Tala I Vaifanua

Pago Pago, AMERIKA SAMOA - 

FAAILOGA FA’APITOA LAUMUA O LE SEGAULA: VASEGA FAAIUASO 2020:

O nisi o fa’amaumauga ma ata ua lafoina mai mo le silafia o le mamalu lautele o le atunuu o i latou na faai’u manuia mai a latou a’oga maualuluga ma ua umia fo’i o latou tipiloma o se fa’amaoniga ua pasia e i latou nei aoaoga amata i sailiga o fa’ailoga maualuluga i o latou soifua aoaoina.

O le ua maua le tulaga togisilia i le vasega fa’auu 2020, o Phelan Escalanti Leulua'i mai Faleasao ma o se tasi o afafine e faassino ia Siimalevai Leuluai lona tama matua ma le faletua o Folau Leulua’i. O ona matua faaleagaga Rev. Elder Iosefa Autele ma Fouina Autele o le EFKAS i Faleasao.

Ua i ai lana fuafuaga o le a ulufale i le USArmy i le masina o Iulai, ma o ia fo’i sa avea ma Peresetene o le latou vasega fa’aiuaso, ma o le sui peresetene o le Close Up Club a le Manu’atele.

O ia o le totino o le NHS a le Manu’a High, ma ua fa’au’u o ia ma le GPA 3.92. Ua maua fo’i e ia le togisilia i le suega SAT.

O le tulaga lua o le tamaitai o Lynette Ioane mai le afio’aga o Fitiuta. O ona matua o Peni ma Su’a Ioane a’o ona matua fa’aleagaga o Rev.Kimoko ma Fofoa Lifuka o le EFKAS i Fitiuta lava.

O Lynette o le Pereseetene o le Asosi a Fanau A’oga o le vasega faaiuaso, Peresetene foi o le Close Up Club a le Manu’a High, o le totino o le Maia Choir, Totino o le Autalavou a Fitiuta ma le A’oga Aso Sa o le a ulufale fo’i o ia e faaauau aoaoga maualuluga i le tatou Kolisi Tuufa’atasi i le amataga o le isi tausaga aoga fou. Ua naunau o ia e sailia lona fa’ailoga maualuluga i mataupu Fa’afaia’oga.

O fa’ailoga fa’apitoa mo le Togisilia i le Suega SAT ua maua lea e Phelan Escalanti Leualua’i ma Magic Pearson. Fa’ailoga o le Togisilia i le Suega a le ASVAB ua maua lea e Magic Pearson.

O le sui ua mauaina le fa’ailoga a le Leadership a le Pule Aoga ua maua lea e Lynette Ioane ma McKayla  Taula’i. O le fa’ailoga o le sui amio lelei i le vasega fa’aiuaso ua maua lea e Fetoia’i Sela Lauofo.

O sui totino o le NHS i le Manu’a High ua faauuina nei e aofia ai:  Phelan Escalanti, Lynette Ioane, Magic Pearson, Seta Lauofo, Violeta Mauga, Simamao Mauga, Mckayla Taula’i.

O Mckayla Taulai ma Phelan Escalanti o le a la’ua auai atu i le USArmy e tautua ai i le amataga o le tausga aoga fou. O sui ua agava’a i le sikolasipi a le “Toa o Manu’a” ua maua lea e Magic Pearson, Lynette Ioane ma Seta Lauofo.

I’U INA MALIU LETINI RICKY FALA MAUGA - GASEGASE LEUKEMIA

Ua i’u taumafaiga uma ina ia toe malosi mai Letini Ricky Mauga, ina ua maliu o ia i le aso Sa na te’a nei i le Leukemia, o le kanesa o le toto. O le taotoga o lona tuafafine, sa taumafai ai ona avatu sosia o ponaivi o le tino o lona tuafafine e fa’aaoga e Letini, e gaosia ai sona toto e lona lava tino. O se taotoga e ogaoga fo’i ona afaina i lona tuafafine, peitai e le’i fo’i le alofa atu i le tiga o i ai le Ricky, ma  na malaga mamao atu mai le Manu’atele mo lea faamoemoe taua.

Lea ua fai i lagi lea tuligasi’a i le Maota gasegase o Stanford Medical Center i Palo Alto.

I lenei foi taumafaiga ua iloga ai le alofa faitama, faiuso ma le faituagane o aiga Samoa ae maise i le va’aiga a le aufaigaluega alii ma tamaitai foma’i i le Stanford Medical Center sa nafa ma nei taotoga na faatino ia fesoasoani ia Letini Ricky Fala i ona togafitiga.

E to’alua ona tuafafine sa auai fa’atasi ma Fala i ona toe taimi, a’o feagai o ia ma taotoga ina ia mafai ona fa’aaoga e ia sosia o ivi e toe gaosia ai e ia lona lava toto. Peita’i ua fa’aalia, i le taimi o lona taotoga ua vaivai ai lona tino ma ua le gafatia ona fa’ataututu e ia le Kimo fa’atasi ma le taotoga ua mana’omia ona faia.

