Tatala i tua mai le Toese i Tafuna le alii na osofaia le fale o lona aunty

Pago Pago, AMERIKA SAMOA - E 90 aso lea ua tatala ai i tua e le Fa’amasinoga Maualuga le alii mai Pago Pago lea na ta’usala i lona osofaia o le fale a lona aunty ae ave faagaoi le tele o meatotino, e alu e saili ai sana galuega e toe totogi ai meatotino sa ia gaoia.

Afai ae mae’a le 90 aso e le i maua lava se galuega a le susuga a Faiaoga Satele, ua poloaina e le Fa’amasinoga Maualuga o ia ina ia toe fo’i i totonu o le Toese mo le tuli faamae’aina o lana fa’asalaga faa falepuipui.

O le vaiaso na te’a nei na tula’i ai Satele i luma o le Fa’amasino Sili ia Michael Kruse mo le lauina o lana fa’asalaga. Talu mai lava le masina o Setema o le tausaga na te’a nei na pu’e faapagota ai e Leoleo ia Satele, sa taofia pea lava o ia i le Toese ina ua le mafai ona ia totogi le $15,000 na faatulaga e tatala ai o ia i tua.

Na ulua’i molia Satele e le malo i le moliaga o le gaoi ma le talepe fale i le tulaga muamua, o le vaega C ia o solitulafono mamafa, lea e mafia ona fa’asala ai se tasi i le Toese mo le umi e oo atu i le 7 tausaga, pe fa’asala foi i le salatupe e oo atu i le $5,000, poo le fa’asala foi i faasalaga umaia e lua.

Ae i lalo o le maliliega na sainia e Satele ma le malo, lea fo’i na faatoa talia e le Fa’amasinoga i le aso na lau ai lana fa’asalaga, na malie ai le ua molia e tali ioe i le moliaga na toe teuteu e le malo, le solitulafono o le taupulepule ma se isi tagata e osofai ma gaoi meatotino a lona aunty.

I le tali ioe ai o le ua molia i le moliaga e pei ona ta’usala ai o ia, sa ia ta’utino ai e fa’apea, i se taimi o le masina o Iulai o le tausaga na te’a nei, na ia osofaia ai le fale a lona aunty i Pago Pago ae ave faagaoi le tele o meatotino sa i ai i totonu.

O le tele o meatotino sa ia faatau atu i le nofoaga e taua o “Le Aute” ae faafesuia’i ma fualaau fa’asaina o le aisa. O isi meatotino sa tulei ma faatau i luga o le itulau e taua o le “American Samoa Dealz and Stealz”, e ala i le fesoasoani a lana uo o Anderson Taala Jr, lea fo’i o lo o molia fa’atasi i laua i lenei mataupu.

Na faatoese le ua molia e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i tua e saili sana galuega e tausi ai lona aiga, e aofia ai lona Tama ma lona afafine. Na taua e le ua molia e faapea, o le 7 ma le afa masina lea na loka ai o ia e fa’atali ai se faaiuga o lana mataupu, ua ia aoaoina ai le tele o lesona taua i lona olaga, ma ua ia iloa ai, e le o se mea lelei le soli o le tulafono.

A o taofia ai o ia i le Toese i Tafuna, na taua e le ua molia i le Fa’amasinoga le faapupula e le Atua o ona mata ma ia iloa ai le ala sa’o e tatau ona ola ai. Na ta’utino le ua molia, na te le o toe tagofia fualaau fa’asaina, ma ua ia manatu fo’i e tatau ona toe timata le upega ma susu’e se isi moemoe fou o lona olaga.

Na talosaga le loia a le ua molia ia Rob McNeill ina ia faasala le ua molia i se faasalaga faanofovaavaaia. Na faailoa e McNeill i le Fa’amasinoga e fa’apea, ua lagona e Satele lona salamo moni e tusa ai o lana solitulafono sa faia, ma ua ia naunau fo’i e toe fia fo’i atu i lona aiga.

Na lagolagoina e le loia a le malo ia Laura Garvey le talosaga a le itu tete’e, ina ia faasala le ua molia i se faasalaga faanofovaavaaia, i lalo o tuutuuga faapitoa e aofia ai lona toe totogi o le tau o mea sa ia gaoia i le aofa’i e $3,500.

Na taua atili e le loia a le malo e fa’apea, e ui o lea ua faaalia e le aunty a le ua molia le loto faamagalo, peita’i e matuia lava le gaioiga sa faia e lenei ali’i, faatasi ai ma le isi alii o loo molia faatasi i laua i lenei maupu, ina ua la osofa’i le fale o lona aunty ae ave faagaioi le tele o meatotino ma faatau atu ina ia maua mai ai a laua fualaau fa’asaina.

