Tala I Vaifanua

PEPA TALOSAGA MO SUI TAUVA PALOTA 2020 MAUA IA IUNI 15

Ua fa’ailoa e le Ofisa o Palota e fa’apea o le aso 15 o Iuni e amata ai ona maua i lea ofisa o le malo, pepa talosaga mo i latou e fa’amoemoe e avea ma sui tauva mo le palotaga ia Novema 2020. 

O le palotaga mo lenei tausaga tofi o le kovana/lutena kovana, faipule i le Konekeresi ma sui o le Maota o Sui o le Fono Faitulafono. 

Pepa talosaga mo sui tauva e aofia ai: 

• Pepa Fa’ailo o Sui Tauva e tatau ona fa’atumu mai.

• Pepa Taulima a sui taitasi ua finagalo e tauva.

• Lisi o tagata ua finagalo e sapaia sui ta’itasi i tofiga ua lisia i luga.

• Pepa e ao ina fa’atumu mai ai le aotelega o tupe fa’aalu ma ala na maua mai ai mo lau kemupeni.

 Setema 1, 2020 e fa’agata ai ona talia talosaga mo sui tauva. 

Ua fa’amanatu mai foi ua tatalaina avanoa e mafai ai ona faia palota a i latou ua manatu e faia a’o le’i tu’ua le atunuu, ma o i latou e agava’a mo le palotaga, o i latou na soifua a’e o Nesionale o Amerika ma Sitiseni o Amerika. E fa’amuta le faiga o palota ae le’i malaga ese mai le atunuu ia Oketopa 19, 2020.

O nisi o i latou nei ua aofia ai le fanau a’oga o le a a’e i a’oga i fafo, fanau militeri o le a tuuva’a ese atu mai le atunuu, ae maise fo’i o tagata faigaluega a le Malo ua malaga atu i fafo ma ele mafai ona toe taliu mai ae ua mae’a le aso o le Palotaga ia Novema, fa’apea fo’i ma tagata faigaluga a le Malo tele.

Ua tatau fo’i ona mae’a lesitalaina oe le tama fanau a Tutuila ma Manu’a ma i latou o sitiseni o le Malo tele.

Ua fa’ailoa mai, ua na’o sui lava o lo’o faigaluega i so’o se lala o le Vaega Au ua mafai ona lesitala mai i latou mai fafo e la i feso’ota’iga ma le fa’aaogaina o Uepesite a le Ofisa o Palotaga a Amerika Samoa.

Ina ia talosagaina sou avanoa e faia ai lau palota e tu’ua ai le atunuu, e mafai ona fa’aulu mai talosaga i le Uepesite a le Ofisa o Palotaga www.aselectionoffice.gov ma agai atu ai e kiliki i le pepa fa’atumu mo le “absentee ballot.”

Ua una’ia malosi mai e lea Ofisa le mamalu o le atunuu e agava’a e palota ina ia oo ane e saunia o latou pepa palota i le latou Ofisa autu i Tafuna, “Fa’aaoga lau aia tatau e te filifilia ai le sui o e finagalo ai e tau’avea lou atunuu ma lou afioaga i le isi 4 tausaga o lumana’i.

Pe afai e te oo ane mo lea fa’amoemoe e tatau lava ona e umia au pepa nei:

• Pepa Aso Fanau poo le Tusi Folau

• Social Security Card

• Government ID

TO’E FA’AFOI MAI TAGATA AMERIKA SAMOA I SAMOA

O le saunoaga a Kovana Lolo Moliga ua fa’ailoa ai e 300 tagata o Amerika Samoa o lo’o ua le mafai ona fo’i mai i aiga mai Samoa, ma ua fia iloa fo’i e ia poo ai i latou nei.

Ua taumafai foi ma kamupani va’alele e toe siaki a latou fa’amaumauga ma pepa na fa’atumu e nei sui uma ua fa’ailoa mai, pe moni ole toatele moni lea o fia toe fo’i mai i le atunuu, o loo i ai pea i Samoa i le taimi nei.

Peitai o le saunoaga a le Fa’atonu o le Soifua maloloina o Amerika Samoa, Motusa Tuileama Nua, sa ia fa’ailoa ai i le fonotaga a le Komiti fa’afoe ma le Kovana Sili, sa ia ta’ua ai faitauga e na’o le 120 i latou o iai i Samoa, e fia toe fo’i mai.

O lenei aotelega o tagata o lo’o i Samoa o loo aofia ai ma nisi e faipisinisi, i latou ua nonofo mau i Amerika Samoa nei ae sa asiasi i aiga i Samoa, Niu Sila ma Ausetalia e oo foi i le Malo o Fiti, e aofia ai foi ma i latou sa malaga e sailia togafitiga i Niu Sila ua toe taliu mai ma ua taofia ai nei i Samoa ona o le fa’asa.

O le isi vaega o lenei lava to’atele, o i latou ua mae’a umia pepa fa’amaonia o le faigaluega ma nonofo i Amerika Samoa fa’aletulafono, ma ua mafai ona malaga atu ma toe fo’i mai, peita’i ua maua tonu fo’i i latou o malaga atu i Samoa i le fa’asa lenei mo le Covid-19.

O lo’o galulue le ofisa o le Immigration a Amerika Samoa ma le Ofisa o le Loia Sili e fa’amautu le lisi o i latou toe fa’afoi mai Samoa.