Tolopo fonotele EFKAS

I se fa’aalia fa’alauaitele a le Ekalesia fa’apotopotoga Kerisiano i Amerika Samoa, ua fa’ailoa ai i se iugafono a ta’itaifono ma le laulauafono, fa’atasi ai ma le Au Toeaiina o le Ekalesia, suiga ma mea sa fa’atulaga mo lenei tausaga ona o le Coronavirus.

Ua fa’aalia e fa’apea ua tolopo Fono Tele XXXIII se’i aulia Iulai 2021. Talu ai o loo malosi pea le pipisi o le coronavirus i le tele o atunuu o le lalolagi, ma, e le o mailoa se taimi e ono fo’ia ai. O le masina o Iulai o lenei tausaga sa fuafua ai le Fono Tele.

Ua fa’ailoa foi le faiga o taulaga mo lenei tausaga e fa’aoo i le Ofisa Tutotonu a o lei mae’a le masina o Me 2020. O nisi o mataupu:

• Ia fa’amaopoopo pea le “Matagaluega Nite” mo lenei tausaga: E ui na tolopo le Fono Tele, ae fautuaina Matagaluega ta’itasi ina ia fa’amaopoopo pea tulaga e pei ona masani ai le “Matagaluega Nite” mo lenei tausaga, ma ia faao’o mai i le Ofisa Tutotonu ae lei mae’a le Iulai 2020.

• Aloa’ia ma fa’ataunuu pea le Penisione a le ‘Aufaigaluega i lenei tausaga: Ua finagalo le Komiti a le ‘Au Toeaina ina ia aloa’ia pea ma fa’ataunuu pea le penisione i lenei tausaga, mo le ‘aufaigaluega galulue ua atoa le 70 tausaga o le soifua. E tusa ai ma i’ugafono tumau a le ‘Au Toeaina, e tatau ona o’o atu i le ulua’i Aso Sa o le masina o Setema, ua fa’amavae ma malolo le faigaluega penisione mai le ‘aulotu o loo galue ai.

• E fa’ataunuu pea le fonotaga a le Komiti a le ‘Au Toeaina ia Iulai 2020. Ae afai o i ai se isi Komiti poo se Mafutaga e finagalo e fono i lea lava masina, ia vave fa’ailoa mai i le Ofisa Tutotonu ina ia fa’alauiloa ma fa’asalalau.

• O Iuni 11, 2020, e fa’ataunuu ai le fa’auuga a le Aoga Maualuga i Kanana Fou. O le fa’atinoga o le fa’auuga, o le a taoto atu i le susuga i le Pule Aoga ma le ‘Aiga o Faiaoga, ina ia usita’ia tulafono mo le nofo puipuia mai le fa’ama’i o le coronavirus.

• Fa’ataunuu pea e fa’auuga a le Seminare Fa’afaifeau i Kanana Fou ia Iulai 11, 2020. O le fa’atinoga foi o le fa’auuga, o le a taoto atu i le susuga i le Peresitene ma le ‘Aiga o Faiaoga, ina ia usita’ia tulafono mo le nofo puipuia mai le fa’ama’i o le coronavirus e pei ona poloa’i e le faigamalo o Amerika Samoa.

• E fa’ataunuu pea le ta’utinoga a A’oa’o ulufale mo le Seminare i Kanana Fou, e fuafua mo Iulai 13, 2020.

• Ta’utinoga ma le Fa’auuga o le tofi Faifeau Samoa (FS): Mo e sa fuafua e fa’auuina le tofi Faifeau Samoa i lenei tausaga, ia fa’aoo mai a outou ta’utinoga tusitusia i le Ofisa Tutotonu ae lei mae’a le masina o Iuni 2020. O sui mai i Matagaluega i fafo e le saofia mai i le ta’utinoga, o le a taumafai le Ofisa Tutotonu e fa’atulaga ni fesootaiga fa’anei ona po, e fesootai mai ai i luga o le upega tafailagi.

• Fa’agafua pemeni FT03:29 mo le 3 masina: O le tapunia o malumalu tapua’i mo le puipuia o tagata lotu mai le fa’ama’i, ua faigata ai i ‘aulotu ona fa’amaopoopo le tamaoaiga sa masani ona fa’alagolago ai mo lona atina’e. Ona o lea, ua manatu le Laulauafono, o ‘aulotu uma o loo ‘auai i le porokalama fesoasoani a le Ekalesia, FT03:29, o le a fa’agafua a outou pemeni mo masina e 3, e amata i le masina o Me 2020.

O lona uiga, e tatau ona o’o atu i le masina o Aokuso 2020, ua toe fa’aauau a outou pemeni e pei ona masina ai.