, ae ua ia tuu tia’i fo’i lana tagata faigaluega.

Na toe taumafai mai Laban e saili pea se fesoasoani mo lana mataupu, peita’i na faailoa atu e se alii faigaluega o le Ofisa o Femalagaaiga, o le faila a lana tagata faigaluega lea ua tuuina atu i lalo o le polokalame o le Amnesty Program.

I lona talitonuga, e le tatau ona tuua fua i lalo o le polokalame a le Amnesty Program le faila a lana tagata faigaluega, ona o le polokalame lea sa fai faapitoa mo tagata e lei i ai ni pepa nofomau ina ia mafai ai ona faaleleia o latou pepa nofomau, ae o lana tagata faigaluega o loo lelei lona ID faigaluega faatoa mae’a le aoga i le tausaga fou.

O le isi tulaga na matua teena e Laban, o le faaupuga fai mai ua tuu tia’i lana tagata faigaluega ae alu atu i fafo.

Na faamanino e Laban e faapea, e le o tiaia lana tagata faigaluega, o lo o faaauau pea ona faigaluega o ia mo le totogi e $10 i le itula. O loo lelei le tausaga o ana tagata faigaluega, lelei fale o loo nonofo fua ai e aunoa ma se totogi, o lo o i ai fo’i ta’avale o loo tuuina atu e fa’aaoga mo galuega atoa ai ma le faaaogaina mo le tagata lava ia.

Na tuuina atu e Laban sana tusi i le afioga i le ali’i Kovana ia Lolo Matalasi Moliga faapea ai ma lana Task Force, mo se fesoasoani e uiga i lenei mataupu. 

Na taua e Laban i lana tusi i le Kovana le faateia o ia i le mafai lea ona faia e le malo o Amerika Samoa o se tulaga faapenei ia te ia ma lana pisinisi, ae o le isi lea pisinisi a le atunuu o loo taumafai e atia’e ma faaleleia ina ia tupu ma ola ma maua ai galuega a tagata o le atunu’u.

Sa ia taua e faapea, e foliga mai ua ave le faamuamua a le Ofisa o Femalagaaiga i se tasi o kamupani i le atunuu lea ua manatu lana tagata faigaluega e saili galuega i ai, ae faatuatuana’i lana pisinisi na mafua ai ona oo mai le tagata lenei i le atunu’u.

I lona talitonuga i lalo o le Tulafono, afai ua le toe galue le tagata i lalo o le pisinisi na mafua ai ona auala mai i le teritori, ua tatau loa i lea tagata ona toe fo’i i lona atunuu na malaga mai ai, ona faatoa mafai ai lea ona aumaia e le kamupani fo’u lea ua manatu e faigaluega ai.

E tele nisi o mataupu sa fesiligia e Laban i lana tusi i le Kovana. O nisi o ia mataupu e aofia ai le malosi ua mafai ai e le Loia Sili ona sainia le suiga o le sponsor a lana tagata faigaluega e aunoa mal e uia o ala o le tulafono.

Sa ia taua e faapea, e leai ma se vaega o le Tulafono tau Femalagaaiga ua ia solia, poo se vaega fo’i o le Tulafono tau femalagaaiga ua soli e lana pisinisi, peita’i o lea ua uia nei auala le sa’o ina ia faamalie ai le pisinisi e pulea e se tasi o aiga malosi i le atunuu, ae faatuatuana’i ai lana tama’i pisinisi.

Sa ia taua fo’i le fiu o lona aiga e aofia ai lona To’alua o loo i ai pea lava iinei e aga’i atu i le Ofisa o Femalagaaiga, faatasi ai ma le malosi o le faatonuga mai le loia “Power of Attorney” sa ia saunia ina ia fesoasoani ai i lana mataupu, e tumau lava le faaiuga ua faia, lea ua mafua ai ona suia le sponsor ma le ID a le tagata faigaluega o loo ogatotonu i ai lenei mataupu.

Saunoa Laban e faapea, afai ua suia lana sponsor ona o le faaupuga, e le o i ai o ia i le atunuu i le taimi nei, e tatau fo’i la ona suesue e le Ofisa o Femalagaaiga tagata mai fafo uma lava o loo poloka a latou sponsor i fafo, ina ia suia a latou sponsor ina ia faamalie ai le faaupuga e pei ona tuuina mai.

Na faailoa e Laban i le Samoa News lona taliaina o le faaiuga a le alii mai Fiti ina ia alu ese mai i lana pisinisi ae aga’i atu i se isi galuega fou, pa’u lona talitonuga, e tatau ona totogi faauma atu e le alii Fiti lenei le tupe mo le ta’avale a le kamupani sa lavea ia te ia, lea e le i mae’a ona toe totogi atu.