Toatolu na taofia e Leoleo i le soli o le poloaiga o le COVID-19

E to’atolu na taofia e Leoleo i le Toese i Tafuna i le faaiuga o le vaiaso na te’a nei, ona o tu’uaiga i lo latou le usitaia lea o poloaiga sa tuuina mai e le Kovana mo le puipuiga o le atunu’u mai le fa’ama’i o le COVID-19.

O i latou e to’atolu na taofia e aofia ai se ali’i Faipisinisi mai Faleniu e suafa ia Christian Lozano, ma ni ali’i se to’alua na pu’e faapagota mai i le nofosaga o lo o faia ai le malae volipolo i Iliili, faafesaga’i ma le nofoaga o lo o i ai le Aoga a le Lupelele Elementary School, le susuga ia Sola Malae ma Jasibel Sofeni.

O le aso Toonai na te’a nei na taofia uma ai i latou i le Toese, ma latou tutula’i ai i luma o le Fa’amasinoga Faaitumalo i le taeao o le aso Gafua na te’a nei mo le latou ulua’i iloiloga.

O lo o molia uma i latou nei e to’atolu i le solitulafono o le “Le usita’i lea i le poloaiga faalaua’itele mo le puipuiga o le gasegase o le COVID-19, o le vaega A lea o solitulafono mama, lea e mafai ona fa’asala ai se tasi i le Toese mo le umi e le silia i le tasi le tausaga, pe faasala i le salatupe e le silia i le $1,000, pe faasala fo’i i faasalaga uma ia e 2.

Na taua e le malo i le latou ulua’i folasaga e faapea, o le poloaiga faalaua’itele a le afioga i le ali’i Kovana, o lo o manino mai lea i lalo o le Ulutala 13.0323 o le Tulafono Toe Teuteu a Amerika Samoa, lea na tuuina mai ma aloaia i le masina o Mati o le tausaga nei.

O le mae’a ai o le ulua’i iloiloga mo i latou nei e to’atolu, na tatala ai loa i tua e faatali ai le isi aso lea ua fa’atulaga ai le isi iloiloga, i lalo o tuutuuga e ao ona latou usita’i i ai. O ni isi o ia tuutuuga e aofia ai le tatau lea ona tausisi i soo se poloaiga faalaua’itele ua mae’a ona tuuina mai e le Kovana, e le tatau ona latou toe solia se tulafono a le malo, a ia avea i latou ma tagatanu’u e tausisi i tulafono uma.

O le masina fou lea ua fa’atulaga e faia ai le isi iloiloga o lenei mataupu.

TAGI FAASAGA IA LOZANO

E pei ona taua e le malo i le latou tagi faasaga ia Lozano e fa’apea, o le afiafi o le aso Toona’i na te’a nei, aso 9 o Me i le itula e 7:40, na faafesoota’i ai e se tagata le Ofisa o Leoleo i Tafuna ma logo i ai le Fale Oti Ulu i Faleniu o lo o fa’aaua pea ona tatala ae ua te’a le itula e 6:00 o lo o faatulaga mai e le Poloaiga Faalaua’itele e tatau ona tapuni ai.

E to’atele Leoleo na tali atu i le valaau ma maua ai le avanoa e feiloa’i ai ma le tagata na vili atu e faailoa i le mataupu.

O le mae’a ai o se talanoaga puupuu a Leoleo ma le molimau, na aga’i atu ai loa Leoleo ma tu’itu’i le faitoto’a o le Fale Oti Ulu, peita’i, na fiu e tu’itu’i ae leai ma se isi na ia tatalaina mai le faitoto’a. Na vaaia e Leoleo se ie lanu uliuli o lo o pupuni mai ai totonu o faamalama o le Fale Oti Ulu ae o loo ola le moli.

Sa fa’aauau pea ona tu’itu’i e Leoleo le faitoto’a ma faailoa atu i ai latou. E le i umi ae vaaia loa le tatala mai o le faitoto’a ma ulufafo mai se ali’i ma aga’i mai i Leoleo. O le ali’i na ulufafo mai, o ia lea e ana le Fale Oti Ulu. Pe tusa ma le to’a 6 Tina sa vaaia i totonu o le Fale Oti Ulu, o lo o faasolo i latou i le laina mo le teuteuina faamatagofie o latou ao mo le Aso o Tina o lo o sosoo ai.

Na fesili Leoleo i le pule o le Fale Oti Ulu, susuga Lozano i le mafua’aga ua fa’aauau ai ona tatala lana pisinisi ae ua tuana’i le taimi faatulafonoina. Na tali le ua molia, sa ia taumafia lava e faanatinati le teuteuina o ao o Tina sa gasolo atu, peita’i ua tuai lana gaioi ae ua vave mai le taimi e tapuni ai pisinisi. Sa ia taua atili fo’i e fa’apea, sa ia taumafai lava e fai se mea sili mo nai Tina o loo totoe i totonu o lana Fale Oti Ulu, ona o le aso Sa e sosoo ai ua faapitoa mo Tina.

