Faamalumalu le faasalaga a le Faamasinoga faasaga i se au uso

Pago Pago, AMERIKA SAMOA - E 5 tausaga lea ua faamalumalu ai e le Fa’amasinoga Maualuga le tuuina atu o sana faasalaga faasaga i le au uso e to’alua lea ua ta’usala i lo la le usitaia o tulafono tau Fualaau Faasaina, ina ua taofia e Leoleo se ta’avale na la malaga ai i le masina o Tesema 2019, ae maua ai vaega o le pauta faasaina ia te i laua.

O le au uso e to’alua, susuga Tulifau Iosefo, 24 tausaga le matua, ma lona uso matua ia Viane Tofamamao Ilimaleota, 32 tausaga le matua,  Na malaga asiasi mai i o la aiga i Amerika Samoa nei i le masina o Tesema ma le fa’amoemoe, a mae’a le faamanatuina o Aso Fiafia iinei, ona toe fo’i atu lea i Amerika i le nofoaga o loo aumau ai.

O le vaiaso na te’a nei na tutula’i ai le au uso lenei i luma o le afioga i le Faamasino Sili ia Michael Kruse mo le lauina o le la faasalaga. O le ali’i Loia Fautua lagolago ia Rob McNeill na tula’i mo i laua, ae o le tama’ita’i Loia Sili lagolago ia Laura Garvey na tula’i mo le malo.

Na ulua’i tu’uaia Tulifau ma Viane i le moliaga mamafa o le umia faasolitulafono o vaega o le pauta faasaina o le aisa, o se solitulafono e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e le silia i le $20,000.

Ae i lalo o se maliliega na sainia e le malo ma le au uso lenei, na malilie ai i laua e tali ioe i le solitulafono o le umia faasolitulafono o vaega o le pauta faasaina o le aisa, o le solitulafono mamafa e mafai ona faasala ai se tasi i le Toese e oo atui le 5 tausaga, pe faasala i le salatupe e mafai ona oo atu i le $5,000, pe faasala fo’i i faasalaga uma ia e lua.

I le tali ioe ai o Tulifau ma Viane, na la ta’utino ai e fa’apea, i se taimi o le aso 23 o Tesema 2019, na la umia faasolitulafono ai vaega o le pauta faasaina o le aisa.

Na ioe Tulifau e faapea, ina ua sailia e Leoleo lona tino i le aso e pei ona taua, na latou maua ai se paipa tioata o loo i ai vaega o le pauta faasaina o le aisa. Na tautino fo’i ia Viane e fa’apea, ina ua sailia e Leoleo lona tino i le aso e pei ona taua, na latou maua ni tama’i pepa iila se 2 o lo o i ai vaega o le pauta faasaina o le aisa.

O fualaau faasaina na maua i le au uso lenei, sa la tautino i le Faamasinoga Maualuga e fa’apea, o mea sa faamoemoe e fa’aaoga mo i laua lava.

Talu mai le aso na pu’e faapagota ai e Leoleo ia ia Tulifau ma Viane, na taofia ai pea i laua i le Toese i Tafuna e le i tatalaina i tua, ina ua le mafai ona la totogi le tupe e $5,000 a le tagata e to’atasi na faatulaga e tatala ai i laua i tua.

Ae ina ua mae’a ona talia e le Fa’amasinoga Maualuga le maliliega na sainia e i laua nei ma le malo i le masina o Mati 2020, na talosaga ai loa le Loia a Tulifau ma Viane i le Fa’amasinoga Maualgua, mo se poloaiga e tatala ai le au uso i tua e faatali ai le aso e lau ai le la faasalaga.

Na taua e McNeill i le Fa’amasinoga e faapea, o alii nei e to’alua, na malaga asiasi mai i o la aiga i le faaiuga o le tausaga na te’a nei, ma le faamoemoe e toe taliu atu i Kalefonia i le masina o Ianuari, peita’i, ua avea le faalavelave e pei ona molia ai i laua ua tuai ai ona toe fo’i atu i lo la aiga.

Na talia e le Fa’amasinoga Maualuga le talosaga a le itu tete’e, ma faia ai loa le poloaiga ina ia tatala Tulifau ma Viane i tua e aunoa ma se tupe la te totogiina, e faatali ai le aso e lau ai le la faasalaga i le vaiaso na te’a nei. Na fautuaina foi e le Faamasinoga Maualuga i laua nei, e le tatau ona la toe tagofia fualaau faasaina, e tatau fo’i ona faia ni suega i o la tino e faamaonia ai, la te le o toe tagofie fualaau fa’asaina.

