Tala I Vaifanua

187 AU FA’AU’U AOGA MAUALUGA SAMOANA HIGH 2020

O le sauniga fa’apitoa e talia ai e le fanau latou Fa’ailoga fa’apitoa ma Tipiloma o le fanau fa’aiuaso mai le a’oga maualuga a Samoana i le aso Gafua na talia ai lava na’o le fanau a’oga e ulufale i le latou faleta’alo mo lea fa’amoemoe.

O matua uma ma aiga sa latou fa’atalitalia le fa’aulaga o latou fanau i fafo mai o le faleta’alo, i le ala ua mae’a fausia e le a’oga e fa’amalu ai le fanau i le lotoa fa’apea ma nofoaga paolo mai le lai autafa o le faleta’alo ma le Faletupe o Amerika Samoa (TBAS).

O se tausaga muamua fo’i lenei ua ese ai lea ituaiga o sauniga mo le fanau a’oga, ma sa fa’atumulia atoa le latou faleta’alo i lea to’atele o le fanau a’oga aua ua fa’avalavala o latou nofoaga e usita’ia ai le fa’asa o lo’o fa’amamaluina nei ona o le Coronavirus.

Na muamua lava le tula’i fa’aaloalo mo le molitai maio fu’a a le Malo tele ma le tatou Malo fa’ateritori o Amerika Samoa i ona tulaga ona amatalia loa lea o le fa’amoemoe o le fanau fa’au’u. E to’alua sui o lea vasega fa’ai’uaso o lo ua misia o la’ua nofoa i lenei fa’au’uga, Peter Ah Ching ma Anthony Leota, o lo’o i fafo i la’ua mo togafitiga i o la’ua manu’aga, ma ua le auai ai i la’ua i lenei sauniga o le latou tufatufaga o fa’ailoga ma tusi pasi.

Ina ua mae’a le latou tatalo na fa’atulaga i le polokalama fa’asolo ona tuuina loa lea o le avanoa i le fa’asologa o le fanau e taua’aoina latou tusi pasi ma fa’ailoga. I le fa’asologa lea, sa matua tapu’ea uma lava ata o le fanau a’oga e fa’aaoga ai latou tapenaga sa fa’atutu mo lea fa’amoemoe.

Ua iloga i lenei tausaga ua suia le faiga e fa’atautaia ai fa’au’uga o le fanau, ae ua tula’i mai le vaega o fa’amaumauga a A’oga ta’itasi ina ia fa’amaumau o latou ata i o latou toe taimi i Laumua sa a’oa’oina ai i latou i a’oa’oga maualuluga. I lea sauniga mamalu atoa sa usuina pesega matagofie uma e le vasega fa’aiuaso.

AMATA ONA AUMAIA TAGATA AMERIKA SAMOA MAI SAMOA

O le taeao nei, Iuni 17 e o’o atu ia Iuni 19, ua fa’atulaga e le malo e amata ona  toe fa’afo’i mai o tatou tagata nuu o lo’o taofia I Samoa ona o le fa’asa o le fa’ama’i o le coronavirus, lea sa taofia ai malaga a va’alele talu mai le masina o Mati. 

O le vaega o tatou tagata o lo’o taofia i Samoa e aofia ai i latou sa feagai ma togafitiga i Niu Sila. 

Ua fa’atulaga e le Matagaluega o le Soifua Maloloina o i latou uma e to’ai taunuu mai o le a faia latou suega o le coronavirus, aua e le o mafai ona faia tui i Samoa aua e le o lava latou tui i le taimi nei. Ua fa’atulaga fo’i ina ia fa’anofova’ava’aia i latou i nofoaga ua mae’a fa’atulaga mo lea fa’amoemoe.

Ua fa’atulaga fo’i e 14 aso o le a nofo va’ava’aia ai i latou uma nei mai Samoa. Ua leai fo’i se tasi o le a nofo va’ava’aia i o latou aiga, o le nofo va’ava’aia fa’atasi uma i latou i nofoaga fa’apitoa ua mae’a tapena.

O le fale a le DYWA i Pago Pago o le nofoaga muamua lea e taofia va’avaai ai i latou e taunu’u mai. O le faletalimalo o le Sadies by the Sea le isi nofoaga fa’atulaga. 

I le fonotaga ale Komiti Fa’afoe o le coronavirus i le aso Sa na te’a nei, 14 Iuni, 2020, na fa’ailoa ai e Motusa Tuileama Nua le fuafuaga e aumaia tagata Amerika Samoa o lo’o taofia i Samoa, ma ua fa’atulaga, i ona vaega e tolu e mae’a mai ai le 206 o tagata e tatau lava ona o mai.

