Tala I Vaifanua

FA’AAOGA TAIMI E FAIA AI GALUEGA LELEI & FA’AMATAGOFIE AI LOU SIOMAGA

Ua manaia fo’i le taumafaiga ua amata mai e le American Samoa Alliance Against Domestic and Sexual Violence, ina ia fa’aaoga tatau i ai le taimi lea ua fa’asa ai le tatou fa’apotopoto ma toe tulata le tasi i le isi i le atunuu.

“O lo ua fa’atulaga mai le polokalama lea e fa’aaoga ai le taimi aoga, toe ave’esea ai le popolevale ma le nofo le mautonu, ia fa’aaoga e fa’aalu le mafaufau ina ia taumafai e fa’ailoa mai ou lagona fiafia, pe fa’anoanoa, poo le a lava, ae tusia aga’i i ai sau ata.” O le taumafaiga lea ua faailoa mai e le sui o le Pua Tofaeono Art & Photography, le tamaita’i laa o Pua Tofaeono.

“I ituaiga omiga o lagona eseese fa’aletagata, e mafai ona fa’amatala auililia mai e sau ata tusia ma vali i lanu eseese. O ata ua tusia ma valia e i latou na fa’atinoa lea manulauti e fa’aalu ma fa’aaoga tatau i ai le taimi o malolo ai mai galuega, tau leai fo’i ni galuega fa’atino i ofisa, ua iloga mai ai, o loo tumau le fiafia i o latou loto.” O se tala lea a Pua i ulua’i fua o le taumafaiga ua va’aia nei.

O le vasega la lenei ua amata lava i le latou ofisa autu ma ma ua lu’ia ai fo’i i latou uma e fa’atino le fa’amoemoe, ma ua fa’atonutonu lava e Pua lea vasega se’ia oo ina mae’a ma fa’aalia a latou ulua’i galuega ua mae’a.

FA’AAUAU LE FA’ASA 30 ASO - 11 MEA E LE SUIA, AE I AI SUIGA LAITI:

Ia Me 01, 2020 ua toe sainia ai e Kovana Lolo Moliga le fa’amamaluina lona fa o le Fa’asa ona o le fa’ama’i pipisi, le coronavirus.

Mo le isi 30 aso o le a oo atu ai ia Iuni 01, 2020, ma o le a fa’amalosia pea tamau o le aiaiga fa’a-Code Blue i le atunuu, e pei ona fa’atulagaina mai le amataga, ae i ai nai suiga laiti, ae taua tele.

O le a tumau pea ona taofia a’oga a le fanau a’oga i a’oga mai vasega laiti lava se’ia pa’ia le Kolisi Tuufa’atasi, ma e aofia fa’atasi ai a’oga a le Malo ma a’oga tumaoti.

Ua taofia le faia o ni fa’atasiga tetele mo le mamalu lautele, ae ua talia na’o a’iga e mafai ona faia fa’atasiga ae le silia i le to’a 10 tagata e auai ma e tatau ona usita’ia le tulaga vava mamao i taimi uma.

Ua tumau fo’i le fa’asa ona toe tatala ni pisinisi pe a tuana’i le 6:00 i le afiafi ma ua faamamaluina fo’i le tatala i le 6:00 i le taeao, tapunia i le 6:00 i le afiafi, se’i vagana ai pisinisi poo fale’aiga e mafai ona oka ma ave’esea atu ‘aiga mo aiga, e faato’a tapunia lea i le 10:00 i le po. Peita’i o latou nofoaga  e mafai ona alaala ma tausasami i o latou fale’aiga e tapunia lava i le 6:00 i le afiafi.

Ua fa’apea fo’i ma ta’avale laiti la’upasese ma pasi, e tatala le fela’ua’iga o pasese mai le 6:00 i le taeao se’ia oo i le 6:00 i le afiafi ae na’o pasi la’u pasese a le Kamupani I’a e togipau e mafai ona fa’agatua i lea aiaiga.

Ua taofia foi ma pasese uma e femalaga’i i le va o Honolulu ma Pago Pago e ala i le Hawaiian Air peita’i, ua fa’atulaga le malaga Me 31, 2020 ina ia tatala mo femalaga’iga.

Ua taofia fo’i faigamalaga a le Samoa Airways i le va o Samoa na lua, se’ia i ai se isi suiga e toe fa’ailoa atu, e afua lava lea i se a’afiaga o se tasi o malo i le fa’ama’i pipisi.

Ua tapunia pea lotu ma fonotaga o soo se ituaiga ma ua fa’amalosia pea i le mamalu lasilasi o ekalesia ina ia fa’aauau ona faia e pei ona i ai nei, sauniga fai i totonu o aiga, lea ua matauina ua oo atu lava le lauga o le Upu i lotoifale o aiga ona o so’otaga tau initeneti e pei ona maua i nei vaitau.

