Fesiligia Senate tapenaga a le malo mo le faama’i o le COVID-19

Pago Pago, AMERIKA SAMOA

O le iloiloga a le Senate ma le Taitaifono o le Komiti Faafoe mo puipuiga o le Coronavirus i le vaiaso na te’a nei, na fesiligia ai e afioga i Senatoa le susuga a Iulogologo Joseph Pereira e faatatau i tapenaga a le malo e faatino pe afai ae taunuu mai le siama i le atunuu.

O le afioga i le alii Senatoa ia Satele Galu Satele, le taitaifono o le Komiti o le Soifua Maloloina na faatautaia le iloiloga.

Na taua e Iulogologo e faapea, o loo faagasolo pea tapenaga a le Komiti Faafoe mo le taumafai ina ia puipuia le atunuu mai le aafia i le siama o lenei faama’i mata’utia. Afai e i ai se taimi e faamaonia ai le aafia o se tasi o le atunuu i lenei faama’i, ua i ai tapenaga a le Komiti Faafoe ua maea ona faatulaga.

Ua uma ona faatulaga e le Falemai o le LBJ se tasi o a latou fale (wing) e 8 potu o loo i ai e faaavanoa mo togafitiga pe afai ae aafia se tasi i le faama’i. Ua i ai foi Faleie ua fausia i fafo o le falema’i o le LBJ e faasauni mo isi gaioiga e aofia ai le faia o suega mo tagata e aafia. 

Ae afai e atili pea ona toatele nisi e aafia i lenei faama’i, ua sauni le falemai o le LBJ e liliu atoa le isi fale mo togafitiga ma tapenaga uma ina ia mautinoa e saogalemu nofoaga e togafitia ma tausia ai i latou o le a aafia i le gasegase.

O isi tapenaga a le Komiti Faafoe e pei ona saunoa Iulogologo e aofia ai le tatalaina o fale e 2 o loo fausia i le vaega o le Tafuna Health Center i le faaiuga o le masina nei, e fesoasoani ai i le faatinoina o lenei faamoemoe taua.

I tulaga o suega mo i latou o loo galulue i le Laina Pito i luma, poo i latou o loo agai atu e siaki vaalele o loo malaga mai ai pasese mai fafo e aofia ai ma fomai ma sui o le Soifua Maloloina, na faamaonia ai e Iulogologo le silia i le 1,000 le aofa’i o suega ua faia, ma, e leai se isi o faamaonia ua maua i lenei faama’i.

Sa ia taua e faapea, e 6,000 le aofa’i o tui ua maea ona taunuu mai i le atunuu, ma le faamoemoe e faaauau pea ona auina mai nei tui e sauni ai mo se faalavelave e ono tulai mai i le atunuu. O le afa o tui nei ua sauni le malo e faaaoga ina ia mautinoa e faaauau pea suega mo tagata faigaluega uma o loo galulue i le puipuia o lenei faama’i e aofia ai ma tagata matutua o loo faogifie ona aafia i lenei faamai.

O le isi afa o tui e pei ona saunoa Iulogologo o loo sefe malu pea ma le faamoemoe faatoa faaaoga pe afai ae tulai mai se faafitauli poo se faama’i ua maua i Amerika Samoa.

Na taua atili e Iulogologo le faaauau pea lea o le tapunia o malaga a vaalele i le va o Amerika Samoa ma Hawaii, ona o loo faatupulaia pea le aofai o tagata o loo faamaonia le aafia i lenei faama’i i Hawaii. Sa faailoa atili e Iulogologo i afioga i Senatoa le fuafuaga a le afioga i le alii Kovana ia Lolo Matalasi Moliga ina ia faaauau pea le tapunia o malaga a vaalele seia aulia le masina o Setema.

O se tasi o faafitauli o loo feagai ma le Komiti Faafoe i le taimi nei e pei ona saunoa Iulogologo, o le tulaga i le laiti o Foma’i e mafai ona faatinoina togafitiga mo tagata pe a gasegase. O lea faafitauli e pei ona saunoa Iulogologo, e le na o Amerika Samoa o loo aafia ai lalolagi atoa. 

Sa ia taua atili foi e faapea, o loo agavaa lava foi Amerika Samoa i lalo o faiga fai paaga ma le Asosi o Fomai ma Tausima’i i le lalolagi ma le malo tele o Amerika, lea e mafai ai ona ofo mai soifua ma taimi o fomai e fesoasoani ai ia Amerika Samoa pe afai e i ai se taimi e faatupulaia ai le aofai o tagata e aafia i lenei faama’i.

