Tala I Vaifanua

O FEA O I AI SIAKI STIMULUS? - TATALIA FEUTAGAIGA IA ME 7

O le fesili lea o lo’o tulituliaupu e le to’atele o tagata totogi lafoga poo fea ea ua oo i ai siaki Stimulus aua o lea ua leva ona maua siaki a isi tagata faigaluega sa faila i fafo a latou lafoga.

Fa’ailoa e le Teutupe a le malo, Ueligitone Tonumaipe’a, “Ua mae’a atofaina mai i le ASG le $32. 7miliona mo tagata e agava’a e ta’i $1,200 a le tagata ma le ta’i $500 a le tamaititi e to’atasi e agava’a e i lalo ane o le 17 tausaga, 2018 po’o le 2019.”

Ma ua tatalia nei le ioega mai a le IRS i le ala o lo ua faatulaga e tufatufaina atu ai siaki Stimulus, ona fa’ato’a fa’atino loa lea o le tufatufaga lea.

“O le taimi lava e pasia mai ai le tufatufaga lea e le IRS ona fa’amatuu mai loa lea o le 90% o le $32.7 miliona, e $29.4miliona i le Malo o Amerika Samoa ina ia totogia ai siaki nei i tagata faigaluega uma i le teritori.”

O le isi aso ua faatulaga e toe feutaga’i ai Tonumaipe’a ma le IRS o le aso 7 o Me, 2020. O lo ua fa’asolo atu foi ona fa’alauiloa e le aufaigaluega a le Ofisa o Tupe agava’a o i latou e maua nei siaki stimulus, ma o se mea ua fa’atulaga e ao ina faia muamua a’o le tufatufaina nei penefiti mai le Malo tele.

E i ai nisi o tagata faigaluega e le’i failaina mai a latou lafoga i lenei tausaga mo le tausaga 2019, o i latou na e fa’aaogaina le failaga o lau lafoga i le 2018 e maua atu ai au fa’amaumauga ma lafoina atu ai lau siaki stimulus.

“Pe afai e le’o faila maia lau lafoga, e le mafai e le siaki stimulus ona fa’aaoga e totogia ai au lafoga ua te’a o lo’o e nofo aitalafu ai i le Malo,” o se tala lea a Tomaipe’a i le fonotaga a Coronavirus Task Force i le aso Sa ua te’a.

MOOMIA NISI TAGATA FA’AFAIGALUEGA OFISA O LAFOGA

I le fonotaga a le Coronavirus Task Force i le aso Sa ua te’a sa fa’ailoa ai e le  Teutupe a le Malo, Ueligitone Tonumaipe’a, “Ua tatau ona toe fa’aopoopo nisi tagata faigaluega i le Ofisa o Lafoga. E le gata i lea, ae ua tatau fo’i ona fa’aopoopo atu ma nisi masini ma sapalai e fa’aaogaina ina ia agava’a lelei ai lea Ofisa mo le tufatufaina atu o Siaki Stimulus a i latou e agava’a ai.”

Ua ia fa’ailoa fo’i, “E tatau ona oo atu i le taimi ua tufatufaina atu ai siaki nei, ae ua matua mae’a fa’atulaga nei mea uma i le Ofisa o Lafoga. Ma ua mae’a nei ona fa’auia atu lea talosaga mo nisi tagata faigaluega fa’aopoopo, masini ma sapalai.”

Ua fa’ailoa manino atu fo’i e le Kovana ia Tonumaipe’a ina ia taua’aoina aloaia lana fuafuaga faataoto e afua ai ona mana’omia nisi tagata faigaluega fa’aopoopo, masini ma sapalai mo le Ofisa o Lafoga, ma ia fa’ailoa manino ai le afuaga o lea mana’omia.

Ua ia faailoa fo’i ua tele na’ua tagata faigaluega ua fa’afaigaluega talu ai le COVID-19, ma ua solofua ai aiaiga e tele e ao ina fa’amalie ina ia fa’afaigaluega ai nisi i le malo, peita’i e tatau ona va’ai toto’a fo’i i aiaiga a le malo tele e fa’afaigaluega ai nisi.