Na faatonu e Leoleo Tina sa i ai i totonu ina ia taape loa i o latou aiga. Na faailoa e Leoleo ia Luzano le tulafono atoa ai ma le poloaiga ua ia solia. Na faatoese Luzano i Leoleo e tusa ai o lana solitulafono, ma ia talosaga ai mo se isi avanoa mo ia. Sa ia ta’utino atili i Leoleo, e le toe tupu le faaletonu e pei ona tula’i mai, ae o le a ia taumafai e tapuni lana Fale Oti Ulu i le taimi ua faatulafono e le malo.

O le mae’a ai ona fesiligia e Leoleo o Luzano, na auina atu ai loa o ia i le Ofisa o Leoleo i Tafuna, ma momoli atu ai loa i le Toese i Tafuna e taofia ai, e faatali ai le taimi e tula’i ai i luma o le Fa’amasinoga.

Ao faagasolo pepa mo le taofia o Luzano, na taua e Leoleo le fa’aauau pea ona faatoese o ia i Leoleo ma talosaga i ai mo se isi avanoa mo ia. Sa ia taua lona alofa i Tina na aga’i atu mo le teuteuina o latou ao, aemaise ai fo’i, o le aso Sa o Tina o lenei tausaga, o le aso fanau fo’i lea mo si ona Tina.

Na taua e le malo i le latou tagi e fa’apea, e le o se taimi muamua lenei ua fautuaina ai e Leoleo le susuga a Luzano ma lana Fale Oti Ulu ina ia tapunia i le taimi ua faatulafonoina e le malo.

I le masina fo’i na te’a nei, na maua ai fo’i e Leoleo le Fale Oti Ulu a Luzano o lo o faaauau pea ona tatala ae ua te’a le itula e 8:00. Sa tuu i ai le avanoa ma fautuaina o ia ina ia usita’i i le tulafono.

TAGI FAASAGA IA MALAE MA SOFENI

O Malae ma Sofeni na pu’e faapagota mai e Leoleo i le malae volipolo lea e faafesaga’i ma le Aoga Tulaga Muamua a Lupelele, i lo la le usitaia o le poloaiga e faasa ai ni taaloga poo ni mafutaga e tumu tumu ai ni tagata.

Na taua e Leoleo e fa’apea, o le malae volipolo lenei i Iliili ua faatele ona latou aga’i atu i ai ma tutuli ese tupulaga talavou o lo o taaalo ma eva solo ai. I le aso Toona’i na te’a nei, a o tapena ai le atunuu mo le faamanatuina o le Aso Sa o Tina, na aga’i atu ai Leoleo ma maitauina se faapotopotoga toatele o tupulaga talavou i le malae volipolo, e le gata o loo faia ai taaloga ae o loo faia ai fo’i se BBQ ma se inugapia.

Na tau fai alu le tuli a tupulaga talavou sa i ai i le nofoaga ina ua latou vaaia le aga’i atu o ta’avale a Leoleo. O le to’atele na sosola i o latou aiga ae o isi na taufetuli aga’i i le isi itu o le auala ma faigata ai i Leoleo ona pu’e i latou.

O i latou e to’alua ua molia sa maua atu ai e Leoleo i le nofoaga lea ma pu’e faapagota mai ai loa i laua.

FAUTUAGA MO ISI PISINISI

E pei ona taua e le malo, e tele isi pisinisi ua mae’a ona fautuaina e Leoleo ina ia tausisi i le Tulafono. O le tele o nei pisinisi ua mae’a ona maua o lo o tatala pea a latou Faleoloa mai le taimi faatulafonoina. E le gata i pisinisi ae faapea fo’i i tagata taitoatasi e maua o lo o faia ni evaga pe fesavalia’i solo i luga o le alatele i le taimi ua tatau ai ona mafuta i o latou aiga.

Na taua e se Leoleo Sinia i le Samoa News e faapea, e ui ua mae’a ona tuuina atu le malosi i Leoleo e faamalosia ai le Poloaiga Faalaua’itele a le Kovana ma le malo, peita’i o loo fai lava le latou galuega i le ava fatafata, e ala i le fautuaina o pisinisi ma tagatanu’u ina ia usita’i i le tulafono, pe afai e maua i latou i le taimi muamua.

Ae afai e fautuaina pea ae le usita’i ma faalogo, ona faaaoga loa lea o le malosi o Leoleo i lalo o le Tulafono e fa’atino ai le galuega.