Tala I Vaifanua

Pago Pago, AMERIKA SAMOA

“O OE UA TOFIA!”  TAUMAFAIGA IA TAOFIA LE PULE I LE SOIFUA

O le aso Tofi o le vaiaso talu ai, na fa’amau fa’ailoga ai le aso e fa’ataua ai le galulue fa’atasi o le Matagaluega o Alagamanuia mo Tagata Lautele, i lona vaega e fa’apito augafa latou tiute fa’atino i le Tautuaina o Fanau a le atunuu, ina ia soo fa’atasi ma latou pa’aga, e taualoa tautua uma e agaga mo le taofia o le pule i le soifua o fanau talavou. 

O le fa’atasiga lea na faia i le Gov. Rex Lee Auditorium, ma o e uma na fa’atulaga mo folasaga, ma tapena ina ia fa’amanatu ma fa’ailoa pea I fanau talavou, e le o le oti le tali mo e o lo’o atoatoa le malosi ma talaovou o latou soifuaga i so’o se fa’afitauli. E mafai ona e soifua pea ma soloia na fa’afitauli uma pe a sailia vaifofo eseese e fesoasoani ia te oe ma ou lagona o’otia, o so’o se ituaiga.

Na faia fo’i le sao o le alii faife’au Rev Iasepi Ulu o le EFKAS i Fagatogo i lea semina, ina ia tima’ia atili le fanau i o latou lagona o’otia ma filifiliga tatau e ao ina latou faia. “Filifili i le ola! Aua e te manatu ua muta ai mea uma i lena sasi ua i ai, ae ua e le manatu ai i le to’atele o le a matua a’afia i lau filifiliga sese o le a fai, O le ola o le meaalofa sili ua tuuina mai e le Atua i le tagata, ina ia fa’amaumauina, ae ia fa’aaoga tatau e aoga atu ai nisi e to’atele, e le na’o se tasi e to’atasi. Ma toe fa’afo’i atu ai le vi’iga i le Atua e ona le ola na foa’ifuaina mai.”

“O i latou foi ua tuufesili nei, aisea lava na talanoa mai ai? Va’ai toto’a i uiga ma aga ua aliali mai i fanau, talanoa i fanau; i so’o se taimi.ua alia’i mai ua i ai ni fa’aletonu o lutia ai lo latou ola fiafia, talanoa. Taimi ua va’aia ai ua tau le maua i le fale, talanoa. Taimi ua ova ai le pisi o latou mafutaga ma isi o tupulaga, talanoa.o i tatou lava tatou te toe fa’apea mulimuli ane, aisea na matou le iloa ai? Aisea na ou le talanoa ai? Aisea sa ou le va’ai toto’a ai? Ae a tupu loa le fa’alavelave, ua leai se aoga ua masa’a le ipuvai ua maumau. O oe ua tofia!!!”

O le sui fa’atonu o le DHSS sa tula’i Ms Josie Lutali, ma sa ia fa’alauiloa le manulauti ua filifili le matagaluega ina ia avea ma una’iga malosi o le taumafaiga ia taofia mai le pule i le soifua.”O lo ua mae’a fa’alauiloa O Oe ua tofia e te tautala atu; O oe ua tofia e te a’apa atu; O Oe ua tofia e te fesoasoani atu; O Oe ua tofia e te talanoa atu; O Oe ua tofia e toe siakia fo’i lea sui!”

O le saunoaga fa’apitoa na lafo lea i le tina o le atunuu, Cynthia Malala Moliga, o ia fo’i sa galue mai a’o talavou i lea matagaluega i lona tau amata o faiva nei e tautuaina le vasega o fanauiti se’ia oo i tupulaga talavou, lea sa ia fa’ailoa atu ai ia i latou uma o tautuaina fanau, ua tatau ona soo tau’au uma i tatou e avea nei tautua o se taumafaiga e fa’amuamua.

“Ia fai o se galuega tuufa’atasi a le tatou Malo ia galulue a’ia’i i ai ona totoga uma lea e sasao mai ua outou vala’auina e o mai fa’atasi. O tatou matua, o tatou aiga, o tatou ekalesia, o le tatoumalo ma ana tautua uma ua agaga i le fanauiti se’ia oo i e ua matutua, Ua tatou iloa o tatou tagata ma lagona e o’otia ai, ua tatou masani ma ua iloa lelei omiga e masani ai, ae o le vaifofo o le talanoa ma ofo alofa atu i ai lau fesoasoani, a’o le’i sasi lana fa’aiuga. Galulue fa’atasi e manuia ai faiva uma.”

Na tutuina moligao e fa’ailoa ai lou agaga i le taumafaiga lenei, fa’atasi ai ma le manatu i le soifua ua maumauina ua leai se avanoa e oo atu ai se fesoasoani i nisi o le fanau ua maliliu i le pule i le soifua. 

