Taualoa auaunaga - Jacinta Brown e le Ohana PRIMO

I le aso tofi talu ai le fonotaga a le Ohana PRIMO na faia i Hawaii, na taualoa ai le auaunaga matavela a le tamaita’i o Jacinta Brown, o se tasi sa avea ma Sui Fa’atonu o le Matagaluega o le Homeland Security a Amerika Samoa (ASDHS), ma ua tele fo’i tausaga o auai i mea uma e fa’atino mo le Ohana PRIMO.

O le fa’ailoga na taualoa ai lana auaunaga sa mafai fo’i ona taua’aoina fa’atasi ma fa’ailoga na taua’aoina mo le sao o le tamaita’i o Elinore Lutu-McMoore o le National Weather Service ma le fa’ailoga fa’apitoa mo Tafa Tua-Tupuola o le UCEDD ma le fa’ailoga mo Ginger Porter o le UH-TASI Pacific Desk, o se tasi sa ia tu’ufa’atasiga le taligamalo mo lenei tausaga i le fonotaga a le PRIMO i Honolulu.

O le Ohana PRIMO e to’a 14 setete a teritori o Amerika o lo’o aofia ai fa’atasi ma le to’a 9 o isi malo tumaoti o lo’o avea ma o latou totino tumau i le taimi nei. E tusa ma le 150 sui sa auai i le fonotaga lenei i Honolulu ma o le sui o Samoa sa malaga atu mo lea fonotaga o le tamaita’i Sui Palemia o Samoa, Fiame Naomi Mata’afa ma le sui o le Atu Kuki o le latou Palemia o Henry Puna.

I se fa’amatalaga a le ali’i fa’atonu o le ASDHS, le susuga Samana Semo Veave’a, “O le to’esea fo’i o Jacinta Brown i le matou matagaluega o se avanoa e le faigofie ona fa’atumu. O se tasi sa galue malosi ma faia le mea sili i tiute fai e ao ina fa’atino ae a le saogalemu o le mamalu lautele ole tatou Malo ma ona tagata, ae maise o le tele fo’i o so’otaga ma fafo i taimi e lutia ai i tatou i fa’alavelave fa’anatura e pei ona tatou a’afia ai. Fa’afetai mo Brown i nei tausaga e tele sa tautua ai.”

“Ua iloga le auaunaga a Jacinta Brown i so’otaga sa mafai ona ia tau’avea i le va o le ASDHS ma le tele o isi malo i fafo fa’apea ma le Malo tele i ana pa’aga ua galulue fa’atasi nei mo le fa’amoemoe e tasi, ia mautinoa le saogalemu o le Iunaite Setete ma teritori ae maise isi malo tuaoi, ua fa’amautuina.”