Tala I Vaifanua

Pasgo Pago, AMERIKA SAMOA

TAPUNIA ALOAIA FAITAUGA 2020 A AMERIKA SAMOA

Sa fa’aaunuuina se fa’atasiga tele ina ia tapunia aloa’ia ai le Faitauga 2020 a le Malo Tele o Amerika i le tatou atunuu, ma o le faitauga fo’i lea e fa’aaogaina e le tatou Matagaluega o Fefa’ataua’iga mo fa’amaumauga o le atunuu atoa, e ta’i 10 tausaga ma fa’atino.

O le faatasiga lea sa fa’atautaia i le Pavillion Malaeoletalu i Fagatogo ma sa i ai fa’afiafiaga sa maimoaina ai, sa nafa ma le vasega o au fa’afiafia mai fa’alapotopotoga eseese i le atunuu. O le sauniga tele lea, o se fa’afetai e fa’atofa ai I le ali’i Fa’atonu o le Faitauga 2020 a le Malo Tele, Jason Kopp, lea o le a tu’ua le atunuu i le aso 25 Setema, 2020.

O le Sui Kovana Lemanu Peleti Mauga sa auai o le sui mamalu o le Malo e saunoa mo lea galuega tele ua mae’a, ma ua tapunia ona faitoto’a i le to’a 300 o Iatou sa fa’afaigaluegaina ai, e faitau le aotelega o le atunu’u.

“O le faitauga o le atunuu e le o se galuega faigofie, ae ua fa’alua fo’i ona lutia I fa’aletonu iloga i Amerika Samoa, a’o le’i mae’a lava. Muamua o le pepesi mai o le Misela, ae toe fa’aluaina e le lutia mai e le Coronavirus, ae le’i fo’i pe na solitulafono ai le fa’atautaiga o le Faitauga 2020 ona o nei fa’aletonu. Ua outou pulunaunau ma ua fa’amae’a ma le usita’i le galuega ma ua mautu nei ona fa’amaumauga mo’omia, fa’afetai le galulue punoua’i i faiva sa tuulima atu ma le fa’atuatuaga e tout e mafaia,” o se fa’amalo lea a le Lemanu Mauga i le fa’atonu o le faitauga 2020 Jasona Kopp, ma le aufaigaluega.

Sa ia fa’ailoa ai Kopp, “Ou te iloa, mai le tausaga na fa’amatuu mai ai oe e le Malo Tele e te sau e faitau le teritori o Amerika Samoa, ua iloga mai ua e agaga e avea oe o se Samoa. Sa fai lelei lou suti e iloga ai le tagata o le Malo Tele mai le amataga o lou to’ai taunuu mai, ma fa’atino galuega, ua suia lemu lava au aga. I le taimi nei, ua e tum ai o le tama Samoa, ua sulu lou ie faitaga ma ua e la’ei fa’atama o le motu, lea ua e foliga o se tasi o i matou uma i le taimi o le a e toe fo’i ai. O lona uiga, o ou faiva ua e ola ai. O oe ua agaga o le Samoa. Fa’afetai mo lou faiva, e aoga tele i le Malo o Amerika Samoa ma lona atina’e i le lumana’i.”

SUIA LE ALA E FA’AFESILIGIA AI LATOU E FIA PULE I LE SOIFUA?

O se tala fa’afagogo le mau ua talitonuina e nisi o e faufautua ia taofia le Pule i le Ola, “A Talanoa so’o i le Pule I le Ola, ua avea ma mea e fiafia ai le fanau e fa’atino pe fai.”  O se manatu fa’aalia lea o le susuga Adney Reid, o se tasi na tofia fa’apitoa e tima’i i latou na auai, poo le atunuu atoa o le a oo i ai lenei saunoaga, ina ia taofia le pule i le ola.

O Adney Reid o se tasi ua galue nei e avea ma Welfare & Self Reliance Manager o le LDS, ae sa mua’i tautua o ia o se tasi e tautuaina le mamalu o tagata e gasolo atu mo talavai i le VA Clinic i le tatou atunuu. E i ai ona tusi pasi fa’apitoa na maua a’o a’oga ai i le Iunaite Setete i lea matata.

O le aso na fa’atasia uma ai le to’atele o faia’oga o faufautua o Faife’au ma e galulue sootau’au ma tagata lautele i so’o se ala o tautua o lo ua fa’aagaaga e le malo mo le soifua laulelei o ona tagatanuu, ae fa’afofogaina ai lea folasaga matagofie.