O le fa’amauina o le aso 10 Setema i tausaga ta’itasi e avea ma aso e taualoa ai taumafaiga uma ina ia taofia le pule i le soifua i le Lalolagi atoa. Ua avea fo’i lea aso,  ia fa’ao’o atu se fesoasoani mo i latou fo’i ua a’afia ona o le vave motusia o mafutaga mamae ona o e ua maliliu fa’afuase’i fa’apea.

Ua le mafai ona fa’ailoa mai e le matagaluega o le puipuiga lautele le aofaiga o e ua pule i le soifua i le tatou atunuu ona o lo’o fa’aauau pea lava suesuega i le mafuaga ona maliliu ai o nisi o tupulaga talavou.

I le fe’au taua mai ia Bishop Peter Brown, ua fa’ailoa ai lona agaga o’otia ona ua to’atele alo o le atunuu ua latou uia lea ala fita, ma ua iloga ona o’otia ai finagalo alofa o aiga o i latou, a latou ekalesia ma latou matua faaleagaga, o e sa tatau pona sulu atu i ai fanau ua ootia o latou lagona.

“I so’o se taimi fa’ailoa i tou fanau e tou te alolofa ia i latou.Talanoa i ai i so’o se taimi, e le fa’apea ua matutua ona mafaia e lea e i latou ona soloia fa’afitauli o feagai ma o latou mafaufau vaivai e tau fa’avasega ai le o’oo’oga o tiga ona o mafutaga ua tete’a, mafutaga ua fa’amuta ae o lo’o auau i ai o latou alofa fa’amemelo fa’atausala. Fa’alologo i o latou lagona o’otia ae aua ne’i outou fa’amasinoina o latou lagona.Poo le a lava le matua o lau tamaititi, aua nei misia ona e fa’ailoa tautala atu ia i latou, e tout e alolofa ia i latou,”

50% MAE’A O GALUEGA LIPEA A LE MV  MANU’AELE lll FAIA I HAWAII

Fa’aalia e le fa’atonu sili o Uafu ma Malae Va’alele Taimalelagi Dr. Claire Tuia- Poumele, “Ua latalata nei ina mae’a galuega lipea o lo’o toe fa’aleleia ai le MV Manu’atele lll. Ua tusa ma le 50% o le galuega toe fa’aleleia ua mae’a nei.”

O le galuega o lo’o faia i le Marisco Shipyard i Honolulu, Hawaii. O nei mea uma sa fa’aleagaina o le va’a lea na mafua mai ina ua taia le va’a i le Uafu i Ofu Manua ona o matagi malolosi i le amataga o le tausaga.  

I le taimi nei ua i ai pea lava le to’aiva o sui na malaga atu i le tatou vaa ina ia oo i Honolulu. O lo’o fa’atupeina lea galuega i le $1.6 milion mai le Matagaluega o le Initeria. 

FA’ATA’ITA’IGA - TAUTUAINA O LE PASESE A LE VA’ALELE MAI HAWAII PE A FA’ATO’AI MAI:

O le aso ua fa’atulaga ai le toe fa’ata’ita’ia o le galuega e fa’atino pe afai ae tulaueleele mai le va’alele ma le aumalaga o lo’o taumafai ona fa’atulaga e aumaia mai Honolulu, mo i latou o lo’o fia fa’afo’ia mai ai tagata Amerika Samoa i o tatou laufanua ma aiga.

Ua maea ona faataita’ia fa’alua lenei taumafaiga ma ua i ai fo’i mea ua tatau ona fa’aleleia atili mo le toe fa’ata’ita’iga lenei, ina ia pasia lelei ai e le Komiti o le Coronvirus ma le Kovana lenei fa’amoemoe. 

E tusa ai ma le fa’aaliga mai a le fa’atonu o le Uafu ma Malaevaalele, “O se fa’aaoaoga aoga tele lea ua maua mai e I matou o aofia i lenei taumafaiga, i le fa’atinoga o tiute e ao ina mautinoa ua puipuia ai le ulufale mai o se tasi o tatou tagata ua mae’a maua I le Coronavirus, ma pesia ai le atunuu.”

O le komiti lea na tofia fa’apitoa mo le fa’amoemoe e fa’atulaga ma fa’ailoa mai le fa’atautaiga o se malaga e fa’afo’ia mai ai le mamalu o le atunu o lo’o alaala pea i fafo talu ai le coronavirus, ua avea ai le Fa’atonu o Uafu ma Malaeva’alele ma se tasi o ta’ita’ifno e to’alua mo lena komiti, a’o le Komesina o Leoleo Lei Sonny Thompson le isi taitaifono.

Ua toe tuuina atu fo’i e kovana Lolo Moliga se faiva I le vaega fa’apitoa o fomai mai le LBJ Medical Center, le DOH ma le VA Clinic “Ina ia latou solaupule lelei, pe ua alagatatau lava ona fa’ataunuu mai lea malaga pe leai i lenei vaitau?”

Ua fa’ailoa mai e le fa’atonu o le DOH Motusa Tuileama Nua, E o’o mai i le taimi nei, e le’I faia lava lea fa’aiuga a nei sui mamalu.”