To’alua maliliu ina ua goto ma malepe se va’a alia i le va o Auasi ma Aunu’u

Pago Pago, AMERIKA SAMOA - E to’alua ni Tama matutua na maliliu i le aoauli o le aso Gafua o le vaiaso nei, ina ua goto ma malepe se va’a alia na malaga ai le lata i le to’a 20 le pasese na malaga mai i le uafu i Auasi ma le fa’amoemoe e aga’i atu i le motu o Aunu’u.

Na faamaonia mai e le Pulega a le Falema’i i Faga’alu le maliliu o i laua nei i le taimi na taunu’u atu ai o laua tino i le afiafi lava o le aso Gafua na te’a nei, aso 15 o Iuni. E to’atasi le pasese na faanatinati atu i le Falema’i ina ua mae’a le fa’alavelave, o le susuga lea i le Faifeau o le Ekalesia EFKAS i Aunu’u. I se fesootaiga ma nisi o le aiga o le ali’i Faifeau, na faamaonia mai ai i le Samoa News le toe te’a o le ali’i Faifeau i tua mai le falema’i, i le mae’a ai o togafitiga sa faia mo lona soifua maloloina i le umi e 24 itula.

Na taua e nisi o le motu o Aunu’u i le Samoa News e fa’apea, o lenei fa’alavelave na tula’i mai ina ua aga’i atu le va’a alia mo lana malaga mulimuli mai le uafu i Auasi e aga’i atu i Aunu’u.

E pei ona taua i le ripoti a le Samoa News i le gagana faaperetania i le aso ananafi, e silia i le to’a 20 le aofa’i o le pasese sa i luga o le va’a i le taimi na goto ma malepe ai ona o le malolosi o galu, peita’i i se fa’atalatalanoaga mulimuli ma sui o le motu i le taeao ananafi, na faamaonia mai ai, e to’a 19 le aofa’i atoa o le pasese sa i luga o le va’a alia. 

O i latou nei e to’a 19 e aofia ai Tina ma a latou fanau, o Tama matutua e aofia ai ma le ali’i Faifeau. O le tagata pito laititi lava o le pasese, o se teineititi e 4 tausaga le matua, lea sa i ai fo’i ma lona Tina ma lona uso i luga o le va’a.

E le i leva lava ona tuua e le va’a alia le uafu i Auasi mo le aga’i atu i Aunu’u, ae tula’i mai loa le faalavelave ina ua taia e se galu malosi le va’a ma goto ai i le sami. Mulimuli ane na matua malepe lava le tino o le va’a, ma o nisi o laupapa o le va’a na mafai ona faaaoga e tagata o le pasese e faaopeopea ai a o faatalitali ai mo se lavea’i.

O le taimi lava na tula’i mai ai le fa’alavelave, na logo ai loa e tagata o aiga sa i luga o le uafu i Auasi o latou aiga i tai i Aunu’u, ma logoina ai loa le Aumaga mo se fesoasoani. Na vavave gaioiga a tagata sa i ai i tai i le motu i le taina lea o le Logo o le malumalu e fai ma faailoilo i le motu atoa, e i ai le fa’alavelave ua tupu.

Pe rusa o le 40 minute talu ona faaopeopea le pasese i le sou o le sami ae taunu’u loa le alia o lo o malaga atu ai sui o le Aumaga ma lavea’i mai ai loa le to’atele o le pasese. 

O se ripoti na maua e le Samoa News, na taua ai le tulaga lea e fa’apea, e taunu’u le va’a alia faaola, ae o le taimi lea ua vaaia ai tulaga faaletonu i le malosi o le Tama matua muamua lava lea na faamaonia ua maliu. Na toso atu i luga le tino o le Tama matua ma galulue ai loa sui o le Aumaga e faatino le Fesoasoani Muamua peita’i na siliga tali i seu se lavea’i.

E pei ona taua e molimau, e le o le pasese atoa e to’a 19 na mafai ona faasao e le Aumaga. E na o le to’a 17 le aofa’i o le pasese na mafai ona faasao e aofia ai ma le tino o le Tama matua lea na faaletonu i le taimi na goto ai le va’a, mulimuli ane maliu ai lava. O tagata e to’alua na tuu ai lava i le sami e le i avea i tai i Aunu’u o le susuga i le ali’i Faifeau ma le isi Tama matua, e to’alua i ai Tama matutua na maliliu. 