Ina ua maua le avanoa o Tulifau ma Viane mai le Faamasinoga i le vaiaso na te’a nei, na la faatoese ai loa e tusa ai o le solitulafono sa laua faia, ma la talosagaina ai se avanoa e toe foi atu ai i Kalefonia i lo la aiga.

Na faafetaia e Tulifau le Faamasinoga e tusa ai o le taimi na taofia ai o ia i le Toese i Tafuna, lea ua mafai ai ona faapupula e le Atua lana vaai ma ia iloa ai le leaga o le solitulafono. Sa ia taua fo’i lona maua o se lesona taua mai le taimi na nofo ai i le Falepuipui,lea ua mafai ai ona ia faavasega le lelei ma le leaga.

Na ia faatoese i le Faamasinoga mo lana solitulafono, ma talosaga i ai mo se avanoa e toe fo’i atu ai i lona aiga. O le talosaga lava fo’i lea e tasi ma faaleo e lona uso matua ia Viane.

Na saunoa Viane e fa’apea, e ui e laititi se taimi na faaalu e nofo ai i le Toese, ae ua ia iloa ai le tele o mea aoga sa ia misia i lona olaga faapea ai lona aiga. E le gata ua ia misia le faamanatu faatasi o le Kerisimasi ma le Tausaga fou ma lona aiga, ae ua misia ai fo’i ma le faamanatuina o lona aso fanau, o le mafua’aga lea e tasi na ala ai ona la malaga mai i Amerika Samoa nei.

Na talosaga le la loia fautua ia McNeill mo se faasalaga mama e aunoa ma le toe tuuina atu o se isi taimi e faaopoopo e tuli e i laua nei i le Toese i Tafuna. Na faamatalaga e McNeill i le Fa’amasinoga Maualuga e fa’apea, o le filifilia sese na faia e Tulifua ma Viane, ua mafua ai ona tele aso ua taofia ai i laua i totonu o le teritori.

O le faanaunauga o le au alii lenei e pei ona taua e McNeill, o le toe fo’i atu lea e fa’aauau le olaga o lo o ola ai i Kalefonia, e le gata i galuega ae o aoaoga fo’i. O ni ali’i e lelei lo la a’oa’oina e pei ona taua e McNeill i le Fa’amasinoga.

Na lagolago e le loia a le malo le talosaga a le itu tete’e, ma ia finau ai ina ia faasala i laua ua molia i se faasalaga faanofovaavaaia, pe afai e finagalo i ai le Fa’amasinoga.

A o le i tuuina atu le faaiuga a le Fa’amasinoga, na fesili le Faamasino Sili ile au uso ina ia faamanino le mataupu e faatatau i le la toe fo’i atu i Kalefonia, pe manatu e nonofo mau i Amerika Samoa. Na tali le au uso, o laua e toe fo’i atu i Kalefonia.

Saunoa Kruse e fa’apea,e ui e i ai vaega o le Iunaite Setete e faataga ai ona fa’aaoga le mariuana mo togafitiga o nisi o tagata, peita’i e leai se vaega o le malo tele e fa’ataga ai le pauta o le aisa.

Ua manatu le Faamasinoga e faamalumalu le tuuina atu o sana faasalaga mo i laua ua nofosala i totonu o le 5 tausaga. O nisi o poloaiga ua tuuina atu mo Tulifau ma Viane e tatau ona usita’i i ai, e aofia ai le faasa lea ona la toe latalata i le nofoaga o le “Le Filifili”, poo isi fo’i nofoaga o loo feofeoa’i ma feiloa’i ai i latou o loo tagofia fualaau fa’asaina.

A o i ai i laua i Amerika Samoa e faatali ai le aso e toe malaga atu ai i Kalefonia pe a toe tatala femalagaaiga a va’alele, e tatau ona la asiasi i le Ofisa Nofovaavaaia i masina taitasi, e le tatau fo’i ona la toe tagofia le ‘ava malosi poo fualaau fa’asaina.  Na fautua malosi le Faamasinoga i le au uso lenei, afai la te le usitaia le poloaiga o le nofo mama mai fualaau faasaina poo le ‘ava malosi, e ono mafai ona faasala i laua e le Fa’amasinoga i se fasalaga faa falepuipui e sili atu ona umi nai lo le 90 aso.