Fautuaina e le Fa’amasinoga se alii mai Samoa e tausisi i tulafono

Pago Pago, AMERIKA SAMOA

Ua fautuaina malosi e le Fa’amasinoga Maualuga se ali’i mai Samoa o lo o aumau i le teritori nei ma lona aiga ina ia tausisi i tulafono a le malo. 

Na faailoa e le afioga i le ali’i Fa’amasino ia Fiti Sunia i le susuga a Fala Ah Chong i le vaiaso nei ina ua tula’i mo le tuuina atu o lana faasalaga, e tasi lava le mafua’aga ua le mafai ai ona faatonu e le Fa’amasinoga o ia e tula’i ese ma le atunu’u, ona o lona to’alua ma lana fanau, o tagatanu’u uma o le teritori.

Ae afai na te solia se tuutuuga o lana nofovaavaaia poo se poloaiga fo’i a le Fa’amasinoga, o le a le toe i ai loa se isi avanoa mo ia, ae o le a poloaina loa o ia e tula’i ese ma le atunuu.

O le vaiaso nei lea na tula’i ai Ah Chong i luma o le Fa’amasinoga Maualuga mo le tuuina atu o lanafa’asalaga, i le ma’ea ai lea ona ta’usala o ia i le solitulafono o le umia faasolitulafono o vaega o le laau faasaina o le mariuana.

Talu mai le taimi na pu’e faapagota ai e Leoleo le ua molia, sa  taofia pea o ia i le Toese i Tafuna ina ua le mafai ona ia totogi le vaega tupe na faatulaga e tatala ai o ia i tua. Na ulua’i molia e le malo ia Ah Chong i le solitulafono o le umia faasolitulafono o vaega o le laau faasaina o le mariuana.

Ae i lalo o se maliliega na sainia e le ua molia ma le malo, lea fo’i na talia e le Fa’amasinoga, na malie ai Ah Chong e tali ioe i le moliaga lea na toe teuteu e le malo, le moliaga o le umia faasolitulafono o vaega o le laau fa’asaina o le mariuana, lea e mafai ona fa’asala ai se tasi i le Toese i Tafuna mo le umi e mafai ona oo atu i le 5 tausaga, pe faasala i le salatupe e mafai ona oo atu i le $5,000, poo le faasala fo’i i faasalaga uma ia e lua.

I le tali ioe ai o Ah Chong i le moliaga e pei ona toe teuteu e le malo, na ia ta’utino ai e faapea, i se taimi o le masina o Mati o le tausaga nei, na ia umia faasolitulafono vaega o le laau faasaina o le mariuana. Na ta’utino Ah Chong e faapea, i le masina o Mati e pei ona taua, na maua ai e Leoleo ia te ia se pepa iila o lo o i ai lau mariuana.

Ina ua maua lona avanoa mai le Fa’amasinoga, na faatoese ai loa Ah Chong e tusa ai o lana solitulafono sa faia, ma ia talosagaina ai se isi avanoa mo ia se’i fa’aauau ai pea lana tausiga i lona aiga aemaise si ona toalua ma lana fanau laiti.

Na taua atili fo’i e le ua molia i le Faamasinoga lona a’oa’oina o se lesona taua mo lona olaga talu mai le taimi na taofia ai o ia i le Toese i Tafuna, ma ua avea lea taimi e toe fuata’i ai se isi moemoe fou o lona olaga mo le lumana’i. Ua ia iloa fo’i, e le o se mea lelei le soli o le tulafono a le malo. 

Na talosaga loia a itu e lua i le Fa’amasinoga mose faasalaga faanofovaavaaia.

Na taua e le loia a le ua molia, susuga Rob McNeill i le Faamasinoga le salamo moni o Ah Chong e tusa ai o lana solitulafono, ma ua naunau fo’i e toe amata se isi amataga fou i lona olaga. O Ah Chong e pei ona taua e McNeill, o se alii sa galue malosi mo le tausiga o lona aiga e aofia ai lona faletua ma lana fanau.

Ae o le sese o lana filifiliga e ala i lona tagofia o le ‘ava malosi ma fualaau fa’asaina, ua mafua ai ona aafia lona olaga i faafitauli e pei ona molia ma ta’usala ai o ia i lenei solitulafono mamafa. Na talosaga McNeill i le Fa’amasinoga mo se faasalaga faanofovaavaaia, ina ia mafai ona faaauau pea le galue o Ah Chong i lana galuega o se Inisinia e tausi ai lona aiga.

Na lagolagoina e le loia a le malo ia Laura Garvey le talosaga a McNeill mo se faasalaga faanofovaavaaia. 

