Tala I Vaifanua

Pago Pago, AMERIKA SAMOA - 

TELE GALUEGA MAE’A A LE MALO - TATALAINA I LE MASINA FOU

Ua mataina le tele o galuega o lo ua latalata ona mae’a lelei, ma ua fa’ailoa mai e sui o nei galuega, “Ua fa’atulaga ina ia tatalaina i le masina fou. O lo ua tulaga lelei mai lea fo’i fuafuaga pe a tatou va’aia foliga mai o nei galuega uma e afua mai i le Ofisa Fou o le TAOA i autafa ane o le Falepuipui i le Paka Liona, o le fausaga o le Ofisa Fou o Turisi i le Talaga e soso’o lelei ma le Fale Mata’aga i Fagatogo, ae maise fo’i o le atugafale Samoa ma le Maota tele o le atunuu i le Malae o le Suigaula a le Atuvasa i Utulei. O lena galuega ua o fa’atasi ai ma le faaleleia atili o le apitagalu ina ia saogalemu le soloia atu o le palapala i le sami ona o le malolosi ma le si’isi’i fo’i o peau o le gataifale.”

O nei galuega uma ua foufou maea nei, o galuega o lo’o fa’atupe lava i tupe e maua e le tatou nei malo, ua le fa’aaogaina ai ni vaega tupe mai le Malo Tele. O poloketi fo’i nei na manatu ma naunau lava le afioga Kovana Lolo Moliga e fa’ataunuu i le taimi a’o lei mae’a lana nofoaiga. E 20 le aofa’i o galuega laiti nei e ese ai mai galuega tetele o lo’o fa’atupe mai i vaega tupe mai le Malo tele.

O le galuega e toe fa’amanatu ai le ulua’i fu’a na sisi a’e i laueleele o Sogelau, Fagatogo i Tutuila nei, ua fa’atulaga o le a fa’ataunuu le sauniga mamalu e tatala ai ia Oketopa 08, 2020. O le ma’a fa’amanatu lea o le a fai ma va’aiga i augatupulaga faia’e o Amerika Samoa i le taimi na ulua’i sisi ai le fu’a a Amerika i o tatou laueleele, ma ua fa’atula’ia ai le ulua’i faigamalo fa’ateritori o Amerika Samoa.

O le tatalaina o le Ofisa Autu o le Matagaluega o Tagata Matutua [TAOA] ua fa’atulaga mo Oketpa 15, 2020, ma ua faatula’i ese mai nei i latou mai le nofoaga i Pago Pago, tuaoi ma le Ofisa Fou o le Faletupe o Atina’e a le tatou Malo.

Peita’i, i le taimi ua tu’ua ai lea Ofisa i Pago Pago e le TAOA, o le a se’e atu i ai le pulega atoa ma le aufaigaluega a le Puipuiga o le Gataifale ma le Vaomatua [DMWR].

Na tula’i ese mai uma le pulega ma le aufaigaluega a le DMWR mai le latou Ofisa Autu i Fagatogo, tuafale o le Maketi i Fagatogo, ona ua mae’a lisia le latou Ofisa lea o se tasi o fale ua tu fua ae ua oia, ma ua le toe agava’a ona nofoia e le latou Ofisa, ua tatau fo’i ona tu’u i lalo ae fa’afou. 

O le toe galuega o le a tatalaina i lea fa’asologa o le toe soso’oga o le Maota tele o le Malo i Utulei ma lona atufalega e mafai ona fa’aaogaina e tagata lautele, lea ua fa’atulaga mo Oketopa 24, 2020.

Peitai o lo’o fa’agasolo pea lava is galuega tetele e aofia ai le Fale Ta’alo o Tupulaga lea e fausia i le eleele sa i ai le VA Tuai i Tafuna, lea o lo’o fa’atautaia lea e le Nana’s Conatruction, ma ua va’aia fo’i lona tele ma ua le o toe mamao fo’i ae mae’a i le matau atu i ai.

O le fili o nei galuega uma ua fa’ailoa mai ona o le fa’atuai ona oo mai o sapalai mo galuega ia fa’amae’a ai. Ua tuai to’ai taunuu mai sapalai o mea e fa’aaogaina ona o femalaga’iga a va’a oloa, o tulaga fo’i o le tau ua le talafeagai ai ma galuega e fia fa’atino vave, ae fa’afetaia ua mae’a ma lelei fausia galuega ua fa’atula’ia nei.

O le aso Faraile nei, o le a suaina ai le eleele mo le amatalia o le galuega o le alatele i le Leapaga, lea e soso ai Fagaima Kokoland ma Malaeimi. O lea auala ua loa o taumafai ona feutagai le malo ma Aiga ina ia mafai ona fa’aleleia atili lea ala alo. O le fa’afetai o lea ua matu’u finagalo o aiga, ma ua malilie e fa’aleleia loa lea ala e fa’aaogaina i feoa’iga.

Peita’i o le masina fo’i e fa’ato’a suaina ai le eleele o le galueaina o le alatele i le afio’aga o Taputimu

FESOASOANI TUPE  US JUSTICE DEPARTMENT MO AMERIKA SAMOA:

Ua fa’alauiloa mai e le tatou sui i le Konekeresi Aumua Amata ua fa’manuiaina fo’i le matagaluega o le Criminal Justice a le tatou malo i le vaega tupe e $391,947 mai le US Justice Department a le fetarale. 

