Nofovaavaaia le ali’i na maua i ai fualaau fa’asaina o le aisa

E 5 tausaga lea ua nofovaavaaia ai le ali’i talavou lea na ta’usala i lona umia faasolitulafono o vaega o le pauta faasaina o le aisa, ina ua manatu le Fa’amasinoga Maualuga, e tu’u atu le avanoa i lea ali’i e saili sana galuega e totogi ai lana salatupe.

O le vaiaso na te’a nei na tula’i ai Ah Chong Lefatia i luma o le Fa’amasinoga Maualuga mo le tuuina atu o lana fa’asalaga. O le ali’i Loia Fautua lagolago ia Rob McNeill na tula’i mo Lefatia, ae o le tama’ita’i Loia Sili lagolago ia Laura Garvey na tula’i mo le itu a le malo.

Ina ua maua le avanoa a Lefatia mai le Fa’amasinoga Maualuga, sa ia fa’atoese ai loa e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i tua e fa’aaoga aso o lona olaga talavou e fai ai sona aoga i lona aiga aemaise ona matua ma nai ona tei.

Na taua e le ua molia e faapea, o masina e 8 ma le afa lea na taofia ai o ia i le Toese a o faatalitali ai se faaiuga o lana mataupu, ua ia aoaoina mai ai se lesona taua mo lona olaga ma ua ia iloa ai, e le o se mea lelei le nofosala i le Toetse.

Na talosaga McNeill i le Fa’amasinoga mo se faasalaga faanofovaavaaia mo Lefatia, ina ia mafai ai ona toe fo’i atu o ia i lona aiga ma fa’aaoga tatau aso o lona olaga. Na faailoa e McNeill i le Fa’amasinogae faapea, talu mai le taimi na pu’e faapagota ai e Leoleo le ua molia ma taofia i le Toese i Tafuna ona o tu’uaiga i lona umia faasolitulafono o fualaau faasaina, ua aoaoina e le ua molia se lesona taua i lona olaga, ma ua ia lagona fo’i lona salamo moni e tusa ai o lana solitulafono sa faia. O le ulua’i taimi fo’i lea ua ta’usala ai o ia i se solitulafono mamafa.

Na talosaga McNeill i le Faamasinoga ina ia talia le fautuaga a le Ofisa Nofovaavaaia ma faasala Lefatia i se faasalaga faanofovaavaaia. Na lagolago e le itu a le malo le talosaga a le itu tete’e ma ia finau ai i le Fa’amasinoga mo se fa’asalaga mama mo le ua molia.

I le mae’a ai ona iloilo e le Fa’amasinoga o faafinauga a Loia, o le ripoti a le Ofisa Faanofovaavaaia, atoa ai ma le faatoesega a le ua molia, na manatu ai loa le Fa’amasinoga e talia le fautua mo se faasalaga faanofovaavaaia.

Na vaavaai fo’i le Fa’amasinoga i le tele o vaega o le fualaau faasaina na maua e Leoleo i le tino o le ua molia i le taimi na pu’e faapagota ai o ia.

E 5 tausaga na manatu le Fa’amasinoga e faasala ai Lefatia, peita’i ua faamalumalu le tuliina e le ua molia o lea faasalaga e 5 tausaga, ae ua nofovaavaaia ai o ia mo le 5 tausaga i lalo o tuutuuga e ao ona ia usita’i i ai. O ni isi o ia tuutuuga e aofia ai lona tuliina o masina e 20 i le Toese i Tafuna.

Ua manatu le Fa’amasinoga e fa’aaoga le 8 ma le afa masina lea na tuli e le ua molia i le Toese i Tafuna a o faatalitali ai se faaiuga o lana mataupu, e fai ma ana faasalaga i lenei mataupu, o le umi o lo o totoe ai e 11 ma le afa masina o le a faamalumalu lona tuliina. Ae o le a tatala i tua Lefatia mo le 90 aso ina ia mafai ai ona saili sana galuega tumau e galue ma maua ai sona totogi e totogi ai lana salatupe e $2,000.

