Toe molia Tulafono le alii o loo nofovaavaaia ona o fualaau faasaina

Pago Pago, AMERICAN SAMOA -

O se ali’i o lo o nofovaavaaia mo le 5 tausaga ona o le moliaga o le umia faasolitulafono o fualaau faasaina na faamaonia e le Fa’amasinoga Maualuga i le tausaga na te’a nei, ua toe taofia nei o ia i le Toese i Tafuna ina ua taofi e Leoleo lana ta’avale i le le usitaia o tulafono i luga o le alatele ae maua ai fualaau fa’asaina.

O le vaiaso na te’a nei na tula’i ai Tau Ala i luma o le Fa’amasinoga Fa’aitumalo mo lana ulua’i iloiloga.

O lo o tu’uaia o ia e le malo i le moliaga o le umia faasolitulafono o vaega o le pauta faasaina o le aisa; umia faasolitulafono o vaega o le pauta o le aisa ma le faamoemoe e tulei ma faatau atu i isi tagata, o solitulafono mamafa ia e mafai ona faasala ai se tasi i le Toese mail e 5 e oo atu i le 10 tausaga, pe faasala foi i le salatupe e mai le $5,000 e oo atu i le $20,000 le mamafa, poo le faasala foi i faasalaga uma ia e lua.

O lo o tu’uaia fo’i e le malo ia Ala i le moliaga o le tete’e atu i Leoleo ao taumafai e pu’e faapagota o ia, o le vaega D lea o solitulafono mamafa, lea e mafai ona faasala ai se tasi i le Toese mo le umi e mafai ona oo atu i le 5 tausaga, poo le faasala i le salatupe e mafai ona oo atu i le $5,000, pe faasala fo’i i faasalaga uma ia e lua.

O le aso Tofi o le vaiaso nei lea ua fa’atulaga e faia ai le ulua’i iloiloga faapitoa o lenei mataupu. E $15,000 le vaega tupe lea ua fa’atulaga e le afioga i le ali’i Fa’amasino ia Elvis P. Patea e tatala ai i tua le ua molia.

TAGI A LE MALO

O le afiafi o le aso 5 o Aperila 2019, na maitauina ai e ni alii Leoleo se to’alua sa tiute i luga o le alatele i Iliili se ta’avale pikiapu e sau mai Sasa’e e aga’i atu i Sisifo ua mae’a le aoga o le laisene o lo o pipii i le pito i luma o le ta’avale.

Na faafesoota’i e ali’i Leoleo le Ofisa autu o Leoleo i Fagatogo mo le tau sailia mai o ni faamaumauga e faatatau i le laisene o le ta’avale lea ua laua molimauina i luga o le alatele. O le ripoti na tuuina atu i le Ofisa autu i Fagatogo, o le laisene o le pikiapu e pei ona fesiligia na mae’a lona aoga i le 2 tausaga talu ai.

O le mae’a ai ona maua e Leoleo o faamaumauga e fa’atatau i le ta’avale, na faia ai loa gaioiga masani o le tuliloa o le ta’avale ma faaola moli emoemo ina ia faailoa atu ai i le ave ta’avale o le pikiapu e tatau ona afe i tua.

Na afe le pikiapu a le ua molia i luma o se faleoloa Asia i se vaega o Iliili e fa’atali ai le aga’i atu o Leoleo e fa’ailoa atu le mafua’aga ua taofi ai lana ta’avale. A o savavali atu Leoleo e aga’i atu i le ta’avale a Ala, sa vaaia e Leoleo gaioiga a le ua molia i totonu o le ta’avale, e foliga mai o lo o aapa lona lima i le taga o lona ofuvae ma le faamoemoe e aveese mai se mea i fafo.

Na taunu’u alii Leoleo ma faailoa ia Ala le mafuaaga ua taofia ai lana ta’avale, ona ua ua 2 tausaga talu ona mae’a le aoga o le laisene o lana ta’avale. Na tete’e le ua molia i le faamatalaga a Leoleo ma finau atu i ai, o le masina o Novema o le tausaga na te’a nei na faafou ai le laisene o lana ta’avale faapea ai ma le Inisiua.