Ua fa’ailoa mai, ua naunautai le BJA Bureau of Justice a le Malo tele e ala i ana polokalama e fesoasoani ai e tausia le filemu ma le nofo saogalemu o tagata uma i le teritori. 

“O lo ua mana’omia lava e i tatou uma o tagatanuu o Amerika Samoa le puipuigamalu o tatou tagata ae maise ina ua tetele mai lu’iga i fanau talavou ua pule i le soifua, ma le tele o a’afiaga o lotoifale o aiga i sauaga. O na mea uma e mafai ona fa’aaoga tatau ai lenei seleni ua maua, ia fa’atula’ia polokalama e agaga ina ia taofia le tutupu mai o mea e a’afia ai le saogalemu o tagata o le atunuu.” O se tala fiafia lea a le tamaitai faipule o Amerika Samoa i le Koenekeresi.

Fa’amalo tele ia Leseiau T Laumoli ma le latou vaega galulue malosi i nei polokalama uma e fa’atino e fa’aaoga tatau i ai nei tupe mai le malo tele, ia aoga i le tausiga lelei o tagata o le tatou atunuu.

2,501 VAEA GALUEGA ALE HAWAIIAN AIR IA OKETOPA 01, 2020

Ua fa’ailoa e le Hawaiian Airlines, e oo atu ia Oketopa 01, 2020 e tusa ma le 2,501 tagata faigaluega o le a to’esea mai galuega a le Kamupani Va’alele.

O le aotelega e totoe o tagata faigaluega a lea Kamupani Va’alele sili ona tele i le setete o Hawaii e tusa ma le 4,946 tagata mai le 7,447 o tagata faigaluega sa galulue ai a’o le’i sofa’i le malo e le Covid-19.

O le aotelega o nei tagata faigaluega uma ua vaea e aofia ai i latou e aofia i le Iuni faigaluega e to’a 1,850 ua malilie i latou e tu’ua galuega sa i ai, ma nisi e to’a 466 o i latou e le’i manatu ina ia tu’ua le galuega ae ua vaea mo le taimi nei. O tofiga uma ua avanoa nei ua aofia ai i latou e tautuina va’alele, pailate, o i latou e tautuaina pasese femalaga’i, i latou e fela’uaia atoa ma uta ma inisinia fo’i o va’alele. Ua tofusia uma lava tofiga o lo’o fa’atautaia ai le kamupani va’alele ma e ua vaea mai ai.

Ua aofia ia i latou uma ua vaea avanoa faigaluega le isi to’a 185 o tagata e le o aofia i le Iuni a tagata faigaluega ma o le toatele lea o tagata faigaluega i ofisa o le Kamupani Va’alele i vaega o le pulega nisi.

Ao lei tupu lenei fa’aletonu i le lalolagi ma ua a’afia ai le Setete o Hawaii i le pepesi o le Covid-19, o le Kamupani Va’alele a le Hawaiian Air le isi Kamupani va’alele sili ona to’atele ana tagata faigaluega ma sa oo lea faitauga i le 7,500 tagata faigaluega i soo se tofiga ina ia mautinoa ua tautuaina le mamalu fegasoloa’i o tagata faimalaga mai lea malo i lea malo e fa’aaogaina ai va’alele a le Hawaiian Air. O le 90% o nei tagata faigaluega e faigaluega i tofiga i totonu o le setete o Hawaii lava ia.

O le sui fa’asalalau a le Hawaiian Air, Alex Da Silva na ia fa’ailoa mai i sana emeli i le Nusipepa a le Honolulu Star-Advertiser, “O le motusia o galuega uma nei, ua lisia i luga e fa’amae’a uma lea i le ulua’i aso o Oketopa, 2020., peita’i ua toe tolopo i lena aso se’ia mae’a le toe tatalaina aloaia o le vaiaso o le Turisi a le setete o Hawai’i i le fa’aiuga o Setema 2020.”

“O le tausaga sili lenei ona faigata i le va’ai atu i le tulaga o turisi ua asia Hawaii, peita’i o lo ua fa’atulaga e toe tatala le Ofisa o Turisi mo le setete se’ia oo ia Oketopa 15, 2020. O le toe tatala lea o femalaga’iga ua faia mo e asiasi i le setete ua talia ai i latou ua mae’a faia o latou tui suesue o le Coronavirus ma ua fa’amaonia e le o maua i lea fa’ama’i. O le tui lea e ao ina fai i le tolu aso a’o le’i e malaga ulufale mai i Hawaii. Afai e leai se tui e taofia oe i le nofoaga nofo va’ava’aia mo le 14 aso. A’o usita’ia aiaiga o le tui suesue lea e te le nofoia nofoaga nofova’ava’aia mo suesuega o le covid ia oe.”

O le vaitau lenei fa’apitoa mo le Covid-19, ua fa’amalosia ai lea fa’ataga ae le nonofo uma ai pasese i nofoaga nofova’ava’aia ua maea tapena e lea setete talu mai Mati 26, 2020.