E le o mafai ona faamaonia mai i le taimi nei le mafua’aga na ala ai ona alu le va’a alia lea na malaga atu ai le Aumaga e fesoasoani i le pasese, e aunoa ma le aveina a’e i luga o le Faifeau ma le Tama matua na totoe i le sami. 

O se ripoti faatuatuaina na maua e le Samoa News, na fiu le Faifeau ma le Tama matua lea ua maliu e valaau i le va’a e fo’i atu, ae na tei lava ua aga’i ese atu ae tia’i ai i laua i le ogatotonu ma le sousou o le sami.

E silia i le 2 itula talu ona faaopeopea le ali’i Faifeau ma le Tama matua i luga o le sami ae taunu’u loa ma le va’a lavea’i a le Ofisa o Leoleo, le va’a a le Marine Patrol, ma lavea’i mai ai loa le ali’i Faifeau, ae paga lea, e taunu’u atu le va’a Leoleo ua tulaga faaletonu le Tama matua lea na to’alua ma le Faifeau i tai i le sami.

Na taua e molimau sa i ai i le taimi o le fa’alavelave, ana vave le alu atu a le va’a Leoleo, atonu e faasao le soifua o le Tama matua lea na to’alua ma le Faifeau i le sami mo le lata i le 2 itula. O le faafitauli na tula’i mai, e le i lelei fesootaiga a le au va’a a Leoleo ma le latou Ofisa, ina ua alu atu sa’o lava le va’a Leoleo faasasa’o i tai i Aunu’u, ae o uta i Auasi lea o lo o tula’i mai ai le fa’alavelave.

SAOGALEMU O TAGATA I LUGA O VA’A ALIA

O se tasi o mataupu na fesiligia ai e le Samoa News sui o le motu o Aunu’u, o le aofa’i sa’o lava o le pasese e tatau ona ave e le va’a. 

Na taua e se tasi o molimau faatuatuaina, e to’a 6 lava le aofa’i sa’o o le pasese e faataga ona malaga i luga o le va’a i soo se malaga, peita’i o le faafitauli lea na tula’i mai i le malaga lea na goto ma malepe ai le va’a, e to’a 19 le aofa’i o le pasese na ave e le va’a, tusa lea ua faatoluina le aofa’i o le pasese e faataga ona ave.

SUESUEGA A LEOLEO

O le mae’a ai o lenei faalavelave mata’utia, na amata ai loa ona galulue Leoleo Suesue e faatino le latou galuega, e ala i le fesiligia lea o nisi o molimau sa i ai i le taimi o le fa’alavelave, e aofia ai ma le pasese o le va’a lea na goto ma malepe i le malolosi o galu fafati.

TALOSAGA MO SE FESOASOANI A LE MALO

O le alia’e mai ai o lenei fa’alavelave mata’utia, ua talosagaina ai e nisi o Aunu’u le faigamalo a Amerika Samoa, i se auala e mafai ai ona maua se fesoasoani i tulaga o femalagaaiga. 

Na taua e se tasi o Tina matua mai Aunuu i le Samoa News e fa’apea, e le o se taimi muamua lenei ua tula’i mai ai ituaiga faalavelave nei i tagata o le motu, ae foliga mai lava o loo faataliga tutuli Ta’ita’i o le malo.

Sa ia taua e faapea, ua tatau ona fausia se uafu lelei i Auasi ma Aunuu, ma tuu i ai ma se va’a lelei e tautuaina tagata o le motu. Ae afai e le mafai ona faatino lea tulaga, e tatau la i le malo ona i ai se va’a Leoleo i luga o le uafu i Auasi mo le tautuaina o tagata Aunuu i soo se taimi e tula’i mai ai faalavelave faapenei.

O le tausaga e 2013 e pei ona taua e tagata Aunuu na tula’i mai ai fo’i le isi faalavelave matautia faapea, ina ua goto se va’a alia ma maliu ai se tagata o le nu’u. E i ai isi faalavelave na tutupu i nai tausaga e le i mamao atu ina ua goto se va’a, peita’i e leai se isi na ma’imau ai sona soifua.

Ia faamaise le Agaga Paia o le Atua i aiga o nai Tama matutua ua ma’imau o laua soifua ona o lenei fa’alavelave.