O se suiga fou ua i ai nei i le faasa, ua fa’ailoa manino mai ai, “O i latou uma e manatu e fa’ao’o mai tino maliu o latou pelega i le atunuu i lenei vaitau, ua taofia lea mai le fa’auia mai i le Cargo se’i vagana lava ua faamaonia ma fa’ataga mai e Kovana Lolo Moliga po’o le Komiti Fa’afoe o le Coronavirus.”

E tatau ona matua saili i le fa’atagaga lea a’o le’i fuafua le aiga e aumaia le latou maliu mai fafo, aua a le usita’ia lea aiaiga o le fa’asa, e tauau e i ai le tagata faigaluega i lea Kamupani po’o oe fo’i le sui o talosaga le aumaia o tou pelega e moliga i le tulafono ona ua solituina le fa’asa.

Ua fa’ailoa manino foi i le aiaiga o le faasa, “Ona o le manatu ina ia saogalemu pea le tulaga o mea taumafa ia lava le sapalai i le atunuu, ma ia tumau pea ona fa’atautaia galuega a le Kamupani I’a ona ole to’atele o aiga e moomia le tamaoaiga tausi o lo’o sapaia ai, ae maise foi o le sapalai o le i’a mo lea fa’amoemoe e tasi, ua fa’ataga ai pea le ulufale mai o Va’a Oloa ma Va’a Fagota i le atunuu. Peita’i e ao ia i latou uma ona usita’ia aiaiga tau le ulufale mai ma suesueina a’ia’i latou va’a i tulaga uma o le nofo saogalemu o le atunuu mai le fa’ama’i Coronavirus.”

Ua tamau foi matagaluega uma o le malo ina ia fa’atautaia i le 20itula faigaluega ae totogia i le 40 itula faigaluega o tagata faigaluega uma.

O le siitia o tau o oloa ua matua fa’asaina lava i oloa fa’atau atu i le mamalu lautele. Afai e matauina se siitaga o tau oloa, e mafai ona lipotia mai.

Fa’ailoa mai fo’i a le ali’i Taitaifono o le Komiti fa’afoe o le Coronavirus, Iulogologo Pereira, “O le fa’aiuga a le Kovana ina ia faaauau lenei fa’asa, e le o faigofie lava. Peitai ona o le naunau ina ia puipuia le atunuu mai le tau togafitia mulimuli, ua sili lea nai lo isi mea uma lava.”

E le gata i lea, ua matauina i nisi o atunuu ua fa’amama le latou fa’asa, ua vave ona toe sasao ane ai le Coronavirus ma ua foliga mai ua fasi fa’alua na malo ona o le vave tatala o le fa’asa.

O le taimi ua toe atofaina nei mo le faasa lea, o le a lava ma totoe e tapena ai le faiga o tuiga fa’asolo e suesue ai poo maua tagata i le Coronavirus pe leai a le Matagaluega o le Soifua Maloloina. O se faiga e tatau lava ona faia ia mautinoa o lo’o tatou nonofo saogalemu uma lava. Peita’i o lea faiga atoa e ao ina lava ma totoe le sapalai o suega ua mae’a fa’amautu mai i potu suesue mo le sailiga o tagata uma ua iloga mai ai auga o le Cornavirus.

Ua mae’a fa’aulu atu lea fuafuaga mo le tuiga o le atunuu ia Robert Fenton o le FEMA ina ia latou pasia ma fesoasoani mai ai i le fa’alava o nei sapalai e moomia e fa’atautaia ai le tuiga o le atunuu.

O mea ua moomia o le sapalai o suega nei mo le Coronavirus ma le faamautu mai fo’i o ni fesoasoani tau tagata faigaluega agava’a mo le fesoasoani i le aufaigaluega ua i ai nei mo le fa’atautaiga o suega o le Coronavirus i Potu suesue o i ai nei a le falema’i tele i Faga’alu ma lea foi tautua i le Mataglauega o le Soifua Maloloina.

Ua fa’ailoa mai ua tapena mai le aufaigaluega agava’a a le Militeri mo lea fa’amoemoe aoga ua talosagaina, ma o le a galulue fa’atasi ma tatou aufaigaluega i potu suesue ua i ai nei a le atunuu.

O lenei 30 aso la ua toe fa’aopoopo nei, e ao ina mae’a ane ua lava ma totoe fa’amaumauga uma e mafai ona fa’atatau aga’i i ai fa’aiuga pe fa’aauau le fa’asa pe soloia pe a oo mai Iuni 01, 2020.