Tala I Vaifanua

Pago Pago, AMERIKA SAMOA - 

34 FAIFE’AU FA’AU’U SEMINARE FA’AFAIFEAU EFKAS - KANANA FOU

Ia Iulai 04, 2020 e ese fo’i le ituaiga o fa’amanatuga na alofaiva i ai le Ekalesia Fa’apotoipotoga Kerisiano i Amerika Samoa (EFKAS), sa faia ai le fa’au’uga o Faife’au Fa’au’u mai le matou Seminare i Kanana Fou ma e to’a 34 i latou na fa’au’u mai ai.

Ona o aiaiga o le Fa’ama’i pipisi o lo’o usita’ia pea e le Ekalesia Aoao, sa latou fa’aitiitia ai lava lenei fa’amoemoe, ma ua le matua tumutumu ai le sauniga mamalu i lenei tausaga.

O le susuga i le Toeaina ia Fiti Aofia, le Ta’ita’ifono o le Komiti a Tama o le Ekalesia, sa ta’ita’ia le sauniga, ae mautofi ai le susuga i le Ta’ita’ifono o le Ekalesia ia Faaeteete Saifoloi FT i talosaga, a o le Failautusi Aoao ia Nafatali Falealii FS sa feagai ma le Afioga Paia a le Atua.

O Saifoloi ma le susuga i le Sui Ta’ita’ifono o le Ekalesia ia Leatulagi Faalevao FT sa tau aaoina tusi i’u.

E to’a 11 i latou sa fa’auuina i le fa’ailoga o le Bachelor of Divinity:  Bennett Muasau, Lotu Elisara, Teuaelilo Elisara, Mahigale Farani, Tapaaufanua Fatuleai, Thomas Foilefutu, Koakoa Imo, Jonathan Laafai, Sita Molotii, Gatai Pati, ma Gilda Patu.

E to’a 2 i la’ua se fa’auu i le fa’ailoga o le Certificate of Theological Studies:  Fiamama Muasau ma Mele Foilefutu. O le susuga i le A’oa’o ia Bennett Muasau sa fa’auluulu i ai le tausaga fa’aiuaso ma na filifilia e fai ma sikolasipi a le Ekalesia.

A o le susuga i le A’oa’o ia Mahigale Farani mai Tuvalu sa avea le fa’ailoga fa’apitoa o le lauga.

E tusa ai ma le Tusi Faitau Aso o le Ekalesia, o le feau sa laugaina e le ta’ita’i o Aofia e tomatau ai le ‘au fa’auu, “Tautuana ma outou fa’aiuaso le miti a le Ekalesia ia fa’aauauina.  “O le ‘aufaigaluega e o mai ma o, ae tumau lava le galuega a le Atua, ma le miti a le Ekalesia ia auauna ma tautuaina le galuega lea.” Ua sauni ni isi o le ‘aufaigaluega e malolo i lenei tausaga, a o outou sfa’aiuaso, tou te fa’aauauina le miti lea.”

MALAGA TOGIPAU MAI HAWAII - LEA NI PASESE MALAGA MAI AI

I le fonotaga a le komiti fa’afoe o le coronavirus i le aso Sa ua te’a sa toe fa’amalamalama ai e le afioga i le Lutena Kovana, Lemanu Peleti Mauga le tulaga o le malaga togipau o lo’o galue ai le malo i le taimi nei mai Hawaii, e ave atu ai i Honolulu  i latou o lo’o i Amerika Samoa. 

O lea malaga togipau, e leai ni pasese e aumaia ai mai Hawaii, ae ua fa’atulaga o le malaga toe foi, e malaga ai i latou o gasegase mo talavai, fanau aoga mo kolisi, fanau a le atunu’u e ulufale i le militeri ma nisi o lo’o i ai pea i le teritori. 

“O le tulaga i le tatala o le ulufale mai o nisi mai Hawaii ma Samoa e le o fa’atagaina i le fa’asa ua fa’amamaluina e le tatou malo. O lo’o tamau le fa’asa i mea ua amata ona fa’ama’amulu mai nei i le ulua’i fa’asa na fa’amamaluina,” o le sauniga lea a Lemanu. “Ua fa’aauau pea ona feutaga’i lenei malaga totogi pau, ma ua manatu o le a fa’ataunuu i le isi lua vaiaso o lumana’i.”

A ma’ea on fa’atulaga ona tuuina atu lea i le kovana sili e fa’amonia.

Saunoa Lemanu, “O lo’o taumafai ona galulue muamua le tatou malo ma le Matagaluega o le Soifua Maloloina e fa’amae’a muamua mai malaga mai Samoa e toe fa’afo’ia mai o tatou tagata, ona fa’ato’a fa’ato’ai mai ai lea o le malaga mai Hawaii aua e to’atele fo’i le aofaiga o le pasese mai Honolulu.”

