Tala I Vaifanua

Pago Pago, AMERIKA SAMOA

FA’ATULAGA ASDOE TUPE FETARALE MO AOGA TUA

Mai faamamauga ale Matagaluega o A’oga i le latou uepesite ua mafai ona maua mai le talosaga ua fa’aulu nei e aoga tumaoti i le teritori mai vaega tupe a le fetarale mo aoga i lalo o le tulafono o le CARES Act. 

Aoga maualuga a Fa’asao Malisi ua lisia ai le fa’atupega e $710,289. Mo le Fatuoaiga Montessori e $55,700. O le Aoga maualuga a Kanana Fou e $272,741. Iakina Academy e $970, 436. Ao le aoga a Kanana Fou Elementary e $403,374.

O le aoga a Marist St. Francis e $379,990. Ma le aoga a Pacific Horizons School e $429,681. St. Theresa Elementary ua talosagaina le $368,298. A’o le aoga a Peteli Pentecostal Elementary ua talosagaina le $353,683. O le aoga a Samoa Baptist School ua talosagaina le $240,755. Ao le aoga a le South Pacific Academy ua talosagaina le $637,214. Ma le a’oga a le Manumalo Baptist lea e aofia fa’atasi ai le Elementary ma le High School ua talosagaina le aotelega e $1,625,188.00.

Ua lisia e a’oga ta’itasi le latou fuafuaga fa’ataoto atoa e fa’aaoga ai lenei tinoitupe ua latou talosagaina, ia mautinoa ua laugatasia latou aoga ma a’oga a le Malo.

O le aotelega o nei fa’atupega uma ua talosagaina e a’oga tumaoti ua maua ai le $6,888,722.00. O lo’o i ai foi le vaega tupe mo aoga a le malo. 

Ua fa’ailoa mai e le vasega o A’oga Tulaga Muamua uma i le teritori, “Ua mae’a fa’atautaia aoga fa’apitoa ma Matua i aso Toona’i ta’itasi ina ia fa’ailoa i matua a latou matata e ao ina faia ao i ai le fanau i aiga ma taumafai e faia latou meaa’oga.”

SUIGA POLOA’IGA FA’ALAUA’ITELE LONA FITU – FA’ASA TA’ALOGA BINGO

Ua fa’aauau pea ona taofia mai le toe faia o ni ta’aloga Bingo i le poloa’iga lona fitu ua fa’atulaga nei mo le fa’asa e fa’amalosia ona o le fa’ama’i pipisi o le Coronavirus.

Ua faailoa mai i lea poloa’iga e fa’apea, “O lo’o fa’amamaluina le taofiga o le fa’atasitasi o le to’atele i se nofoaga e tasi e aofia ai sauniga lotu e sili atu ona umi mai le 5:00 i le taeao se’ia pa’ia le 9:00 i le po. O lo’o ua fa’asa pea ona faia ni ta’aloga Bingo i le taimi nei. Peita’i a faia sauniga lotu ma isi uma fa’atasiga e tima’ia lea mamalu lautele ina ia fa’avava mamao mai le tasi i le isi. Ua fa’ailoa aloaia fo’i i le mamalu lautele o le atunuu, o lo’o ua fa’ae’e i le matagaluega o le Puipuiga o le Saogalemu Lautele le malosi’aga latou te fa’amalosia ai lenei tulafono, ma o i latou e faia ma taua’ao pepa fa’ailo o lou solia o nei Tulafono ma fa’auia atu i le fa’amasinoga.”

I le fonotaga a le Kapeneta na fa’amanino atili ai e Kovana LoloMoliga i ta’ita’i o matagaluega uma, ina ia mautinoa o lo’o taofia umalava ta’aloga Bingo i le atunuu. Ua ia fa’ailoa ai, o nei ta’aloga e ave’esea ai tupe mai tagata.

Ua talosagaina fo’i e Kovana Lolo Moliga le Failautusi o le MataupuTau Samoa, le afioga le Ma’oputasi Mauga Tasi Asuega, ina ia fa’ailoaatu i Ekalesia uma lava, o lo ua matua fa’asaina lava ta’aloga Bingo ile taimi nei.

Sa mua’i fa’asaina fo’i ta’aloga Bingo mai le amataga o le fa’asa, onatatala lea i le poloa’iga lona fitu ae o lea ua toe fa’amalosia nei ile poloa’iga ua toe faasa ai nei.