A o le i alo atu le Faamasinoga mo le iloiloina o se faaiuga mo Ah Chong, na maua le avanoa o afioga i alii Faamasino e iloilo ai mau faamaonia o lenei mataupu, na tauaao atu e le Tamaitai Leoleo ia Off. Zenobia Jennings, o ia lea o loo Tausia ma Vaaia le potu o loo teu ai mau faamaonia a le malo mo le tele o mataupu tau solitulafono.

O le mae’a ai ona iloilo e le afioga i le ali’i Fa’amasino Sili lagolago ia Fiti Sunia o mau faamaonia, na ia faamaonia ai loa, o fualaau faasaina sa maua ia Ah Chong sa faamoemoe e fa’aaoga mo ia lava.

A o le i tuuina mai le faaiuga a le Faamasinoga, na muamua toe faatepa e le Faamasinoga i le afuaga o lenei mataupu.

Saunoa Sunia e faapea, o le mataupu e pei ona ta’usala ai Ah Chong, na afua mai i le mataupu lea na tula’i mai i se vaega o Tafuna i le masina o Mati o le tausaga nei, ina ua talosagaina se fesoasoani a Leoleo e mafua mai i ni ali’i na auai i se inugapia ma faatupu vevesi.

Na aga’i atu Leoleo ma pu’e faapagota mai ai le ua molia ma auina atu loa i le Ofisa o Leoleo i Tafuna mo suesuega atili. A o le i auina atu Ah Chong i le Ofisa mo suesuega, na faia ai loa se suega faapitoa i le tino o Ah Chong ina ia mautinoa na te le o tauaveina ni aupega e ono lamatia ai le saogalemu o Leoleo.

Ina ua saili e Leoleo le tino o Ah Chong, na latou maua i ai se pepa o lo o i ai lau mariuana. Na faailoa e le ua molia i Leoleo, o fualaau faasaina na maua ia te ia, o mea totino lava a ia.

Saunoa Sunia e faapea, i le mae’a ai ona auiliili e le Fa’amasinoga o faamaumauga uma ua o latou luma, ua manino ai o le ua molia o se alii tausi aiga ma galue malosi e saili manuia mo lona aiga i lona toalua ma lana fanau.

Na maua i faamaumauga a le Famasinoga, sa i ai le solitulafono mama na ta’usala ai Ah Chong i luma o le Fa’amasinoga Faaitumalo i ni tausaga ua mavae.

I le tulaga o le taulimaina ai e le Fa’amasinoga o mataupu e faatatau i fualaau fa’asaina, na saunoa ai Sunia e faapea, tusa lava poo le a le tele o fualaau faasaina e maua i se tagata, o loo manino le Tulafono na pasia e le Fono Faitulafono i tausaga ua mavae, e tasi lava le ituaiga faasalaga e agavaa ai tagata uma.

Ui o lea, ua faamaliina le Faamasinoga, o mariuana na maua ia Ah Chong, o mea e fa’aaoga o ia lava.

E 5 tausaga i le Toese i Tafuna ma le salatupe e $2,000 na manatu le Faamasinoga e faasala ai Ah Chong. Peita’i, ua faamalumalu le tuliina o le faasalaga faa falepuipui ae ua poloaina le ua molia e nofovaavaaia mo le 5 tausaga i lalo o tuutuuga e ao ona usita’i i ai.

O tuutuuga o le nofovaavaaia a le ua molia e aofia ai lona tuliina o masina e 20 i le Toese i Tafuna, e faitau ai ma masina e 3 lea ua mae’a ona ia tuliina talu ona taofia o ia i le Toese.

Ua manatu le Faamasinoga, ua lava masina e 6 e tuli e Ah Chong, ae faamalumalu masina e 14 o lana faasalaga, fuafua lava i lona usitaia o poloaiga a le Fa’amasinoga.

Ua poloaina o ia e totogi lana salatupe e $2,000, faasa ona ia toe tagofia le ‘ava malosi poo fualaau faasaina, e le tatau fo’i ona ia toe tagofia le ‘ava malosi.

Na faailoa e Sunia ia Ah Chong e faapea, o lo o i ai le avanoa e poloaina ai o ia e tuua le atunuu ae toe fo’i atu i lona aiga i Samoa, talu ai tulaga faaletonu o lona pepa nofomau lea na mae’a a o taofia o ia i le Toese, ae talu ai o lona faletua ma lana fanau o tagatanuu uma o Amerika Samoa, ua manatu ai le Fa’amasinoga e tuu atu se isi avanoa se tasi mo ia.

Ae afai ae i ai se poloaiga a le Faamasinoga e le usitaia e le ua molia, ona vaavaai loa lea o le Fa’amasinoga i le poloaiga e tuua ai le atunuu ae toe fo’i atu i Samoa.

O afioga i alii Faamasino ia Mamea Sala Jr ma Tunupopo Alalafaga Tunupopo na lagolago i le afioga i le alii Faamasino ia Sunia i le iloiloina o se faaiuga mo lenei mataupu.