41 Toa o Samoa - Tautua galulue fa'atasi i Fort Lee US Army

Ua iloga mai le tala tusia i le Nusipepa o Galuega fa’atino a le US Army i Fort Lee, le aoga tele o le to’atele o sui mai se teritori poo le setete e ulufale fa’atasi i le USArmy ma latou fa’asolo atu ai e toe galulue fa’atasi mai se nofoaga ua tofia i ai, e aoga mo le fa’amalosi’au o le tasi i le tasi i taimi uma.

Ua vaaia lea tulaga i alo e to’a 41 ua galulue tautua mai Fort Lee, aua ua va’aia ai le fa’amalosi o le tasi i le tasi, ma o se auuso lava i latou uma, e leai fo’i se tasi e foliga fa’anoanoa, ae galulue fiafia, ma latou fa’atasitasi e fealofani fo’i i latou.

I le tala tusia ma lomia i le aso 11 Me, 2020 ua molimauina ai uiga lelei nei o fanau a Samoa i totonu o Fort Lee, ma ua malosi fo’i a latou galuega tima’i i nisi fitafita ina ia fa’afaigofie le to’esea mai i aiga ae tautua ai i le militeri i nei vaitau o le pipisi solo o le Coronavirus i le lalolagi.

Ua fesiigia nisi o Toa Samoa i le tulaga va’aia pea e i latou o le fa’atasitasi o fitafita Samoa ma latou pepese ma faia tatalo, ae sa fa’ailoa mai e Army Specialist Joseph Tauiliili, “O lea mea lea e sili ai ona fa’amalosi’au ia i matou i taimi uma. Ua matou iloa ua mae’a aoao ai i matou e matou matua, ma o le sootaga fo’i lea o i matou ma latou i le taimi nei, tatalo i le Atua e fa’amalosi mai i taimi uma. E lagona ai e i matou le mafanafana o matou aiga, ma e pele ia i matou, o lo’o tapua’ia o matou faiva.”

“Na matou o mai uma lava mai Amerika Samoa, ma ua mamao i matou mai o matou aiga, o e pele lava ia i matou, ae o le fa’atasia o i matou uma i lenei nofoaga o le Militeri ma ua matou galulue fa’atasi, o le isi lea fa’amalosi’au ia i matou uma lava, e i ai nisi e matua tutusa lelei o matou loto, matou aga, ae maise o le matou fa’amuamua, le Atua ma o matou aiga.”

Ua i ai foi se tasi o lo’o aiga lelei lava le to’afa o i latou, e o mai uma lava i latou mai le afio’aga o Poloa i Amerika Samoa. O alo o le auaiga o Tuiolemotu lea ua i ai le ali’i o Pvt Siiva Tuiolemotu, o ia lea ua i ai i le Whiskey Company, 244th Quartermaster Battalion.

“Ua matou manana’o ia fa’atasitasi i matou i le a’oa’oga o nei tomai fa’apitoa fa’afitafita a le US Army, e mafai ona fa’amalosi atu le tasi i le isi fa’ato’a ulufale mai. O le ala fo’i lea i le matou aganuu, e fa’alogo lava mulimai ia muamai. O le ala e tautua ai i matou i o matou aiga i aso uma o le fa’alogo o le la’ititi i le matua. Poo le a la le fitaituga i le aoaoga o feagai ai, ae ua iloa lelei e le laititi, sa ui mai ai le matua, e ao fo’i ona ia gafatia i lona malosi ma le atamai, ona fai.”

O se tala a le ali’i PFC Vasait Saua sa ia fa’ailoa mai, o lana lea mau ua mafua ai ona soloa’i fo’i e avea ma fitafita o le vaega au, ina ia fa’aauau se laina na tosia mai e ona tua’a. Ua fa’apea fo’i ona fa’ailoa mai e Pvt Talalelei Ames, lea ua ia ta’ua, “O ou matua uma sa tautua i le vaega au, ua masani ai i le va’aia o i la’ua o sauni, ma toe taliu mai i le aiga ua mae’a tiute, ou te fiafia lava e folo atu ai fo’i i lena olaga, e latalata atili ai le matou mafutaga.”

Ua matauina e le ali’i Sgt Major Michael Lambert le uiga lea i le fanau a Samoa o loo ia va’avaaia i lana ta’ita’iga o le Quartermaster School, “E matua iloga le fa’amalosi o le isi i le tasi ae maise i taimi e koleni fa’atasi ai, e va’aia le fusifusi o i latou ma opogi mai o latou uso ma tuafafine, e talie fa’atasi ma fa’atalanoa fiafia i taimi e mafuta ai, ae uma loa se taumafaiga o mai fa’atasi ma usu le latou pese ua fa’ailoa mai o le pese fa’afetai i le Atua ua i’u se taumafaiga ua papasi uma i latou.”

“E tasi le mea ua ou mautinoa, pe eseese fa’aiu ma o latou igoa ma nuu o mai ai i Samoa, ae o le Aiga Fa’atasi i latou uma,” o se tala lea a Lambert.

“O le taimi e sili ona faigata, o le taimi e fa’amavae ai ma se tasi o le a alu ese mai le fa’apotopotoga lea o le au uso, e matua va’aia le fetagisi, ma e fa’amavae ma loimata i latou, e foliga mai o le a le toe feiloa’i. E lagona uma e i matou le agaga fa’anoanoa i so’o se taimi fa’apea, aua ua iloga, le misia o le a alu ese.”

“O le a ou le popole tele la aua ua leva ona aoao mai le fanau i lo latou va fa’aletagata ma le isi uso. O fanau sa a’oa’i ma fautua i ai matua i le mea lava e tasi, ma afai foi ou te tu’ua lenei mafutaga, e mautinoa lava o le a i ai foi isi uso ma tuafafine Samoa o le a mafuta atu i ai i le isi nofoaga o le tautua ai,” o se tala mulimuli lea a Tuiolemotu.