Tala I Vaifanua

Pago Pago, AMERIKA SAMOA

FANAU A’O’OGA TOMAI FUA FANUA AUINA ATU E LE ASPA I NZ

I le lipoti fa’apitoa a le pulega a le ASPA lea na fa’ailoa ane i le fonotaga a le Kapeneta i le vaiaso ua te’a ua fa’ailoa ai e Wallon Young o le ASPA, fa’aauau pea le polokalama e auina atu ai fanau ina ia a’oa’oina ma su’ea o latou tusi pasi fa’apitoa i matata fa’aeletise, tau le galuega tau le gafataulimaina o le tautua tau suavai mama ma suavai lafoa’i i le atunuu, ma ua aofia ai fo’i ma nisi o lo’o sailia tusi pasi mo fa’ailoga maualuluga i le tautua tau le Fuaina o Eleele o le atunuu.

O lenei polokalama ua loa ona fa’atautaia mai i le vaitau o tutula’i Utu Abe Malae i le tofi Pule Sili o le ASPA, ma ua fa’amaonia fo’i le aoga o lenei polokalama i le taumafiaga ia iloa lelei e fanau a Amerika Samoa ona fa’atautaia nei galuega.

O se taimi muamua lenei ua auina atu ai ni alo o le atunuu i lea matata, le fuaina o eleele o le atunuu. Peita’i ua mae’a silafia e le mamalu lautele, le mana’omia ma le tulaga gaogao o i latou e mafai ona ofoina mai lenei tautua mo le atunuu lautele ae maise fo’i i galuega fai a matagaluega o galuega lautele, ma le Pulega o telefoni ae masie o le ASPA a le tatou malo.

Ua iloga le faigata ona fa’amae’a o nisi o galuega ua fuafua e le mamalu lautele o aiga, ona o le tausailia o se avanoa lelei o e fuafanua ua i ai i le atunuu, o loo matele fo’I ina fa’aaogaina i latou lava e tasi e le tatou malo ma ona matagaluega e matele ma le fausiga o alatele, o fale tetele ma le fa’atutuina o poloketi tetele e tautuaina ai le atunuu atoa.

“O le tali o na mana’oga taua, o le a toe soloa’I mai o nisi fanau e tausailia fa’ailoga maualuluga i lea matata, ina ia le motusia le auaunaga, ae ia fa’aleleia atili mo le atunuu atoa e fa’aaoga,” o se tala lea a Young. 

O le fanau o lo’o malaga i nei avanoa e sailia ai fa’ailoga maualuluga ma tomai e mo’omia e fa’atino ai tiute I le ASPA pe a toe taliu mai, ua totogia lava e le ASPA a latou aoaoga.

Ua fa’ailoa e Young, “E afua mai i Inisinia o le Eletise, au toso laina o le eletise ma le suavai lea la ua aofia ai ma le au Fua Fanua I le vasega o fanau ua auina atu.”

TOE MAPUNA A’E GASEGASE LEPTOSPIROSIS – MAI MANU, A’AFIA AI TAGATA

Mai le Matagaluega o le Soifua Maloloina,ua toe fa’alauiloa mai nei lapata’iga uma tau le fa’ama’i o le Leptospirosis, o se fa’ama’i nafa’autagia ai le atunuu i tausaga ua mavae ona e mafai ona fe’avea’i mai e meaola ma a’afia ai le soifua maloloina o tagata lautele.

O lenei fa’ama’i e feavea’ia e siama mai le vai lafoa’i “piaga” o meaola e ala mai lea i ni faama’i o maua ai meaola nei ae ua le togafitia e foma’i o meaola.O meaola ua matele ina latou fe’avea’ia siama nei i o latou suavai lafoa’i e aofia ai pua’a, isumu, maile ma pusi. O nisi o meaola o lo’o matele ina fa’afagafao e aiga, ma e nonofo lelei i totonu o falenofo o aiga ma tausia lelei ai e i latou. O lea fo’i la ua fa’afaigofie ai ona ulufia le saogalemu lelei o aiga mai lea fa’ama’i. O isumu fo’i latou, e le mafai ona le fia o i totonu o fale o aiga, e soe’ai ai i toega o mea’ai o lo’o maua i totonu o umukuka ma luga o laulau ma fatai fale nofo o aiga.