MALAGA A VAALELE MAI SAMOA

O se tasi o mataupu na fesiligia i le taimi o le iloiloga, o malaga a vaalele mai Samoa lea o loo toe faafoi mai ai tagatanuu o Samoa o loo nonofo mau i Amerika Samoa nei. Na taua e le afioga i le alii Senatoa ia Logoai Siaki lona le fiafia i le tulaga o loo faia i lea fuafuaga, e le gata o loo aumai ai tagata mai Samoa e tafafao ma eva i le teritori i le taimi o le faama’i, ae ua atagia mai ai le faapito o lea faiga mo na o tagata Samoa,ae faatuatuana’i ai tagatanuu o Amerika Samoa o loo poloka i Hawaii ma Amerika.

“O lea ua maua i ripoti o loo aumai ai ma tagata mai Samoa o loo o mai e eva ma tafafao iinei, ae oloo faaauau pea ona poloka o tatou tagatanuu i Hawaii ma Amerika,” o le saunoaga lea a Logoai.

I le finagalo o le afioga i le alii Senatoa mai Manu’a, sa le tatau ona tatala le avanoa e la’u mai ai fua tagata Samoa o loo nonofo mau iinei sa poloka i Samoa. I lona taofi, afai ua faia se faaiuga e aumai ai mai fafo, sa tatau ona ave le faamuamua i tagatanuu o Amerika Samoa o loo poloka i Hawaii ma Amerika.

“Tusa lava pe nofomau, aua le aumaia fua na tagata i le atunuu. Ave le faamuamua e aumai ai o tatou tagatanuu o loo poloka i Hawaii ma Amerika,” o le saunoaga lea a Logoai.

Na saunoa Iulogologo e faapea, pau tagata mai Samoa o loo mafai ona aumai, ua na o tagata e i ai le tomai ma le agavaa faapitoa e aumai e fesoasoani i avanoa o loo moomia e kamupani.

O lea saunoaga mai ia Iulogologo sa le i nofo lelei i le finagalo o Logoai. Saunoa Logoai e faapea, tusa lava pe manaomia e le malo ma pisinisi tagata o loo i ai le tomai faapitoa, i lona lava taofi, sa le tatau aumaia nei tagata. Tusa lava pe afaina ai pisinisi e leai se mea o i ai, ae a afaina loa le atunuu ona o lenei faama’i, ona faaletonu loa lea o le tamaoaiga o le atunuu aafia atu ai ma soifua o tagata lautele,” o le saunoaga lea a le afioga i le alii Senatoa.

Na fesili le afioga i le alii Senatoa ia Tuaolo M. Fruean poo i ai ni tagata faigaluega o loo galulue talu mai le taimi o le lockdown ia Mati o le tausaga nei e le i totogia a latou ova taimi. Saunoa Iulogologo, ua uma ona totogi ova taimi o tagata faigaluega uma lava o loo galulue i le taimi o lenei faama’i.

MAOTA O SUI

Na fesiligia foi e le maota o sui sui o le Komiti Faafoe a le Coronavirus e uiga i lenei mataupu i le vaiaso nei. Saunoa le Sui Fofoga Fetalai ia Fetu Fetui Jr e faapea, pau le auala e mafai ai ona faaauau pea taumafaiga ina ia puipuia le atunuu mai lenei faama’i, o le mautinoa lea e faia tui ma siaki o tagata uma lava e ulufale mai i le atunuu.

E ui i le faaiuga a le malo ma le afioga i le alii Kovana e taofia vaalele mai Hawaii ma Amerika, ona o le tulaga faatupulaia o i latou o loo faamaonia le maua i le faama’i, peitai na saunoa Fetui Jr e faapea, e tatau lava ona silasila toto’a le malo i se auala e aumai ai tagatanuu o loo poloka i fafo ina ia mafai ona palota i le palota tele ia Novema o le tausaga nei.

O le finagalo o le sui fofoga fetalai na lagolagoina lea e nisi o afioga i faipule. Saunoa nisi o faipule e faapea, afai ua tatala le avanoa e malaga mai ai tagata mai Samoa i le atunuu, ua tatau foi ona silasila toto’a le malo mo se avanoa e malaga mai ai tagatanuu o loo poloka i Hawaii ma Amerika.