1,527 SUEGA O LE CORONAVIRUS – LEAI SE TASI UA MAUA AI

Talu mai le aso Gafua ua tula’i mai le aofaiga o suega ua mae’afa’atino e le matagaluega o le Soifua Maloloina ma le LBJ MedicalCenter i le aotelega e 1,527 suega ua faia ae leai ma se tasi o nei suega ua fa’amaonia ai ua maua se tasi i le coronavirus.

Ua mae’a fo’i ona amata fa’aaogaina le masini e faia ai seuga a le Covid-19 a le falema’i i Faga’alu, le ituaiga ABI 7500 ma ua mafai onafaia ai suega mo le Covid-19 e 96 suega i le aso e tasi.

O le masini lea o se masini na fa’aaogaina muamua mo isi ituaiga osuega e ese mai le Covid-19, peita’i ua i ai ma le isi latou masiniABI 7500 fou lava o le a mae’a ona saunia lelei mo le fa’aaogaina e faia ai suega nei e le o toe mamao.

O le folasaga a le ali’i foma’i o fa’ama’i pipisi i le atunuu, Dr Aifili John Tufa, sa ia fa’amamafaina ai le tulaga, i so’o se vaipanoao le lalolagi ua mafai ona oo i ai le fa’ama’i o le Coronavirus, “Ua mafua lava ona lutia na atunuu i le covid-19, ona ua latou tatala femalaga’iga i latou atunuu.”

ASO MULIMULI MALGA VA'ALELE VA MA SAMOA – AUKUSO 19

O malaga uma lava sa fa’ataunuu i le va o Samoa ma le teritori ua fa’amae’a nei ia Aukuso 19, 2020, le aso Lulu na te’a nei. Nafa’amautu mai lea tulaga i le saunoaga a Kovana Lolo Moliga i le fonotaga a le kapeneta ua ia fa’ailoa atu ai, o le iuga lea o le taumafaiga ina ia aumaia fo’i ma ni tagata faigaluega agava’a mai Samoa.

O lo ua mafaufau foi Samoa o le a taofia femalaga’iga i le va o Samoa ma Niu Sila ona ua toe maua fo’i nisi i le Covid i Aukilani, e tusa o lipoti ua fa’amauina nei mai lea malo, ma ua toe fa’amamalu fo’i le latou fa’asa talu mai le vaiaso na te’a.

Ua fa’ailoa mai e le Kovana, e le’i i ai lava nisi na talia e le Loia Sili e malaga mai i nei malaga uma ae ua na’o tagata faigaluega lava na o mai ai. O i latou fo’i sa fa’amauina lea i nofoaga fa’apitoa e nofova’ava’aia ai ina ne’i maua se tasi i le fa’ama’i pipisi.

“Pe afai o i ai se tasi na alu e asiasi i Samoa ae ua le maua se avanoa e toe fo’i mai ai, e sili ai ona nofo pea i Samoa e fain ai fe’au a latou aiga i lenei vaitau se’i oo lava ina tatala aloa’ia tatou femalaiga,” o se tala lea a le Kovana mo lena vaega o e fia fo’i mai.

I le malaga mulimuli mai ua fa’ailoa mai e to’a 25 i latou o totoe ile nofoaga fa’apitoa mo e nofo va’ava’aia, peita’i, o le aofaiga o i latou na ulufale mai i nei malaga a le va’alele mai Samoa e 41.

O le tala mai lea nofoaga ina ua asia e le tatou nusipepa mo se ata, ae fa’ailoa mai o le to’afa mulimuli o e na o mai e galulue I Amerika Samoa mai Samoa na fa’ate’a mai lea nofoaga i le aso Lulu, Aukuso 19,2020 e na’o le to’afa lava. Ua avanoa nei lea nofoaga mo nisi fo’I etoe oo atu e nofo va’ava’aia ae ua fa’ate’a le aufaigaluega ina ia oatu e faigaluega i Kamupani Faufale ma Alatele sa malaga mai Samoa.

Fa’aalia e le ali’i na mulimuli lava alu ese mai lea nofoaga, “Ua fiu fo’i le mea e faitau post i le facebook ma tali fesili i aiga. Ai ma moe fa’alelei, ua tatau ona oo i le galuega e fa’aafu ma taumafai e maua se seleni.”

Ina ua fesiligia i lo latou tausiga fa’apitoa I le nofoaga ae fa’aalia e ia, “O le nofo i le faletalimalo le mea lea sa i ai, lelei lava mea uma.”