Na fesili Leoleo ia Ala e avatu lona laisene ave ta’avale, peita’i na faailoa e le ua molia, o lo o galo lana laisene ae o lo o lelei fo’i lona laisene. E fai lava talanoaga a Leoleo ma le ua molia, ae vaaia lava le taumafai o le ua molia e aapa i le taga o lona ofuvae ao ona mata o lo o autilo solo.

Talu ai ua mae’a le aoga o le laisene o le ta’avale a le ua molia, atoa ai ma le leai o sona laisene ave ta’avale, na faatonu ai loa e Leoleo ia Ala e oso i fafo ma lana ta’avale, ona o lea laa toso lana ta’avale e taofia i le Ofisa o Leoleo i Tafuna.

A o le i auina atu le ua molia ma lana ta’avale i le Ofisa o Leoleo i Tafuna, na muamua su’e e Leoleo le tino o le ua molia ina ia mautinoa na te le o umia ni aupega mata’utia poo ni fualaau fa’asaina.

Ina ua saili e Leoleo le tino o le ua molia, sa maua i ai se pepa iila feololo i lana taga taumatau o lona ofu sa fai. I totonu o lea pepa iila feololo sa maua i ai ni tama’i pepa iila laiti se 3 o lo o i ai vaega o le pauta pa’epa’e. Na faia se suega i pauta papa’e ia ma faamaonia ai, o vaega ia o le pauta faasaina o le aisa.

Na uma ona saili le tino o le ua molia, ona fa’asolo atu lea o Leoleo e saili totonu o lana ta’avale. I lalo o le nofoa o le ave ta’avale sa maua ai e Leoleo se tama’i ato o lo o i ai ni straws se 3 o lo o tutumu i vaega o le pauta pa’epa’e. Na faia se suega i pauta papa’e sa maua i totonu o le tama’i ato a faamaonia ai, o vaega ia o le pauta faasaina o le aisa.

FINAU LE MALO E FAALEAOGA LE NOFOVAAVAAIA A ALA

O le mae’a ai o le ulua’i iloiloga a Ala i luma o le afioga i le Faamasino ia Patea, na sosoo ai loa ma le isi ana iloiloga i le aso na sosoo ai i luma o le afioga i le Faamasino Sili lagolago ia Fiti Sunia.

O lea iloiloga, e mafua mai i se talosaga a le malo ina ia faaleaoga tuutuuga o le nofovaavaaia a Ala, ae poloaina loa o ia e tuli le faasalaga faa falepuipui o lo o faamalumalu e le Fa’amasinoga.

O le vaiaso fou lea ua faatulaga e toe valaau ai le mataupu a Ala i luma o le afigoa i le alii Faamasino ia Sunia, mo le tuuina atu o le faaiuga a le Faamasinoga e tusa ai o le le tausisi o Ala i tuutuuga o lana nofovaavaaia.

FAASALAGA NOFOVAAVAAIA

O le masina o Aokuso 2019 na faasala ai e le Faamasinoga ia Ala e nofovaavaaia mo e 5 tausaga, ina ua ta’usala o ia i le solitulafono o lona umia faasolitulafono o vaega o le pauta faasaina o le aisa.

I le aso na lau ai le faasalaga a Ala, na matua fautuaina malosi ai e le Faamasinoga o ia ina ia faaaoga tatau le avanoa ua tuuina atu, e le toe fia vaai foi le Faamasinoga ia te ia i se isi lava solitulafono.

“Filifili oe poo fea le ala e te fia ui ai, poo le usita’i i tuutuuga o lau nofovaavaaia ma alo alo ese mai i le ava malosi ma fualaau faasaina, poo lou filifili e fa’aauau pea ona e tagofia ia tulaga, ma faasala ai oe i le Toese mo se taimi umi lava o lou olaga,” o le fautuaga lea a Sunia ia Ala.