Tala I Vaifanua

Pago Pago, AMERIKA SAMOA

FAAILOA E LE ASPA - PA’U TEISI  TAU O LE ELETISE

Ua fa’ailoa e le ASPA i le vaiaso ua te’a, ua i ai sina pa’u teisi o le tau o le eletise. E afua lea tulaga ona ua pa’u teisi fo’i le tau o le suauu i le maketi o suau’u.

Talu mai le masina o Mati ma ua oo mai ia Iulai 2020, ua fa’aititia pe tau le suau’u o lo’o aumaia i le atunuu e tusa o le 16% mai le tau sa i ai ma ua fa’aauau atu lea pa’u teisi i le tau aofai o le kilowatt/hr mai le 0.23sene i le 0.19sene.

O le tau la ua i ai nei le elettise e totogia e tagata lautele mo latou spalati o le eletise mai ia Iulai ua pa’u lea i le 0.29172 sene pe a fa’atusa atu lea i le masina o Mati 2020 sa totogia ai e le lautele le tau o le kilowatt/hr e 0.32925 sa fa’atau atu ai.

E iloga se suiga i le tau o le eletise i le taimi e fa’atuaina ai eletise a le mamalu lautele o lo’o i ai Debit Meter i o latou fale nofo, aua a pa’u le tau le eletise e fa’atau mai ai, ua matauina vave lava le siitia i luga o le aofai o kilouati e maua atu i le $10 e totogia mo se eletise a le aiga. 

Ua fa’ailoa e le ASPA, “Talosia ae tumau ai pea le pa’u teisi o le tau o le suauu ma le kesi fa’apea le kiso aua o lo’o feagai i tatou ma le Covid-19, e le mailoa lelei fo’i tulaga o le oo mai o va’a suau’u i le atunuu i le lumana’i o lenei fa’ama’i i le lalolagi. Peita’i a fa’aauau lava ona pa’u le tau o le kiso, o le a fa’apena fo’i ona fa’atau atu le eletise i le mamalu o le atunuu i se tau pa’u teisi e pei ona i ai nei ia Iulai.”

MALIE KAMUPANI SUAUU - PACIFIC ENERGY - TOTOGIA LE SALA $300,00

O matagaluega a le malo fetarale, le USDOJ ma le USEPA ua latou sainia se maliliega ma le Pacific Energy South West Pacific, Ltd., le kamupani Suauu o lo’o latou sapalaia le teritori i le Suauu, e latou te totogia le sala tupe ona ua latou solituina tulafono tamau o le Vai Mama i Amerika Samoa, po’o le Clean Water Act American Samoa.

I lalo o le maliliega lea ua talia ai e le Pacific Energy,  o le a latou totogia le sala tupe e $300,000 ona o le latou fa’atamala ma ua le suia vave e i latou papa ma alavai sa tatau ona fa’aleleia e ta’i atu ai le suavai palapala ma e tumu i lapisi o so’o se ituaiga mai suau’u ae ua ta’ia ma ua fa’amautu atu i le gataifale o le atunuu.

Ua i ai vaega e lua ua malilie fa’atasi i ai le USDOJ, USEPA ma le Pacific Energy o le a latou fa’atinoa ma usitaia i taimi uma o le latou auaunaga i le malo o Amerika Samoa e ala i le tausia lelei o aiaiga o le Clean Water Act. O le a latou fa’atautaia lipoti uma e tatau ona fa’auia i nei vaega a le Malo Tele i taimi uma, ma o le a i ai taimi e tapena ai ni suesuega e auina atu i fafo mo fa’amaumauga.

O le Pacific Energy lea latou te fa’afoe i le taimi nei le Lotoa o Tane Suauu i Gataivai, ma o nei tane suauu tetele ua fa’amautu i ai le sapalai o le suauu. E i ai le vaitaimi fa’atulaga e tatau ai ona siakia le i ai o le suavai ua ulufia le suauu lelei ma o le taimi lea e fa’auia ese atu ai lea suavai mai le tane, e tatau ona faia. O le suavai lea ua tele ai le lapisi ma isi elemeni e le tatau ona oo i le suavai o le gataifale o le atunuu, ua ulufia le suavai o tafeaga i aso timuga ma ua  fa’auia sa’o lava i le tatou uafu tele i le taulaga.