“I le taimi nei, ua toe taga’i toto’a lava le afioga le Kovana i le tulaga toe pesia vave o le to’atele o tagata i Hawaii ma ua toe maua fo’i nisi i NZ, o nei malo e feso’ota’i so’o ma Amerika Samoa i malaga a le va’alele i le aso e tasi e oo mai ai le tagata mai nei malo ia i tatou. O le tami nei o lo’o tapunia femalaga’iga i le va o le tatou malo ma Hawaii fa’apea ma Samoa.”

Toe fa’amanatu atu lava e Lemanu i le mamalu o le fonotaga ina ia fa’afofogaina fo’i e le mamalu lautele o le atunuu, “Ua fa’amaulalo atu lava le Kovana i ana saunoaga fa’apitoa i le atunuu, ua tapunia pea femalaga’iga ona o le manatu i le tautuaina o le mamalu lautele o le atunuu pe afai ae oo mai le Coronavirus ma a’afia tagata e to’atele, e le’i taitai fo’i ona mae’a tapena uma se auaunaga ia mautu nofoaga fa’apitoa e togafitia tagata e ono a’afia e le tatou malo ma le matagaluega o le soifua maloloina. E sili mamao ai ona maua a’e i latou i na nofoaga i fafo e lelei falema’i ma tele moega e avanoa e mafai ona fa’anofo lelei ai i latou mo togafitiga.”

Ua fa’aalia i le lipoti a le Matagaluega o le Soifua Maloloina ua mae’a faia suesuega ma tui mo i latou e 950, ae ua maua mai suega e leai ma se tasi emaua i le Covid-19. E 506 i latou na faia tui suesue nei o tagata faigaluega o lo’o ta’imua mai i galuega fesoasoani ma galuega suesue o le fa’ama’i Coronavirus i le teritori.

E 158 i latou ua mae’a aumaia mai malaga a va’alele mai Samoa e toa 65 i latou ua mae’a le latou taimi 14 aso na nofo va’ava’aia ai ma ua fa’ataga ona o i latou aiga i le taimi nei. Mai le aso 3 Iulai, 2020 e to’a 50 i latou o totoe i le Sadies by the Sea i Utulei, 41 o totoe i le DYWA, ae to’alua o lo’o nofo va’ava’aia fa’apitoa i o latou aiga.

I le taimi nei e toe 5,188 suega o lo’o totoe e fa’aaoga mo le sailiga o tagata o lo’o a’afia i le Coronavirus i le atunuu.

Ua fa’ailoa mai fo’i e to’alua tagatanuu o Amerika Samoa sa fia aumaia o latou tino maliliu i le atunuu ma sa aumaia lea i le Cargo flight.

TOE AMATALIA LE FAITAUAOFA’I O TAGATANU’U AMERIKA SAMOA

O le aso 15 o Iuni sa toe amatalia ai le faitauaofa’i o tagatanu’u i totonu o Amerika Samoa talu mai ona taofia i le masina o Mati ona o le poloaiga fa’alauaitele a le Kovana Sili i le pepesi o le fa’ama’i o le coronavirus. 

Fa’ailoa e le Faatonusili o le Matagaluega o Fefa’atauaiga a le tatou Malo, Fuiavailiili Keniseli Lafaele e fa’apea ua toe amatalia aloaia le faitauaofa’i ma o lo’o fa’afoeia lea a le aufaigaluega e tusa ma le 264 i latou mai le ofisa o tusigaigoa (Census Office.)

Ua ia talosagaina ma le fa’aaloalo le mamalu lautele ina ia talia lenei savali i le tusigaigoa ona o le tauatele o le fa’amautuina o numera o tagata lautele o lo’o alala i le teritori. 

O se fa’aaliga fa’alauaitele a lea ofisa, o lo’o fa’ailoa ai - O LE FA’AMANATU INA IA FAITAUINA TAGATA UMA. O le fa’amoemoe maualuga o le Tusigaigoa 2020 i Amerika Samoa ia faitauina tagata uma o le Teritori. O lou taliina o fesili o le Tusigaigoa, o le fa’atinoina lea o ou tiute e fesoasoani i lou atunu’u aua fuafuaga mo le isi 10 tausaga. E tāua fa’amaumauga uma e tu’uina mai ma e matuā malupuipuia e le tulafono a le Malo Tele. Afai e le’i faitauina oe ma lou auaiga, fa’amolemole vala’au mai I le Ofisa o le Tusigaigoa i le telefoni 644-2020. Ia mautinoa ua aofia oe ma lou auaiga. Fa’afetai fesoasoani mai e fa’amae’a atoatoa lo tatou galuega tusigaigoa.