Ua sailia i le tulaga o le togafitiga o meaola fa’afagafao ma le latou auaunaga, peita’i ua fa’ailoa mai, ua toe fa’afaigaluega nei fo’i Dr. Ken Lameta e le Matagaluega o Fa’ato’aga, ma o se tasi fo’i sa tele iai ni fa’asea i lona tula’I mai e avea ma foma’I manu, ona e le agava’a o ia e fa’ataua mai ni vaila’au mo le togafitiga o gasegase o meaola uma i le atunuu.

Ua avea lea ma mea ua fa’afaigata ai ona togafitia fagafao a le atunuu ae maise lava i pusi ma maile,lea e matele lava ina fa’afagafao e le mamalu o le atunuu.

O lona uiga o le toe alia’i mai o le fa’ama’i Leptospirosis o se fa’aletonu i le auaunaga lea, pe afai ua leai ua le fa’ataunuuina fo’i togafitiga o meaola fa’afagafao a le atunuu.

Peita’i e ese mai lea lape o le auaunaga o meaola, ua fa’ailoa mai e le matagaluega o le soifua maloloina, “Ua oo mai fo’I vaitau o timuga, ua tele fo’i siama ua ulufia le suavai mama ma ua faafaigofie ona oo atu i fofoga taumafa a le atunuu. O le suavai lafoa’i mai meaola ua mafai ona oo i le suavai mama e inumia e tagata ma maua ai i latou i lea fa’ama’i e faigata fo’i ona togafitia.”

O le isi ala o le fanauiti e ta’a’alo i latou i vaivai ae ua le silafia e i latou ua tafea atu ai ma siama o lenei fa’ama’i mai vai lafoa’i a meaola, o le isi lea ala ua oo ai i tino o le fanau nei siama ma mama’i ai.

Ua mana’omia lava ona tausia lelei meaola olo’o fa’afagafao a aiga, ma ia mautinoa o faia o latou tui puipuia mai fa’ama’I nei ma siama ono mama’i ai. Pe afai o le a tausia au meaola fa’afagafao, ia fa’aaoga totigi lima i le taimi e fagaina ai i latou pe fa’ataele i latou.Ia fa’aaoga fo’i se’evae i taimi e tausia lelei ai lau manu.

E tatau ona fai talavai a au meaola ina ia faia latou tui i le Foma’i Manu a le amatagaluega o Fa’ato’aga. O lenei fo’i fa’ama’i na mua’i fa’ailoa mai e le tamaitai Ofisa o le falema’i o meaola, Tanya Tarasawa, “Ua toe amata ona alia’i mai le leptospirosis i meaola i le taimi nei, ma ua tatau fo’i ona va’ai fa’alelei ai meaola i totonu o aiga, ona o lea ua pipisi lea fa’ama’i ona ua fe’avea’ia e isumu.”

MAE’A TA’AMILOSAGA TA’ALOGA SOOTAGA TAFA’ILAGI & KOMIPIUTA 

E latalata i le to’a 200 le fanau na mafai ona auai i le ta’amilosaga muamua ale Kamupani a le Bluesky, o Ta’aloga e faia i sootaga tau upega tafa’ilagi i luga o Komipiuta, ma o mea fo’i ua masani ai le to’atele o le fanau talavou. O le isi itu e mafai ona ta’a’alo ‘au a le fanau iinei, ma ‘ai o lo’o lu’ia maia i latou i luga o nei so’otaga, ma e pei lava o lo’o ta’a’alo i latou i le potu e tasi.

E to’a 13 au na tuufa’atasia e le Bluesky e fa’atautaia ai le latou ulua’i ta’amilosaga o nei ituaiga o ta’aloga, sa taito’afa tama ma tamaitai ta’a’alo i le ‘au e tasi. Sa le faigofie ona tuu fa’atasia ‘au mo le ulua’i taimi, ona o le aiaiga tau le latou matutua o i ai ma e a’afia ai fo’i ma le filifiliga o ta’aloga e ao ina ta’a’alo fa’atauva ai nei ‘au uma.

O le i’uga o le uluai ta’amilosaga ua maua lea e le ‘au sa fa’aigoaina i latou o le “999” ma e aofia ai MJ Tupua, La'auli Napoleone, Peter Filiga ma Joenino Supapo. O le ‘au tulaga lua na maia lea e le “Choppa” lea sa ta’aalo mai ai Talalelei Fautanu, Malaeloa Folasa, Kalepo Hemingway ma Nate I'amanu.