Tala I Vaifanua

Pago Pago, AMERICAN SAMOA -

AIAIGA O LE FA’ASA TUUINA ATU I LE KOVANA MA SANA FA’AIUGA

Ina ua oo mai i le aso na atofa e le Kovana Sili e tatau ai ona fo’i ane le Komiti Fa’afoe o le Coronavirus, ua mafai foi ona taua’aoina ane e le Komiti lea a latou aiaiga fou ua mae’a fa’atulaga mo le kovana e taga’i toto’a i ai mo sana fa’aiuga ina ia fa’amalosia ai.

O nei fo’i aiaiga fou o le a mafai ona fa’amalosia pe’a o’o una fa’amaonia e Kovana Lolo Moliga i le aso ua fa’aleaogaina ai le ulua’i fa’asa na fa’amamalu mai mo le 30 aso. O lea aso o Me 01, 2020, ma o le taitaifono o le komkiti fa’afoe o le Coronavirus, Iulogologo Pereira sa ia fa’ailoa mai ua toetoe lava mae’a lelei aiaiga uma o lo ua fa’atulaga pe afai o le a fa’aauau le poloaiga fa’alaua’itele a le Kovana mo lenei fa’asa.

Ua fa’ailoa e le Kovana Sili ua mae’a fa’ailoa atu e ia i le Komiti Fa’afoe ina ia fa’aauau le fa’asa ae maise lava le fa’asa ona faimalaga mai o ni va’alele ma va’a lau pasese i totonu o le atunuu mai so’o se malo.

Ua ia fa’ailoa mai fo’i e leai se fuafuaga a le malo e taofia galuega ina ia maua pea totogi o tagata faigaluega a le malo fa’apena ma le kamupani I’a, aua a taofia galuega nei e lua o le a faigata ona maua le tamaoaiga tausi o aiga taitasi i le atunuu.

Ona o lea fo’i ua toina mai e le Kovana sili le fa’atagaga e fa’atautaia ai pea galuega a tagata faigaluega uma i le Kamupani, o se avanoa lelei lea e matua fa’ataua ai le usita’ia o aiaiga uma o le fa’asa e tusa o le tausia lelei o le tulaga mama a’ia’i o le nofoaga faigaluega ae maise o le va feso’ota’i o tagata faigaluega i totonu o le galuega.

15 SUEGA CORONAVIRUS - E LEAI SE ISI O MAUA I LE MA’I PIPISI

Ua toe taliu mai fo’i tali o suega na auina atu mo le fa’amaoniga pe ua maua se tasi i le Coronavirus, peita’i ua toe taliu mai lea 15 suega e le o maua se tasi, ma o se tala fiafia lea mo tagata uma.

Talu mai ona maua mai le masini e faia ai lava e i tatou a tatou suega o le Coronavirus i’inei, e lua suega ua mae’a fa’aaogaina ai lea masini ma e le o maua fo’i se tasi i le COVID-19 i na suega e lua.

“O le aotelega e 29 suesuega ua auina i fafo mo le fa’amaoniga, tasi na auina mamao i le CDC i Atlanta, 26 na sailia i Honolulu ma le 2 lea sa sueina i Amerika Samoa nei, ua leai ma suega e fa’amaonia ua maua se isi i le Coronavirus,” o se tala lea a Dr. Aifili John Tufa.