Tala I Vaifanua

Pago Pago, AMERIKA SAMOA - 

AVE I AUMAGA FA’AMALOSIA LE FA’ASA O LE COVID -19

I le fonotaga a le Komiti fa’afoe o le Coronavirus i le aso Sa ua te’a, na saunoa ai Kovana Lolo Matalasi Moliga e fa’amauina ai nisi mea o le a fa’amalosia mo le aga’i i luma o galuega a le malo i le tulaga o le COVID-19.

Saunoa le kovana, o fa’aiuga o le vaiaso ua fa’atagaina ai le fesoasoani mai a le US Army Reserve ina ia latou sailia le vasega o pasese e ulufale mai i le atunuu, pe a to’ai taunuu mai ni vaalele ma latou pasese.

E ese mai fo’i i lea, ua tuuina atu i ai le faiva i tua i Afio’aga ta’itasi o le atunuu, ina ia latou fa’amalosia tulafono uma o le fa’asa i o latou afioaga. O afio’aga pito i tetele ma toatele fo’i i latou o alaalata’i ai e aofia ai, Pago Pago, Nuuuli, Leone ma Faleniu & Mesepa lea ua fa’ailoa mai ua mae’a fa’ailoa atu lea faiva i latou Pulenuu ma Leoleo o afio’aga.

O le amataga aloia o lea fa’amoemoe mo aumaga, ua fa’asalafa lea mo le aso 15 Iuni, 2020.

Saunoa le kovana, “Ua tatau ona tuu atu le faiva lea i aumaga i afioaga ta’itasi, nai lo le tau o atu i tua o Leoleo a le Malo, ma ua fa’atulaga tulafono sili ona tatau ona fa’amamaluina, o le aiaiga tau sauniga lotu e faia i o latou malumalu, fa’atasi ai ma le taimi e tapunia ai uma pisinisi e pei ona suia nei i ai i le ta o le 9:00 i le po.

Ua toe tuu atu foi i aumaga, “O le leoleoina lea o latou afio’aga, ma mataituina lava le tulaga o fuala’au fa’asaina ma vaila’au oona, mai le oo atu i tupulaga ma aiga i totonu o latou nuu.”

“Ua matauina ua amata ona oo le tinoitupe na toina mai mo tagata faigaluega e le Malo tele, le siaki stimulus i lima o i latou e le’i manatu e tatau ona oo i ai. I latou nei e fa’atauina atu vaila’au o’ona ma fuala’au fa’asaina i le atunuu,” o se vaega lea o le saunoaga a Lolo. 

Ua fa’ailoa atu fo’i e le Kovana i le Ofisa o Criminal Justice ina ia latou saili ni auaia e mafai ai ona fa’atupe le fa’atauina o toniga mo le vasega o Aumaga i nuu, ina ia faataunuu ai ma le mamalu o latou faiva.

FAIMEAALOFA LE FA’ATONU SPORTS COMPLEX I LE HOPE HOUSE. 

O le fa’atonu o Ta’aloga ma Sports Complex, Toleafoa Henry Tavake ua fa’ailoa mai ua ia foa’ia atu se Pusa Aisa tele fou o le ituaiga GE 63Inch ina ia fa’aaogaina e le Hope House i Fatuoaiga.

O lenei fulisa ua fa’ailoa mai e le pulega o le Hope House o se fesoasoani aoga tele mo i latou aua ua fai lava si tele o foa’i mo le nofoaga o fa’amoemoega, ae ua le lava pusa aisa e teuina i ai oloa siiatoa ua taua’aoina.

O foa’i ua fa’ailoa mai ua taua’aoina atu lea e le tele o pisinisi ma fa’alapotopotoga eseese i totonu o le atunuu. Na taua’aoina atu lenei foa’i aoga e Toleafoa i le aso Lulu o le vaiaso ua tuana’i.

Ua fa’ailoa mai foi le agaga fa’afetai tele o le Pulega ma le Aufaigaluega a le Hope House ona o le agaga foa’i o lenei tama iloga o le atunuu.

“Ua matua talia ma le fa’afetai lenei foa’i, ae maise lava i le taimi nei, aua ua tele mea ua foa’i mai e pisinisi ma fa’alapotopotoga, ae ua leai se isi fulisa e mafai ona fa’aputu i ai. Ua fetaui lava la le aumaia o le fulisa fou lea, ae ua fa’atumu loa i mea ‘ai fulisa sii atoatoa ua taulimaina,” o se tala lea a le tamaitai pule Cassandra Mageo.