“Sofa’i le fa’afitauli a’o e va’aia ona foliga e tau tupu mai. Fesili sa’o i le sui, ua e fia oki? A tali mai ioe ua e iloa le mea e fai. A fa’ata’eta’e aluga au fautuaga, e le toe suia ai le mafaufau o le sui ua manatu e fai le mea sese, o le pule i le ola a le Atua, o se meaalofa e le maua fa’alua.”

“O le fesili mo le au failotu, ua iloa e lau ekalesia ae maise le tupulaga talavou, o le Pule i le Ola, o le agasala e le fa’amagaloina e le Atua i so’o se mea? E mautinoa lava e alu i seoli? Ua tutusa lelei lava ma lou upuvale pe faifai i le Agaga Pa’ia o le Atua? O agasala e le fa’amagaloina I le maliu o Iesu I so’o se taimi e te faia ai?” se fesili lena a le ali’i failauga o le Upu na saunoa ai e tusa o lenei vaitau ma le televave o le Pule i le soifua i le tupulaga talavou.

“Ua tatou oo mai i le taimi ua faia Tulafono e taofiofi ai le oo mai o le Covid-19 i o tatou laufanua ona o le fia fa’asaoina o le ola, ae faliu ane nei fanau talavou fai le agasala e le fa’amagaloina i se mea e tasi e ofoina atu i le Atua? O fea o silafia ai e le Atua o lo’o tatou fia ola? Fai amio lelei, taumafai i le amiotonu i taimi uma. O nisi ua oti leaga ua i ai a’afiaga o mafutaga fa’aleuo ae le va’ai ai i le meaalofa taua tele na aumaia e le Atua i le tagata e ola ai. E fia lelei i le teine poo le tama ae galo ai le Atua o silasila, fia pule ai loa i le soifua, ae le o sau mea. Ua leai se va’ai alofa i matua na tautiga e fa’aolaola mai ma tausi fa’afailele lou soifua ia e matua?”

O upu ia na pa’u i lea malumalu ia tima’ia le autalavou ma tagata uma, “E le o se mea mama i lou Atua le pule i le soifua, e le toe lava se taulaga e totogia ai lau sala lena, Ua matua ata fo’I Satani ua maua lana uo.”

Ona ua i ai faufautua fa’apitoa a le Matagaluega o le DHSS i le fonotaga lea na faia ia amana’ia ma taualoa galuega tima’i ma mea uma ua tapena ia toe liua le vai o Sina i se finagalo o se tasi ua fia pule I lona soifua, ua ese fo’i le ala tuu sa’o ua saunoa I ai le susuga Adney Reid, ma ua tali tutusa ma le ala ua saunoa i ai le failauga lea i le sauniga lotu i le sapati na te’a nei.

Ta’utino e Reid, “Ua suia nei la’u matata i le faufautua ma tima’I ia I latou e i ai fa’aletonu o le mafaufau ina ia le tosina ai e faia fa’aiuga sese, ona o le manatu i la’u uo, ua pule I lona soifua, o la’u uo mamae o Tau.”

“E maua le vai fofo pe a tu’usa’o lau va’ai i le ma’i!”

MAUA ISI FA’ATUPEGA MALAEVA’ALELE I AMERIKA SAMOA - $7.3MILIONA

Ua fiafia tele le ali’i Fesoasoani i le Failautusi a le Initeria Dougas Domenech e fa’ailoa mai ia Amerika Samoa ua toe to’ia fo’i le matagauega o Uafu ma Malaeva’alele i le tinoitupe e $7.3miliona e fa’aleleia atili ai malae va’alele o le atunuu. O lea tele o le seleni sa toina mai lea e le Matagaluega o Feoaiga a le Malo Tele (USDOT).

Ua faafetaia tele e Domenech le tamaitai Failautusi o le USDOT Elaine L. Chao ona o lenei vaega tupe ua toina mo Amerika Samoa e fa’aleleia ai latou malae va’alele mo feoa’iga fa’alotoifale fa’apea fo’i ma femalaga’iga fa’avaomalo e uia ai le tatou teritori.

Ua fa’ailoa mai o se vaega tupe lea mo Amerika Samoa sa mafai ona ave’esea mai le aotelega e $54,859,950. O le tinoitupe o le tausaga fa’aletupe 2020, i lalo o le fa’amoemoe e fa’aleleia atili ai malaeva’alele o le Iunaite Setete ma ona Teritori uma. O galuega e ao ina fa’aleleia atili i lea vaega tupe ua lisia mai ai, le fa’aleleia o le saogalemu o malaeva’alele, ia lelei ona puipuimalu mai fa’afitauli ma le aotelega o le va’aiga lautele o Malaeva’alele uma. O le agaga atoa o lea vaega tupe e fa’atutu mai lea i le vasega o malae vaalele i Teritori ma atu motu i le FSM poo le Atu Malesala.