Ua i ai le Itulau tafailagi o lo ua mae’a fa’atulaga a le Manu’atele, lea ua fa’aaogaina mo fa’amaisega ma fe’au fa’amafanafana ale mamalu lautele o le atunuu ae maise aiga e faaoo atu i nai matua i le Manu’atele ma aiga o loo i fafo o lenei talavou lototele.

O le Itulau Tafailagi fo’i lea a le Manu’atele ua molimoli mai ai ma se fe’au taua mai le aiga, mai ona matua o Samoa Letini ma Fa’iga Mauga mai Ta’u Manu’a, e fa’afetaia ai le to’atele sa nofo tapuaia faiva o Letini Ricky i lona gasegase na feagai ma ia.

E le gata i lea, ae ua avea le itulau ma ala e fa’aoo atu ai fa’amaisega mo matua ma le pa’ia o aiga i so’o se vaipanoa o le lalolagi. Ua avea fo’i ma so’otaga i le pa’ia o aiga uma e fefa’amafanafana’i ai i taimi fa’apenei o le soifuaga.

O se fe’au taua mai nai matua ma le aiga, ua fa’ailoa mai ai, “Alofagia, ia taofia le fa’asalalauina o ata o Letini Ricky i lona moega ua maliu, peitai ua saunia ata o ona foliga ataata ma le fiafia lea e sa ia saunia a’o le’i ma’i tetele ma tigaina, ia fa’aaoga. O ona foliga na e manatu o ia e fia fa’amanatu mai pea ia i tatou uma, e iloa ai, ua alu o ia ma le fiafia ma le agaga fa’afetai tele i le tapua’iga o lona gasegase e le pa’ia o aiga, uo ma e masani, ae maise i latou uma sa ofoina atu tatalo mo ia.”

Ua tapena nei le malaga toe taliu mai a Letini Ricky Fala Mauga ma nai ona tuafafine i fanua, pe a mae’a tatala femalaga’iga i le va o Amerika Samoa ma le Malotele. E toe fia lagomau lava lona tino i le Manu’atele.

Ua tapena ai fo’i i lea Itualau Tafa’ilagi a le Manu’atele le ala e mafai ai ona e foa’i i lou loto malie ise seleni sailia mo le toe fa’afo’ia mai o lea alo o le atunuu e malolo tumau mai i ai. Ia fa’amaise le Agaga le Atua i matua ma le pa’ia o aiga.

MAI LE TBAS - VA’AIA LE TELE O NOGATUPE MAE’A TOTOGIA STMULUS:

Fa’ailoa e se sui o le faletupe o le TBAS i Tafuna ua faailoa ai, “O se mea matagofie ua va’aia i le tautuaina o le toatele na gasolo mai e tala latou siaki o le Stimulus, ua fa’amae’a ai toega o nogatupe a nisi sa faia i le faletupe lenei, a’o isi fo’i ua totogia ta’i lua pe tasi fo’i peimeni o latou nogatupe o i ai i le tatou faletupe.”

“O se mea lelei lea ua tupu mai i lenei vaitau ua taua’aoina ai Stimulus a tagata taigaluega ma maua Saogalemu mai le Malo tele. Ua le o tau toe manatu ai i se tigaina e tu mai le uumi o itula e tautuaina le mamalu o le atunuu, ae ua va’aia fua lelei o le maua e tagata lautele o nei fa’amanuiaga i le vaitau o le Coronavirus,” o se tala lea a le sui o va’aia le lala i Tafuna Makerita Polu.

“O le tulaga o pisinisi ua va’aia le mautu atu o latou talosaga mo le fesaosoani tau nogatupe lea e fa’aleleia atili ai latou pisinisi ona ua limiti fo’i le tupe maua i le tapunia vave o pisinisi, ua le oo i itula e sa masani ona tatala ai. O nisi sa 24 itula o tatala faitoto’a e tautuaina le atunuu ae ua fa’asalafa i le 6:00 i le taeao i le 6:00 i le afiafi i taimi na amata mai ai le fa’asa ia Mati, se’ia oo mai ia Iumi fa’ato’a suia ai i le 5:00 i le taeao ae tapunia i le itula e 9:00 i le po.”

O isi faipinisi ua fa’aaogaina tatau lea avanoa o Nogatupe mai le SBA, o le vasega lea o Fai Pasi ma Fai Ta’avale Laiti La’upasese, ua talosagaina e i latou le fesoasoani e fa’aleleia atili ai latou aseta, aua ua limiti fo’i latou taimi e feoa’i ai e la’u pasese. A laititi le taimi, fa’aitiitia ai fo’i ma le tupe maua mai, ma ua le lava ai le fa’asoa mo le aiga, le avetaavale ma le sui e ona le taavale la’u pasese.