Maua DHSS fesoasoani mo le fa’atupega o day care i le atunuu

E afua i le Aso Lulu, 15 Aperia, ona galulue le Matagaluega o Alagamanuia mo Tagata Lautele (DHSS) e fa’asoasoa fesoasoani tau tupe mai le fetarale,  e fa’atupega mo Nofoaga e Tausia Ai Fanauiti i le atunuu.

I le fonotaga a le Coronavirus a le malo sa faia i le aso Sa ua te’a sa fa’iloa ai e le fa’atonu ia Muavaefa’atasi John Suisala lea fesoasoani mo le 23 o Day Care i le atunuu o le a agava’a i latou uma i lea fesoasoani ina ia mafai ona totogia a latou tagata faigaluega, ma ia mafai fo’i ona fa’atautaia le latou tautua.

“Na i ai lava le popolega i le matou fo’i matagaluega i lona vaega patino e va’aia lea itu o le tautua aua o le 23 o Day Care i le atunuu e tausia lelei ai le aotelega e 881 le fanauiti ae fa’afaigaluega ai le to’a 209 o i latou e tausitama ma fa’atautaia nei tautua, ma ua atugalu fo’i ina nei le toe mafai ona fa’atautaia lea tautua aoga, pe afai ae le toe maua mai le fa’atupega, peita’i o lea ua toe fa’auia mai,” o se tala lea a Muavaefa’atasi.

Sa ia fa’ailoa o le itiiti lava o le tupe ua fa’atulaga mo le tagata faigaluega a le Day Care $800 i le masina. O le aotelega o le $223,000i le masina mo le Day Care. O lo ua mana’omia ona taua’aoina mai e le vasega o Pulega a Day Care uma le fa’amaoniga o latou tagata faigaluega ma latou fa’amaumauga, ina ia totogia ai i latou i lea fa’atupega ua toina mai. Ua faailoa mai e fuafua fo’i le aofai o le fesoasoani i Day Care i le toatele o le fanau o lo’o tausia ai.

Ua mae’a fo’i ona fa’amaonia mai le fa’atupega mo Day Care pe afai ae oo ina tatou maua i le Code Yellow ma le Code Red le atunuu i le fa’ama’i o pipisi nei i le lalolagi, peita’i o i tatou o lo’o mautu pea le tatou Code Blue.

Ma e mafai ona avea se tasi o sui o le aiga e faigaluega e va’aia le fanau mo le 200 itula i le masina, ma ua mafai fo’i ona totogia lea va’aiga lelei o le fanau. Ua i ai fo’i le maga o lea fesoasoani, afai e le o se tagata o le aiga e avea ma tausitama, ae o se tasi fo’i ua avanoa lona taimi e na te tausia lelei ai le fanau, ua talia fo’i mo lea fa’atupega, e totogia fo’i lona 200 itula i le masina. Pau le tamau o lea aiaiga, ina ia 18 tausaga ma matua atu le tausi tama.