Talia Peresetene Trump talosaga a Amerika Samoa

O se meaalofa sa maua e  Amerika Samoa i le aso tonu o lana sisigafu’a i lea aso Faraile ua te’a,  o le talia lea e Peresetene Trump ma sainia le fa’amaoniga e maua ai e Amerika Samoa le fa’atagaga o le fesoasoani mai a le FEMA i le puipuiga o le teritori mai le fa’ama’i pepesi o le coronavirus.

O nisi o aiaiga o lenei feasoasoani a le fetarale, e totogi e le malo tele le 75% ae 25% totogi e Amerika Samoa. O fa’atupega e aofia ai o mea uma ua lisia i le Puipuiga B lea e aofia ai mea uma e fa’aaoga mo le puipuiga o tagata uma mai le a’afia i le Coronavirus, lea e aofia ai talipupuni o fofoga, sapalai o mea fa’aaoga e fa’amama ai nofoaga faitele mai siama, auupega uma e fa’aaoga e le Emergency Operation Center, o tautua uma e feso’ota’i sa’o ma galuega e fa’atautaia a le EOC, e aofia ai ma afi e fa’aaoga e sapalai mai ai le eletise mo le fa’atautaiga o galuega a le EOC.

O i si mea uma e aofia ai le totogia o sapalai, mea e fa’aaoga mo le tausiga o le soifua maloloina ma suesuega o le soifua maloloina o tagata uma i suega o le Coronavirus, fausia o nofoaga uma e tapena ai nei suesuega, auala e faaaogaina mo fela’uaiga, toina mai tautua eseese mo tagata lautele.

Fa’ailoa le agaga fa’afetai o Kovana Lolo Moliga ia Robert Fenton, Aministrator o le FEMA Region 9, lea e aofia ai Amerika Samoa i le latou va’ava’aiga.

O le puipuiga lenei ua faia ina ia taumafai ona le a’afia Amerika Samoa i le faigata tele o le Coronavirus e pei ona oo uma ai setete ma teritori - se’i vagana ai Amerika Smaoa.

Ua ia fa’ailoa atu ia Fenton, “Ua sili ona ou fa’afetaia le taimi tonu ua sainia ma faalauiloa patino mai ai e le Peresetene lenei fesoasoani o se meaalofa taua mo Amerika Samoa ma ona tagatanuu.”

“O le ala ma le aso ua faia ai e Peresetene Trump lenei fa’atagaga ua atili ai ona fa’amaonia e le Malo o Amerika Samoa ma ona tagatanuu le agaga tonu o Amerika na mafua ai ona latou manatu e tausia Amerika Samoa mai le amataga o le feagaiga sa tapena e i latou ma o matoua tua’a ua taooto mai i Ti’asa. Ua latou fa’aauau lava ona tula’i mai e fesoasoani ia i matou i so’o se taimi e a’afia ai i matou i ni fa’alavelave fa’afuase’i ma mea e le mafai ona matou toe fa’aleleia na’o i matou.”

Fa’ailoa e le kovana, “A’o matou sisia a’e le tagavai a le Malo Tele fa’atasi ma le matou fu’a o le sa’olotoga ia Aperila 17, 2020, e pei ona muai faia i lea lava aso 120 tausaga talu ai, ua matou fa’aalia a’ia’i fo’i lo matou talia lelei o le feagaiga ua avea ai i matou ma Nesionale o Amerika, ua matou maua ai fa’amoemoega lelei uma ona o le tausiga lelei ma o se tali i a matou talosaga si’i a’e i le Atua. O le tausiga mau a le Atua ua maua ai nei faamanuiaga e tele e o matou tagata.”

Na i ai fo’i le manatu fa’aalia o le tatou Sui i le Konekeresi Aumua Amata e tusa o le fa’atagaga ua sainia mai e Peresetene Trump mo Amerika Samoa.

“Fa’afetai ia Peresetne Trump ina ua tafa lona finagalo e fa’ataga fesoasoani a le FEMA mo Amerika Samoa i lona Puipuiga B, ma ou te sapaia atoatoa lea fo’i fa’aiuga a le Peresetene. Fa’afetai fo’i i le manatu fa’aalia o le Pule o le Ofisa Autu o le FEMA i le Region 9,  Robert Fenton. O aiaiga uma fo’i e ao ina usita’ia e Amerika Samoa e tusa ai o le Puipuiga B  o tautua e ofoina mai e le FEMA.”

“Ua fa’aauau pea ona fa’ailoa mai e le Atua lona alofa mo i tatou Amerika Samoa e ala i lenei auala ua fa’aauau ai ona va’aia lelei i tatou e Amerika e tusa o feagaiga osia i lo tatou va ma ua avea fo’i o se a’ao malosi e fa’alagolago i ai i tatou i taimi faigata o le soifuaga. O se tala sili ona fiafia ai ona o le maua tonu o lenei fa’atagaga i le aso ua fa’ailogaina ai lau sisigafu’a e fa’amanatu ai le 120 tausaga o le tausiga fa’ateritori o Amerika Samoa.”

Ua avea foi le Iunaite Setete ma ala o fa’amanuiaga i taimi o lenei fa’ama’i tele o a’afia ai le lalolagi ma ua toe fa’amalosia mai ai tulaga tau le tamaoaiga tausi o le atunuu ona o a’afiaga i afa ma matagi malolosi, ma soso’o mai ai ma fa’ama’i pipisi ua a’afia ai nei.

Fa’afetai i le FEMA ma le latou fesoasoani o fa’aauau mai pea, ae maise fo’i o le fesoasoani ua mae’a fa’ataga nei ona fa’atula’ia mo Amerika Samoa.