Afai ae mae’a le 90 aso ae le i maua lava se galuega tumau e galue ai Lefatia, ua poloaina o ia e le Fa’amasinoga ina ia toe ripoti sa’o loa i le Toese mo le tuli faamae’aina o le paleni o lo o totoe o lana faasalaga faa falepuipui e pei ona avea ma tuutuuga o lana nofovaavaaia.

Na faamanino e le afioga i le Fa’amasino Sili ia Michael Kruse ia Lefatia e fa’apea, o le tatala i tua e saili se galuega tumau e faigaluega ma maua ai le totogi, e le aofia ai le faataoga a lona aiga, ae manaomia le ituaiga galuega e totogi ma maua le siaki ina ia fesoasoani ai i le totogiina o lana salatupe.

O isi tuutuuga o le nofovaavaaia a Lefatia e aofia ai le faasa lea ona ia toe tagofia le ‘ava malosi poo fualaau fa’asaina, ae tatau ona tuuina atu lona tagata e faia i ai suega e se sui o le Ofisa Nofovaavaaia poo se Leoleo fo’i, ina ia mautinoa o lo o ia tausisia le tuutuuga o le faasa lea ona ia toe tagofia le ‘ava malosi poo fualaau fa’asaina.

Na toe faamamafa fo’i e le Fa’amasinoga ia Lefatia le tatau lea ona totogi faa mae’a lana salatupe ua tuuina atu e le Fa’amasinoga. O lona le totogiina o lana salatupe, e ono avea lea ma auala e atagia ai lona le usitaia o tuutuuga o lana nofovaavaaia.

Talu mai lava le taimi na pu’e faapagota ai e Leoleo ia Lefatia i le masina o Setema 2019, sa taofia pea o ia i le Toese ina ua le mafai ona ia totogi le tupe e $5,000 sa faatulaga e tatala ai o ia i tua.

Na ulua’i molia e le malo ia Lefatia i le moliaga mamafa o lona umia faasolitulafono lea o vaega o le pauta faasaina o le aisa, le solitulafono e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e le silia i le $20,000.

Ae i le maliliega aufaatasi na sainia e Lefatia ma le malo, lea fo’i na talia e le Fa’amasinoga Maualuga i le masina o Aperila na te’a nei, na malie ai le ua molia e tali ioe i le moliaga na toe teuteu e le malo, ina ia faailoa ai le solitulafono o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mo le umi e oo atu i le 5 tausaga, pe faasala foi i le salatupe e oo atu i le $5,000, pe faasala foi i faasalaga uma ia e lua.

I le tali ioe ai o Lefatia i le solitulafono e pei ona ta’usala ai o ia e le Fa’amasinoga, sa ia ta’utino ai e fa’apea, i se taimi o le masina o Aokuso o le tausaga na te’a nei, na ia umia faasolitulafono ai vaega o le pauta faasaina o le aisa ina ua sailia e Leoleo lona tino. O lana gaioiga sa faia i lea aso e pei ona ta’utino le ua molia, sa le tusa lea ma ala o le tulafono.

Na faamanino e Kruse ia Lefatia, o lana faasalaga lea ua tuuina atu e le Faamasinoga Maualuga, e tuli eseese ma soo se faasalaga sa tuuina atu e le Fa’amasinoga Faaitumalo ia te ia.

E 2 masina talu ona taofia Lefatia i le Toese, ae toe molia o ia i lona auai i se vaega o pagota na latou faaoolima i se isi ali’i pagota. Na molia Lefatia faatasi ma isi pagota e to’atolu i le faatupu vevesi i nofoaga faitele, e mafua mai i lo latou faaoolima lea i le alii pagota ia Thomas Siaumau.

O lea solitulafono na mulimuli ane ta’usala ai Lefatia e le Faamasinoga Faaitumalo, na nofovaavaaia ai loa o ia mo le 12 masina i lalo o tuutuuga e le tatau ona ia toe solia se isi tulafono a le malo, a ia avea o ia ma tagatanu’u e tausi ma le faamaoni i tulafono a le malo.