E tusa o aiaiga o le Clean Water Act sa tatau ona i ai se tapenaga e fa’amautu i ai le suavai palapala lea ua lofia fo’i i le suauu ma isi elemeni e tatau ona oo i le suavai taumafa e tagata ma meaola o le gataifale, ma e ao ina mautu lelei lea nofoaga e fa’auia i ai le suavai mai le suauu, [NPDES] e i ai fo’i lona pemita e tapena e fausia ai.

Sa i ai lea tapenaga i le tausaga 2010 se’ia pa’ia le 2015, ona sau ai lea o galuega uma a le Pacific Energy e le’i toe faafouina lea pemita se’ia oo mai i le 2019, ae fa’ato’a mae’a lelei ai ona tapena le pemita fou ua i ai nei. 

Peita’i, o le sala lenei ua fa’atulaga mo tausaga uma ua faia ai le latou galuega e aunoa ma se tapenaga o le nofoaga e fa’amautu i ai le suavai lapisia lea mai tane suau’u. Ua le faia fo’i ni a latou suega e auina atu i fafo mo fa’amaumauga, ma ua le faia latou lipoti e ao ina fa’ao’o i fafo i nei tausaga mai le 2015 se’ia oo ia Novema 2019.

Ona ua le mautu nei fa’amaumauga uma ua le mafai ona i ai se fa’amauamauga a le USEPA ma le tatou fo’i ASEPA i le aotelega o ituaiga elemeni eseese ua i ai i le gataifale o le atunuu, ae maise fo’i o ni fa’amaumauga i ituaiga o elemeni eseese ua aofia i nei lapisi ua fa’asalalauina i le gataifale o le teritori. 

FALETUAI O FESO’OTA’IGA - FA’ALEAOGA O SE TASI O MATA’AGA

O le talaina i lalo o le faletuai sa fa’atautaia ai le Ofisa o Feso’ota’iga i le taimi o le US Navy i Amerika Samoa o le fa’aleaogaina ai fo’i lea o se mau o fa’amautuina i le Ofisa o le Historical Preservation Office i le atunuu, o se tasi lea o mataaga e fa’amautu ai le tala fa’asolopito o le tatou Malo.

I le taulaga lava ia i Fagatogo, ua lua ai i lea fale nofoaga sa lisia i lea ofisa ua talaina i lalo ae fa’amautu ai se fausaga fou mo fale fou e fa’atautaia ai ofisa o le Malo i le nofoaiga lava a Kovana Lolo Moliga.

O le ulua’i fale na talaina o lo’o ua fa’amautu ai nei le Fale Tinei Afi i Fagatogo. 

O le fale tuai o le ofisa o fesootagia sa fausia i le tausaga 1938, ma sa ulua’i fa’aaogaina o se fale e sapalaia le Eletise i Fagatogo ma sa fa’aaogaina afi e alu i le vai.

Fa’ailoa e le Fa’atonu o le Historic Preservations Office, Letisia Tish Peau, sa fa’auia se fautuaga i le latou Ofisa mai le afioga le Kovana ma le matagaluega o galuega lautele, ona ua fia tuuina i lalo lea faletele ae se’i amatalia galuega o le fausia o le Fale Fa’amasino Fou.

“O le tala na fa’ailoa atu e le matou ofisa, ua mae’a fa’aleaogaina le agava’a o lea faletele i lea tulaga e taofia ai ona tu’ua i lalo, talu mai ona mua’i faia suiga i le fale e fa’aofi i ai se fogafale lua e fa’atautaia ai ofisa o le Matagaluega o Feso’ota’iga,” o se tala lea a Peau.

“I le galuega lava lea e tasi, na ave’esea ai fa’amalama ituaiga tuai sa i ai, ae ua suia atoa i ituaiga fa’amalamalama ua i ai nei, ma na mae’a lelei le galuega toe fa’aleleia o lea fale i le tausaga e 1980. Ua matauina e le to’atele lea faletele o le Ofisa o telefoni, ma sa i ai telefoni e faia ai talanoaga ma aiga i nuu mamao,” o se tala lea a Peau.

“O le mafuaga tonu lea ua le toe aofia ai lenei faletele i le lisi o fale a le 1990 US Naval Tutuila Historic District mo le National Register of Historic Places.”