O le vaega muamua lea ua fa’atulaga mo Iuni 17 e oo ia Iuni 19, o le vaega lua mo Iuni 23 e oo ia Iuni 26. O Iuni 29 ua fa’atulaga e amata ai le vaega tolu. 

Ua fa’atulaga e le DOH le fa’asalalauga fa’alaua’itele e fa’alauiloa atu ai le tamau e ao ina nonofo va’ava’aia uma pasese o le a la’u mai i Samoa, e le mafai fo’i ona fa’afeiloa’ia i latou e o latou aiga iinei, ae o le a o sa’o lava i nofoaga ua fa’atulaga mo i latou e nofo va’ava’ia ai.

TOE TAGA’I ALAMANUIA TAU TOTOGI O AUFAIGALUEGA AAFIA COVID-19

Ua faailoa e Aumua Amata le tatou Faipule i le Konekeresi, ua ia fa’atonuina lana aufaigaluega i le Laumua ina ia toe taga’i totoa ane i le aiaiga o agava’a e mafai ai ona maua e nisi o tagata faigaluega na a’afia galuega ma itula faigaluega i le taimi ua amatalia ai le fa’asa lenei mo le Coronavirus.

Ua mafua lea toe ta i tua o le galuega a le aufaigaluega a le tamaita’i  Faipule i le Konekeresi, ona o le to’atele ua a’afia a latou avanoa faigaluega ma ua te’ena mai i latou i lea fesoasoani, ua latou gasolo atu i le Ofisa fa’alotoifale o le tamaita’i Faipule, ina ia fesoasoani ane i le fa’aletonu o lo’o ua alia’i nei i o latou a’afiaga, ua le aofia ai i latou ona o tulaga tau aiaiga o pepa faigaluega i Amerika Samoa.

I lalo o tulafono fetarale mo lea polokalama ua na o Sitiseni Amerika, Nasionale Amerika, ma tagata nofomau i Amerika e agava’a. 

Ua fa’ailoa mai fo’i e le tatou Faipule i le Konekeresi, “Ua toe galulue nei lana aufaigaluega i DC i se suiga i le aiaiga lea ina ia mafai ona agava’a ituaiga tagatanuu ua talia e Amerika Samoa e falgaluega i pisinisi tumaoti i totonu o lona malo, aua o lo’o matua agava’a uma lava tagatanuu o teritori o le CNMI ma FSM i lenei penefiti.”

Fa’ailoa e Makerita Enesi o le matagaluega o Tagata Faigaluega a le malo, lea o lo’o fa’amaopoopoina le lisi o tagata faigaluega a le malo ma i latou o a’afia galuega mai le Malo ma pisinisi tumaoti i le tatou atunuu, “Ua malamalama lelei lava le latou aufaigaluega o lo’o ua galulue mai nofoaga o fa’amauina ai talosaga mo nei alamanuia, i aiaiga ua talafeagai ma i latou e maua lenei alamanuia. E te’ena lava e i latou talosaga e fa’aulu mai ae le agava’a ona o ituaiga pepa fa’amaonia o umia e faigaluega ai le tatou teritori. O lo’o fa’aauau lava ona latou talanoaina agava’a nei e talia ma i latou e le talia talosaga i nei alamanuia.”

“E mafai i nisi nofoaga ona talia talosaga uma ua fa’aulu mai, ae mautinoa ua fa’ailoa atu ia i latou, ua le mafai ona taliaina uma talosaga ua fa’aulu mai, ona o aiaiga tau pepa fa’amaonia o mafai ai ona e faigaluega ma nofo fa’aletulafono i Amerika Samoa.”

O nisi sa te’ena mai a latou talosaga e fa’atumu ma fa’aulu i le vaega o le aufaigaluega na fa’atulaga i le Faleta’alo o Tafuna High, ua latou fa’ailoa mai, “Ina ua te’ena i matou e fa’atumu talosaga mo lenei alamanuia i le nofoaga i Tafuna na matou toe saili mai se avanoa i Utulei ma ua talia lelei lava e fa’atumu matou pepa, ae se’i saili mulimuli pe mafai ona talia ituaiga ID lea e matou te faigaluega ai mo nei penefiti.”

Faailoa e Aumua, “O lo’o fa’aauauapea ona matou feutaga’i ma le Ofisa Autu i Uosigitone e tusa o agava’a e taulia i Amerika Samoa mo nei penefiti, ina ia taulia ai o tatou tagata o fa’ataga ona nonofo ma galulue i pisinisi tumaoti i Amerika Samoa fa’apea fo’i ma galuega fa’akonekarate a le Malo o Amerika Samoa, lea e matua to’atele lava i ai i latou o a’afia galuega i lenei fa’asa o lenei fa’ama’i pipisi.”