A o le i tuuina mai e le Fa’amasinoga lana faaiuga, na toe faatepa e le Fa’amasinoga itu e lua i mau faamaonia o lenei mataupu.

MAU FAAMAONIA

O lenei mataupu e pei ona taua e le Fa’amasinoga, na tofu atu i le Ofisa o Leoleo i Fagatogo, ina ua talosagaina e se Tina le fesoasoani a Leoleo e tusa ai o lona fale na osofa’i ma talepe e ni tagata, ao toesea ai lo latou aiga i Apia mo se tafaoga e 3 vaiaso le umi i le masina o Iulai o le tausaga na te’a nei.

O meatotino na taua e le Tina i Leoleo na gaoia e aofia ai laptops e 3; o mea faigaluega e alu i le uila e pei o le Grinder, Skill-saw ma le Drill; o pea tautaliga auro; o le laau su’isu’i e tasi; o le mama auro e tasi; o pea seevae; o se fana o le ituaiga o le 22 caliber rifle; o ietoga tetele e 2; tasi le vacuum, faapea ai ma se pelu o le ituaiga o le ‘samurai sword’.

Na fesiligia e Leoleo se molimau ma faaalia ai e lea molimau le alu atu o Satele ia te ia pe manao e faatau nisi o ana oloa o loo fia faatau ese e aofia ai laptops e 3.

A o faagasolo pea suesuega a Leoleo, na maua e le aiga e ana le fale ata o nisi o a latou meatotino o loo faasalalau i luga o le itulau o le Facebook e taua o le “American Samoa Dealz and Stealz”, o se vaega lea e faalauiloa ai oloa a tagata taitoatasi e fia faatau ese atu.

Ina ua fesiligia e Leoleo le ua molia e uiga i lenei mataupu, sa ia ioeina ai le la osofaia ma lana uo e igoa ia Anderson Taala Jr o le fale a lona aunty i Pago Pago ae ave faagaoi le tele o meatotino. O nisi o meatotino sa faatau atu i le nofoaga o le “Le Aute” ae faafesuia’i ma fualaau faasaina o le aisa, ae o isi oloa na faatau i lugao le “American Samoa Dealz and Stealz”.

E le o oloa uma na gaoia na faataui mai ai fualaau faasaina, ae o nisi o oloa na faatau solo e Satele i nisi o tagata e masani ai, e aofia ai se alii ave pasi, faapea ai se tamaitai ma se alii mai Pago Pago lava.

Na taua e le alii mai Pago Pago e faapea, na faateia o ia ina ua taofi e Satele lana ta’avale i luga o le alatele i Pago Pago, ma fesili atu pe na te fia faatauina lana laptop ma le uaea e fafaga ai le a’a i le $200, faapea ai ma le mea faigaluega e alu i le uila e tasi i le $40.

Na taua e le ali’i lea lona taliaina o le talosaga a Satele ma ia faatauina mai ai meatotino e pei ona taua. O ia meatotino ua toe faafo’i uma atu i Leoleo.

Na taua atili e le ali’i lea i Leoleo e fa’apea, na mafua ona ia faatauina meatotino nei mai ia Satele, ona sa talosaga atu o ia, o lo o matua mana’omia lava se tupe e tausi ai si ona Tama o loo tigaina i le Falema’i.

FAAIUGA A LE FAAMASINOGA

E 5 tausaga i le Toese lea ua faasala ai le ua molia e le Faamasinoga, atoa ai ma lona totogi o le salatupe e $5,000. Peita’i ua faamalumalu e le Fa’amasinoga le tuliina o lea faasalaga, ae ua nofovaavaaia ai Satele mo le 5 tausaga i lalo o tuutuuga e tatau ona usita’i i ai.

E nisi o ia tuutuuga e aofia ai lona tuliina o masina e 20 i le Toese i Tafuna, ae faitau ai ma le 7 ma le afa masina lea ua mae’a ona tuli. Ua manatu le Fa’amasinoga o le a taofi le tuliina e le ua molia i le paleni o loo totoe o lana faasalaga faa falepuipui, ae o le a tatala o ia i tua mo le umi e 90 aso e saili ai sana galuega e toe totogi ai le tupe e $3,500 mo le tau o meatotino sa ia gaoia.

Afai e mae’a le 90 aso ae le i maua sana galuega, ona toe fo’i loa lea i totonu o le Toese e tuli faamae’a le umi o loo totoe o lana faasalaga e 20 masina.

E le mafai ona ia toe tagofia le ava malosi poo fualaau faasaina, ua fautuaina fo’i o ia ina ia tausisi i soo se tulafono a le malo, ma ia faaaoga tatau aso o loo totoe o lona olaga.