Ofisa Fa’amaumau Tagata vaea mai galuega ona o le Coronavirus

Pago Pago, AMERICAN SAMOA -

Ua tatau ona fa’atula’ia se ofisa o le Malo e aga’i i ai le to’atele o tagata fia maua ni galuega, ma nisi ua vaea mai galuega, fa’atasi ma nisi fo’i o lo’o fa’atalitalia lava ni avanoa e faigaluega ai i le Malo ma kamupani uma o so’o se ituaiga i Amerika Samoa.

Ina ua talosaga le ali’i Kovana i le FEMA mo se vaega tupe e fesoasoani i le tatou malo ma ona tagata faigaluega lea ua le mafai ona faigaluega ona ua vaea i a’afiaga o le Coronavirus, ae fesiligia loa e le FEMA se fa’amaumauga fa’apea mai le tatou Malo iinei, ma ia va’aia e i latou se lisi, peita’i e leai se mea fa’apea o i ai.

Lea ua tapena mai le FEMA e oo mai e fa’atula’ia lona ofisa e fesoasoani i le fa’atinoga o suesuega e mautinoa ai ua maua se tasi i le Coronavirus pe leai, ma ua latou manatu e sili atu ona masi’i mai se vaega o le latou aufaigaluega e fa’atautaia lea tiute i totonu o le teritori.

“Ona o fesoasoani uma lava nei e auina mai mo Amerika Samoa e oo i le utaina mai o sapalai o vaila’au ma mea uma e fa’aaogaina i le tau sailiga o tatou tagata poo i ai se tasi ua maua i le Coronavirus e fa’aiu ane uma lava e totogi i le paketi a le FEMA, o lea e sili ai ona auina atu se vaega o le aufaigaluega e galulue tumau mai i Amerika Samoa. O le vave ona iloa lelei e le’i maua nisi o le aufaigaluega o foma’i ma e ta’imua mai i galuega suesue o lea fa’ama’i i Amerika Samoa, o le mautinoa atili lea o lo latou saogalemu mai le Coronavirus.”

O se tala lea mai le ofisa ulu o le FEMA i San Francisco, lea e aofia ai Amerika Samoa i le latou puipuigamalu. O le vave e malaga mai ai lenei aumalaga o le vaiaso a sau nei.

Peita’i, ona o lea fo’i ua tapena mai le tatou tinoitupe e fa’amatuu e totogia ai le aufaigaluega ua vaea mai galuega ona o le Coronavirus, o lea ua tatau ai ona fa’amautu se Ofisa e tasi e pei ona mana’omia e le FEMA, e faaofi atu i ai ma e sa faigaluega i Pisinisi Tumaoti, ma o i latou na e tatau lava ona maua uma nei siaki mai le Malo tele.

Ua fa’ailoa mai e tatau ona fa’aigoaina lea Ofisa o le Pandemic Unemployment Assistance po’o le PUA. E tatau lava ona galulue feso’ota’i lelei ma le Matagaluega o Tagata Faigaluega a le Malo o Amerika Samoa.

Peita’i, o se tasi o popolega o lo ua atugalu i ai nisi o vasega o aufaipisinisi laiti, lea ua fa’apea ai, “Pe fa’apefea la ona fa’atumauina nisi o latou tagata faigaluega, pe afai o le a sasala ma matagofie le totogi mai o le $600 i le vaiaso pe afai e te le faigaluega ona o le Coronavirus?”

E mautinoa o lea totogi e maua mai mo e le faigaluega ona o le coronavirus e matua sili ma ova mamao i le tinoitupe lea e maua e isi mai le o atu pea e faigaluega i le vaiaso atoa.

Ua fa’atula’ia ai se manatu o le taitaifono o le Asosi a le Aufaipisinisi, ina ia fa’atumau le so’otaga vavalalata e talatalanoa atili ai le aufaipisinisi ma le Matagaluega o Tagata Faigaluega a le malo.

“O se tasi o nei aiaiga e maua ai penefiti e tatau ona taua’aoina se tusi fa’amaonia mai le fale faigaluega o oe ua tu’ua le galuega ona o le vaea ese i le utiuti o le fa’asoa ona o a’afiaga o fefa’ataua’iga i lenei vaitau o le vavao mo le coronavirus.”

“O le isi mea e ao ina va’ai toto’a i ai le PUA, o le tulia mai le galuega ona o le le fa’amaoni ma le augata e faatino tiute, pe ua tuli fa’amalosi e le pule, e le tatau ona aofia ia i latou e maua penefiti nei.”